ನ್ಯಾನೋ 'ಡಬ್ಬಾ ಪೀಸ್' ಅಂದವರು ಇದನ್ಮೊಮ್ಮೆ ಓದಿ

ಹೌದು, ನಾವು ಮಾತನಾಡುತ್ತಿರುವುದು ನ್ಯಾನೋದ ಹೆಮ್ಮೆಯ ಮಾಲಿಕರಾಗಿರುವ ರವಿ ಕುಮಾರ್ ಕೆಎಸ್ ಅವರ ಬಗ್ಗೆ. ನ್ಯಾನೋ ಮೇಲಿನ ಅಪವಾದಗಳು ಸದಾ ಕಾಡುತ್ತಿರುವಂತೆಯೇ ತಮ್ಮ ಕುಟುಂಬದ ಜೊತೆಗೂಡಿ ದಕ್ಷಿಣ ಭಾರತ ಮೂರು ರಾಜ್ಯಗಳಲ್ಲಾಗಿ ಎಂಟು ದಿವಸಗಳ ಪರ್ಯಂತ ಬರೋಬ್ಬರಿ 1,960 ಕೀ.ಮೀ. ದೂರದ ಪ್ರವಾಸವನ್ನು ಕೈಗೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ.

ಉದ್ಯಾನ ನಗರಿ ಬೆಂಗಳೂರಿನಲ್ಲಿ ಉದ್ಯೋಗದಲ್ಲಿರುವ ರವಿ ಅವರು ಕರ್ನಾಟಕ ರಾಜಧಾನಿಯಿಂದಲೇ ತಮ್ಮ ಪಯಣ ಆರಂಭಿಸಿದ್ದರು. ಕೇರಳ, ಕರ್ನಾಟಕ ಸೇರಿದಂತೆ ತಮಿಳುನಾಡಿನ ಪ್ರಮುಖ ದೇವಾಸ್ಥಾನಗಳ ದರ್ಶನ ಪಡೆಯುವುದೇ ಇವರ ಹಾಗೂ ಕುಟುಂಬದ ಪ್ರಮುಖ ಉದ್ದೇಶವಾಗಿತ್ತು.

ದಕ್ಷಿಣ ಭಾರತದ ಸಂಸ್ಕೃತಿಯಲ್ಲಿ ದೇವಾಸ್ಥಾನಗಳ ಪಾತ್ರ ಮಹತ್ವದಾಗಿದೆ. ಇದರಂತೆ ತಮ್ಮ ಕುಟುಂಬದ ಜೊತೆಗೂಡಿ ನ್ಯಾನೋ ಕಾರಿನಲ್ಲಿ ಪಯಣ ಆರಂಭಿಸಿದ್ದರು. ಅಲ್ಲದೆ ತಮ್ಮ ನ್ಯಾನೋ ಸಾಮರ್ಥ್ಯವನ್ನು ಇಡೀ ದೇಶಕ್ಕೆ ಎತ್ತಿ ಹಿಡಿಯುವಲ್ಲಿ ಯಶಸ್ವಿಯಾಗಿದ್ದಾರೆ.

2011ನೇ ಇಸವಿಯ ನ್ಯಾನೋ ಎಲ್‌ಎಕ್ಸ್ ಮಾದರಿಯಲ್ಲಿ ರವಿ ತಮ್ಮ ಪಯಣ ಹಮ್ಮಿಕೊಂಡಿದ್ದರು. ಪ್ರವಾಸಕ್ಕೂ ಮೊದಲು ಈ ಕಾರು ಆಗಲೇ 27,143 ಕೀ.ಮೀ.ಗಳ ಪಯಣವನ್ನು ಕ್ರಮಿಸಿತ್ತು. ಹಾಗೆಯೇ ಗಂಟೆಗೆ 80ರಿಂದ 110 ಕೀ.ಮೀ. ವೇಗವನ್ನು ಕಾಯ್ದುಕೊಂಡಿರುವ ನ್ಯಾನೋ ಎಸಿಯಲ್ಲೂ ಪ್ರತಿ ಲೀಟರ್‌ಗೆ 21 ಕೀ.ಮೀ. ಮೈಲೇಜ್ ನೀಡುವಲ್ಲಿ ಯಶಸ್ವಿಯಾಗಿತ್ತು.

