ಕೂಲಾಗಿ ಸಂಚರಿಸಲು ಡ್ರೋನ್ ವಿಮಾನ

ಎಹ್ಯಾಂಗ್ 184 (Ehang) ಆಟೋನೋಮಸ್ ಏರಿಯಲ್ ವೆಹಿಕಲ್ (ಎಎವಿ) ಸ್ವಯಂಚಾಲಿತವಾಗಿ ಚಲಿಸುವ ಡ್ರೋನ್ ವಿಮಾನವಾಗಿದೆ. ಇದರಲ್ಲಿ ಓರ್ವ ಪ್ರಯಾಣಿಕನಿಗೆ ಮಾತ್ರ ಸಂಚರಿಸಲು ಸಾಧ್ಯ.

ಇದರ ಹಿಂದೆ ಆಸಕ್ತಿದಾಯಕ ಕಥೆಯೊಂದಿದೆ. ಎರಡು ವರ್ಷಗಳ ಹಿಂದೆಯಷ್ಟೇ ವಿದ್ಯುತ್ ಚಾಲಿತ ಎಹ್ಯಾಂಗ್ ಡ್ರೋನ್ ವಿಮಾನವನ್ನು ಅಭಿವೃದ್ಧಿಪಡಿಸಲಾಗಿತ್ತು. ಆದರೆ ದುರದೃಷ್ಟವಶಾತ್ ಸಂಭವಿಸಿದ ಅವಘಡದಲ್ಲಿ ಎಹ್ಯಾಂಗ್ ಸಂಸ್ಥೆಯ ಸಿಇಒ ಹುವಾಝಿ ಅವರ ಇಬ್ಬರು ಪೈಲಟ್ ಸ್ನೇಹಿತರು ಮೃತಪಟ್ಟಿದ್ದರು.

ಕಡಿಮೆ ದೂರದ ಪ್ರದೇಶಗಳಿಗೆ ಸಂಚರಿಸಲು ಇಂತಹದೊಂದು ವೈಯಕ್ತಿಕ ಸಂಚಾರ ವಾಹಕದ ಅಗತ್ಯವಿದೆ. ಇದಕ್ಕೆ ಪೈಲಟ್ ಪರವಾನಗಿಯ ಅಗತ್ಯವಿರುವುದಿಲ್ಲ. ಅಲ್ಲದೆ ಕಡಿಮೆ ಎತ್ತರದ ಪ್ರದೇಶದಲ್ಲಿ ನಿಶ್ಚಿಂತತೆಯಿಂದ ಸಾಗಬಹುದಾಗಿದೆ.

ಚೀನಾ ನಿರ್ಮಿತ ಈ ಡ್ರೋನ್ ವಿಮಾನದಲ್ಲಿ 12 ಇಂಚುಗಳ ಟಚ್ ಸ್ಕ್ರೀನ್ ಟ್ಯಾಬ್ಲೆಟ್ ಪರದೆ ಆಳವಡಿಸಲಾಗಿದೆ. ಈ ಮೂಲಕ ಟೇಕ್ ಆಫ್ ನಿಂದ ಹಿಡಿದು ಎಲ್ಲವನ್ನು ಯಾಂತ್ರಿಕವಾಗಿ ನಿಯಂತ್ರಿಸಬಹುದಾಗಿದೆ.

ಬಹಳ ಚುರುಕುತನದಿಂದ ಈ ಆಟೋಮ್ಯಾಟಿಕ್ ಡ್ರೋನ್ ವಿಮಾನ ಏರ್ ಟ್ರಾಫಿಕ್ ನಿಭಾಯಿಸುವ ಸಾಮರ್ಥ್ಯವನ್ನು ಹೊಂದಿರುತ್ತದೆ. ಅಲ್ಲದೆ ಹೆಚ್ಚು ವೇಗದಲ್ಲಿ ಸುರಕ್ಷಿತವಾಗಿ ಗುರಿ ಮುಟ್ಟಬಹುದಾಗಿದೆ.

ಒಟ್ಟಾರೆ 200 ಕೆ.ಜಿ ಭಾರದ ಈ ಡ್ರೋನ್ ವಿಮಾನದಲ್ಲಿ 14.4 ಕೆಡಬ್ಲ್ಯುಎಚ್ ಬ್ಯಾಟರಿ ಆಳವಡಿಸಲಾಗಿದ್ದು, ನಾಲ್ಕು ತಾಸುಗಳಲ್ಲಿ ಸಂಪೂರ್ಣವಾಗಿ ಚಾರ್ಜಿಂಗ್ ಮಾಡಬಹುದಾಗಿದೆ.

ಅಂತೆಯೇ 120 ಕೆ.ಜಿ ಭಾರ ಹೊರುವ ಸಾಮರ್ಥ್ಯವನ್ನು ಹೊಂದಿರಲಿದ್ದು, ಗಂಟೆಗೆ 100 ಕೀ.ಮೀ. ವೇಗದಲ್ಲಿ ಸಂಚರಿಸುವ ಸಾಮರ್ಥ್ಯ ಹೊಂದಿರುತ್ತದೆ.

11,480 ಅಡಿ ಎತ್ತರದಲ್ಲೂ ಹಾರಾಟ ನಡೆಸುವ ಸಾಮರ್ಥ್ಯವನ್ನು ಇದು ಹೊಂದಿರುತ್ತದೆ. ಇನ್ನುಳಿದಂತೆ ಎಸಿ ಜೊತೆಗೆ ಸಂಪೂರ್ಣ 4 ಸೇವೆಯೂ ಲಭ್ಯವಿರುತ್ತದೆ.