2026 ರ ವೇಳೆಗೆ ಹಾರುವ ಟ್ಯಾಕ್ಸಿಗಳಿಗೆ ಚಾಲನೆ: ಉಬರ್ ರೈಡ್‌ನಷ್ಟೇ ಕಡಿಮೆ ವೆಚ್ಚಕ್ಕೆ ಸೇವೆ

2026 ರ ವೇಳೆಗೆ ದುಬೈನಲ್ಲಿ ಏರ್ ಟ್ಯಾಕ್ಸಿಗಳು ಆಕಾಶಕ್ಕೆ ಹಾರಲಿವೆ ಎಂದು ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) ಉಪಾಧ್ಯಕ್ಷ ಮತ್ತು ಪ್ರಧಾನ ಮಂತ್ರಿ ಶೇಖ್ ಮೊಹಮ್ಮದ್ ಬಿನ್ ರಶೀದ್ ಅಲ್ ಮಕ್ತೌಮ್ ಅವರು ಘೋಷಿಸಿದ್ದಾರೆ. ಈ ಮೂಲಕ ದುಬೈನಲ್ಲಿ ಹಾರುವ ಟ್ಯಾಕ್ಸಿ ಸೇವೆಯ ಯೋಜನೆಗಳು ಮತ್ತೆ ರೂಪುಗೊಂಡಿವೆ.

"ಇಂದು ನಾವು ದುಬೈನಲ್ಲಿ ಫ್ಲೈಯಿಂಗ್ ಟ್ಯಾಕ್ಸಿ ವರ್ಟಿಪೋರ್ಟ್‌ಗಳ ವಿನ್ಯಾಸಗಳನ್ನು ಅನುಮೋದಿಸಿದ್ದೇವೆ, ಮುಂದಿನ ಮೂರು ವರ್ಷಗಳಲ್ಲಿ ಇವು ಕಾರ್ಯನಿರ್ವಹಿಸಲಿವೆ" ಎಂದು ಶೇಖ್ ಮೊಹಮ್ಮದ್ ಟ್ವೀಟ್ ಮಾಡಿದ್ದಾರೆ. ಈ ಸಂಬಂಧ ಭವಿಷ್ಯದ ಉಪಕ್ರಮಗಳ ಸರಣಿಯನ್ನು ಘೋಷಿಸಲಾಗಿದೆ, ಕಂಪನಿಗಳು ಆ ಭರವಸೆಗಳ ಮೂಲಕ ಸಾಗಲಿವೆ. ಇದನ್ನು ದುಬೈನ ವಾರ್ಷಿಕ ವಿಶ್ವ ಶೃಂಗಸಭೆಯಲ್ಲಿ ಪ್ರದರ್ಶಿಸಲು ಹೆಚ್ಚಿನ ಸಮಯವನ್ನು ನಿಗದಿಪಡಿಸಲಾಗಿದ್ದು, ಈ ವರ್ಷದ ಆವೃತ್ತಿಯು ಮುಂದಿನ ಸೋಮವಾರದಿಂದ ಪ್ರಾರಂಭವಾಗುತ್ತದೆ ಎಂದರು.

ಈ ಏರ್ ಟ್ಯಾಕ್ಸಿಗಳು ಉಬರ್ ರೈಡ್‌ನಷ್ಟು ಕಡಿಮೆ ವೆಚ್ಚವನ್ನು ಹೊಂದಿರಲಿವೆ ಎಂದು ರಸ್ತೆ ಮತ್ತು ಸಾರಿಗೆ ಪ್ರಾಧಿಕಾರದ (ಆರ್‌ಟಿಎ) ಸಾರ್ವಜನಿಕ ಸಾರಿಗೆ ಸಂಸ್ಥೆಯ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಅಹ್ಮದ್ ಬಹ್ರೋಜ್ಯಾನ್ ಹೇಳಿದರು. "ಇದು ಸಾಮಾನ್ಯ ಉಬರ್‌ನ ಬೆಲೆಗಿಂತ ಹೆಚ್ಚು ದುಬಾರಿಯಾಗಿ ಇರುವುದಿಲ್ಲ. ಶ್ರೀಮಂತರಿಂದ ಹಿಡಿದು ಸಾಮಾನ್ಯ ಪ್ರಜೆಗಳು ಸೇರಿದಂತೆ ಎಲ್ಲರೂ ಬಳಸಬಹುದಾದ ಸಾಮಾನ್ಯ ಏರ್ ಟ್ಯಾಕ್ಸಿ ಸೇವೆಯಾಗಿ ಇರಲಿದೆ" ಎಂದು ಭರವಸೆ ನೀಡಿದರು.