ನಿಮಗೆಲ್ಲರಿಗೂ ತಿಳಿದಿರುವ ಹಾಗೆಯೇ ನ್ಯಾನೋ ಕಡಿಮೆ ಎಂಜಿನ್ ಸಾಮರ್ಥ್ಯದ 624 ಸಿಸಿ ಟ್ವಿನ್ ಸಿಲಿಂಡರ್ ಫ್ಲೂಯಲ್ ಇಂಜೆಕ್ಟಡ್ ಫೋರ್ ಸಿಲಿಂಡರ್ ಎಂಜಿನ್ ಹೊಂದಿದೆ. ಹಾಗಿದ್ದರೂ ಕೇವಲ ನಗರ ಪ್ರದೇಶ ಮಾತ್ರವಲ್ಲದೆ ಹೆದ್ದಾರಿಯಲ್ಲೂ ಉತ್ತಮ ಚಾಲನಾ ಅನುಭವ ಕಾಯ್ದುಕೊಂಡಿದ್ದು, ಭಾರತೀಯ ರಸ್ತೆಗೆ ಹೇಳಿ ಮಾಡಿಸಿದಂತಿದೆ.

ಈ ವಿಶೇಷ ಪಯಣದಲ್ಲಿ ಇಬ್ಬರು ಮಕ್ಕಳು ಸೇರಿದಂತೆ ಒಟ್ಟು ಆರು ಮಂದಿ ಪಯಣಿಸಿದ್ದರು. ಚೊಕ್ಕ ಕಾರಾಗಿರುವ ಹೊರತಾಗಿಯೂ ಉತ್ತಮ ಕ್ಯಾಬಿನ್ ಸ್ಥಳಾವಕಾಶವನ್ನು ಹೊಂದಿರುವುದು ಇದರಿಂದಲೇ ಖಚಿತವಾಗಿದೆ. ರವಿ ಪ್ರಕಾರ ಎಸಿ ನಿರ್ವಹಣೆ ಸಹ ಮೆಚ್ಚುಗೆಗೆ ಪಾತ್ರವಾಗಿದೆ.

ಇಲ್ಲಿ ಗಮನಾರ್ಹ ಸಂಗತಿ ಏನೆಂದರೆ ರವಿ ಇದೇ ಮೊದಲ ಬಾರಿಯೇನಲ್ಲ ತಮ್ಮ ನೆಚ್ಚಿನ ನ್ಯಾನೋ ಕಾರಿನಲ್ಲಿ ದೂರ ಪ್ರಯಾಣ ಹಮ್ಮಿಕೊಳ್ಳುತ್ತಿರುವುದು. ಇದಕ್ಕೂ ಮೊದಲು ಕರ್ನಾಟಕದ ಹೆಸರಾಂತ ಕಾರ್ಣಿಕ ಕ್ಷೇತ್ರಗಳಾದ ಧರ್ಮಸ್ಥಳ, ಕುಕ್ಕೆ ಸುಬ್ರಹ್ಮಣ್ಯ, ಕೊಲ್ಲೂರು, ಶ್ರೀಂಗೇರಿ, ಉಡುಪಿ ಹಾಗೂ ಮುರುಡೇಶ್ವರಕ್ಕೆ ಪಯಣ ಬೆಳೆಸಿದ್ದರು. ತದಾ ಬಳಿಕ ಮಹಾನದಿ, ಶ್ರೀಶೈಲಂ ಹಾಗೂ ಹೈದಾರಾಬಾದ್ ಮತ್ತು ಮೂರನೇ ಬಾರಿ ಪಾಂಡಿಚೇರಿ ಪ್ರವಾಸ ಹಮ್ಮಿಕೊಂಡಿದ್ದರು.

ಸದ್ಯ ಟಾಟಾ ನ್ಯಾನೋದ ಹೆಮ್ಮೆಯ ಮಾಲಿಕರಾಗಿರುವ ರವಿ, ತಮ್ಮ ಕಾರಿನ ನಿರ್ವಹಣೆ ಬಗ್ಗೆ ಸಂಪೂರ್ಣ ಸಂತೃಪ್ತಿಯನ್ನು ಹೊಂದಿದ್ದಾರೆ. ಅಲ್ಲದೆ ತನ್ನೆಲ್ಲ ಬಯಕೆಗಳನ್ನು ನ್ಯಾನೋ ಕಾರು ಪೂರೈಸಿದೆ ಎಂದು ಬಹಳ ಅಭಿಮಾನಿದಿಂದಲೇ ಹೇಳಿಕೊಳ್ಳುತ್ತಿದ್ದಾರೆ.