ಅಂತಿಮವಾಗಿ ವಾಹನಗಳ ಉತ್ಪಾದನೆಯು ಹೆಚ್ಚಾದಂತೆ, ತಂತ್ರಜ್ಞಾನದ ವೆಚ್ಚವು ಕಡಿಮೆಯಾಗುತ್ತದೆ. ನಾವು ಹೆಚ್ಚು ಬೇಡಿಕೆಯನ್ನು ಪಡೆಯಲು ಪ್ರಯತ್ನಿಸುತ್ತಿದ್ದೇವೆ, ಮುಂಬರುವ ದಿನಗಳಲ್ಲಿ ನಗರದಲ್ಲಿ ವಾಸಿಸುವ ಅನೇಕ ಜನರಿಗೆ ಇದು ದಿನನಿತ್ಯದ ಸಾರಿಗೆ ವಿಧಾನವಾಗಿ ಪರಿಣಮಿಸುತ್ತದೆ. ಹಾಗೆಯೇ ಇದು ನಗರಗಳಲ್ಲಿನ ಟ್ರಾಫಿಕ್ ನಿಯಂತ್ರಣಕ್ಕೆ ಪರ್ಯಾಯವಾಗಲಿದೆ. ಸಾರ್ವಜನಿಕರ ಗಮ್ಯ ಸ್ಥಳಗಳನ್ನು ಇತರ ಸಾರಿಗೆಗಳಿಗಿಂತ ವೇಗವಾಗಿ ತಲುಪಬಹುದಾಗಿದ್ದು, ದುಬೈ ಭವಿಷ್ಯವು ಸಂಪೂರ್ಣ ಬದಲಾಗಲಿದೆ ಎಂದು ನಮಗೆ ವಿಶ್ವಾಸವಿದೆ ಎಂದರು.

ಹಾರುವ ಟ್ಯಾಕ್ಸಿಗಳು ಸುಮಾರು 240 ಕಿ.ಮೀ ವ್ಯಾಪ್ತಿ ಮತ್ತು 300 ಕಿ.ಮೀ ಗರಿಷ್ಟ ವೇಗವನ್ನು ಹೊಂದಿರುತ್ತವೆ. ಇದು ಬಹ್ರೋಜ್ಯಾನ್ ಅವರ ಪ್ರಕಾರ ದುಬೈನಿಂದ ಅಬುಧಾಬಿ ಮತ್ತು ದುಬೈನಿಂದ ಫುಜೈರಾದಿಂದ ಇಂಟರ್ಸಿಟಿ ಪ್ರಯಾಣಕ್ಕೆ ಸೀಮಿತವಾಗಿರುತ್ತದೆ. ಇವುಗಳು ಶೀಘ್ರದಲ್ಲೇ ನಿಜವಾದರೆ, ದುಬೈನಿಂದ ಅಬುಧಾಬಿಗೆ ಪ್ರಯಾಣದ ಸಮಯವನ್ನು 30 ನಿಮಿಷಗಳಿಗೆ ಕಡಿತಗೊಳಿಸಲಾಗುತ್ತದೆ. ಅಲ್ಲದೇ ಈ ಸಾರಿಗೆ ಯಶಸ್ವಿಯಾಗಿ ಮುನ್ನಡೆದರೆ ದುಬೈನ ಇತರ ನಗರಗಳಿಗೂ ಸೇವೆ ಒದಗಿಸುವ ಸಾಧ್ಯತೆಗಳಿವೆ.

ದುಬೈನಲ್ಲಿ ವಿಶ್ವದ ಮೊದಲ ಎಲೆಕ್ಟ್ರಿಕ್ ಫ್ಲೈಯಿಂಗ್ ಕಾರ್:
ಇತ್ತೀಚೆಗೆ ಚೀನಾದಲ್ಲಿ ತಯಾರಾದ ಹಾರುವ ಕಾರು ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ)ನ ಆಕಾಶದಲ್ಲಿ ಹಾರುತ್ತಾ ಭಾರೀ ಸದ್ದು ಮಾಡಿತ್ತು. ಚೀನಾದ Xpeng Inc ಕಂಪನಿ ತಯಾರಿಸಿರುವ ಈ X2 ಹೆಸರಿನ ಹಾರುವ ಕಾರನ್ನು ಶೀಘ್ರದಲ್ಲೇ ಮಾರುಕಟ್ಟೆಗೆ ಪರಿಚಯಿಸಲಿದೆ. ಯುಎಇಯ ದುಬೈ ನಗರದಲ್ಲಿ ಈ ಹಾರುವ ಕಾರು ಯಶಸ್ವಿಯಾಗಿ ಹಾರಾಟ ನಡೆಸಿದೆ. ಈ ಎಕ್ಸ್2 ಫ್ಲೈಯಿಂಗ್ ಕಾರನ್ನು ತಯಾರಿಸಿದ ಕಂಪನಿಯು ದುಬೈನಲ್ಲಿ ಮೊದಲು ತನ್ನ ಸೇವೆಯನ್ನು ಪ್ರಾರಂಭಿಸಲು ದುಬೈ ಚೇಂಬರ್ ಆಫ್ ಕಾಮರ್ಸ್‌ನೊಂದಿಗೆ ಒಪ್ಪಂದಕ್ಕೆ ಸಹಿ ಹಾಕಿದೆ.

ಒಪ್ಪಂದಂತೆ ದುಬೈನಲ್ಲಿ ಪರೀಕ್ಷಾರ್ಥ ಪ್ರಯೋಗ ನಡೆದಿದೆ. ಈ ಟೆಸ್ಟ್ ಈವೆಂಟ್‌ನಲ್ಲಿ ಹಾರುವ ಕಾರನ್ನು 90 ನಿಮಿಷಗಳ ಕಾಲ ಪರೀಕ್ಷಿಸಲಾಯಿತು. ಮಾನವ ರಹಿತ ಹಾರುವ ಕಾರಿನ ಪರೀಕ್ಷಾ ಮಾದರಿಯನ್ನು ಹಾರಾಟಕ್ಕೆ ಬಳಸಲಾಗಿದೆ. ಈ ಹಾರುವ ಕಾರನ್ನು VTOL ಎಂದು ಕರೆಯಲಾಗುವ ವರ್ಟಿಕಲ್ ಟೇಕ್ ಆಫ್ ಮತ್ತು ಲ್ಯಾಂಡಿಂಗ್ ತಂತ್ರಜ್ಞಾನದಲ್ಲಿ ನಿರ್ಮಿಸಲಾಗಿದೆ. ಈ ಹಾರುವ ಕಾರನ್ನು ಕಡಿಮೆ ದೂರವಿರುವ ಸ್ಥಳಕ್ಕೆ ಸಾಗಿಸಲು ಮತ್ತು ಸರಕುಗಳನ್ನು ಸಾಗಿಸಲು ಬಳಸಲಾಗುತ್ತದೆ. X2 ಹಾರುವ ಕಾರು ವಿಮಾನ ನಿಯಂತ್ರಣ ವ್ಯವಸ್ಥೆ ಮತ್ತು ಆಟೋಮ್ಯಾಟಿಕ್ ಹಾರಾಟದ ಸಾಮರ್ಥ್ಯಗಳನ್ನು ಹೊಂದಿದೆ.

ನೀವು ಈ ಹಾರುವ ಕಾರನ್ನು ಹತ್ತಲು ಬಯಸುವ ಸ್ಥಳವನ್ನು ಗುರುತಿಸಿದರೆ, ವಿಮಾನವು ಸ್ವಯಂಚಾಲಿತವಾಗಿ ಆ ಸ್ಥಳಕ್ಕೆ ಬರುತ್ತದೆ. ಈ ಹಾರುವ ಕಾರನ್ನು ಯಾರೂ ನಿಯಂತ್ರಿಸುವ ಅಗತ್ಯವಿಲ್ಲ. ಈ ಕಾರಿನಲ್ಲಿ ಏಕಕಾಲದಲ್ಲಿ ಇಬ್ಬರು ಪ್ರಯಾಣಿಸಬಹುದು. ಈ ವಿಮಾನವನ್ನು ಹಾರಿಸಲು ಒಟ್ಟು 8 ಪ್ರೊಪೆಲ್ಲರ್‌ಗಳನ್ನು ನೀಡಲಾಗಿದೆ. ಈ ವಿಮಾನವು ಪ್ರತಿ ಮೂಲೆಯಲ್ಲಿ 2 ಪ್ರೊಪೆಲ್ಲರ್‌ಗಳೊಂದಿಗೆ ಒಟ್ಟು 4 ಮೂಲೆಗಳಲ್ಲಿ 8 ಪ್ರೊಪೆಲ್ಲರ್‌ಗಳೊಂದಿಗೆ ಹಾರುತ್ತದೆ. ಗಂಟೆಗೆ 130 ಕಿ.ಮೀ ವೇಗದಲ್ಲಿ ಹಾರುವ ಸಾಮರ್ಥ್ಯ ಹೊಂದಿದೆ.