ಸಾಲು ಗಟ್ಟಿ ನಿಂತ ಕಾರುಗಳು, ಇದು ಟ್ರಾಫಿಕ್ ಜಾಮ್ ಅಲ್ಲ, ಮತ್ತೇನಿದು?

ಬಲ್ಗೇರಿಯಾದ ಫೋರ್ಡ್ ಮಾಲಿಕರ ಅಭಿಮಾನಿಗಳ ಬಳಗವು ಒಟ್ಟು ಸೇರಿ 'ವಿಶ್ವದಲ್ಲೇ ಫೋರ್ಡ್ ವಾಹನಗಳ ದೀರ್ಘ ಸಾಲು' (longest queue of Ford vehicles in the world) ಎಂಬ ಗಿನ್ನೆಸ್ ದಾಖಲೆಯನ್ನು ಸ್ಥಾಪಿಸಿದ್ದಾರೆ.

ಈ ವಿನೂತನ ದಾಖಲೆಗಾಗಿ 2016 ಜೂನ್ 4ರಂದು ಬ್ಲೂ ಓವಲ್ ಬ್ಯಾಡ್ಜ್ ಹೆದ್ದಾರಿಯಲ್ಲಿ 3.2 ಕೀ.ಮೀ. ಉದ್ದದ ಹಾದಿಯನ್ನು ಒಟ್ಟು 1527 ವಾಹನಗಳು ದಾಟಿ ಬಂದಿದ್ದವು.

ಆಯೋಜಕರ ಪ್ರಕಾರ ನಿಜವಾಗಿಯೂ 2300ರಷ್ಟು ಫೋರ್ಡ್ ವಾಹನಗಳಿದ್ದವು. ಆದರೆ ಇವುಗಳಲ್ಲಿ ಕೆಲವೊಂದು ಕ್ಯಾರಾವನ್ ಆಗಿರುವುದರಿಂದ ಗಿನ್ನೆಸ್ ಅಧಿಕೃತರ ಮನ್ನಣೆಗೆ ಪಾತ್ರವಾಗಿರಲಿಲ್ಲ.

ಈ ಎಲ್ಲ ಫೋರ್ಡ್ ಕಾರುಗಳು ಸರಿ ಸುಮಾರು 20 ಕೀ.ಮೀ. ದೂರದ ವರೆಗೂ ಸಾಲು ಗಟ್ಟಿ ನಿಂತಿದ್ದವು ಎಂದು ಅಧಿಕೃತರು ತಿಳಿಸಿದ್ದಾರೆ.

ಫೋರ್ಡ್ ನ ಅತ್ಯಂತ ಜನಪ್ರಿಯ ಫಿಯೆಸ್ಟಾದಿಂದ ಹಿಡಿದು, ಫೋಕಸ್, ಮೊಂಡೆಯೊ, ಟೌನಸ್, ಪ್ರೋಬ್, ಮರ್ಕ್ಯೂರಿ, ಗ್ರಾನಡ, ಮೆವರಿಕ್, ಕೌಗಾರ್, ಥಂಡರ್ ಬರ್ಡ್, ಕೋಬ್ರಾ ಸೇರಿದಂತೆ 1930ರ ದಶಕದ ಕ್ಲಾಸಿಕ್ ಮಾಡೆಲ್ ಎ ಸಹ ಸೇರಿದ್ದವು.

2014ರಲ್ಲಿ ಉತ್ತರ ಅಮೆರಿಕದಲ್ಲಿ 829 ಫೋರ್ಡ್ ವಾಹನಗಳು ಸಾಲು ಗಟ್ಟಿ ನಿಂತಿರುವುದು ಇದುವರೆಗಿನ ದಾಖಲಾಗಿತ್ತು. ಈಗ ಈ ದಾಖಲೆಯನ್ನು ಮುರಿಯುವಲ್ಲಿ ಯಶಸ್ವಿಯಾಗಿದೆ.

ಇನ್ನು ಇತರೆ ಬ್ರಾಂಡ್ ಗಳತ್ತ ಕಣ್ಣಾಯಿಸಿದರೆ 2015ರಲ್ಲಿ ಅಮೆರಿಕದಲ್ಲಿ 2420 ಜೀಪ್ ಮಾದರಿಗಳು, 2015ರಲ್ಲಿ 742ರಷ್ಟು ಟೊಯೊಟಾ ವಾಹನಗಳು, 2008ರಲ್ಲಿ 2325ರಷ್ಟು ಪೋರ್ಷೆ ಕಾರುಗಳು, 2009ರಲ್ಲಿ 1450ರಷ್ಟು ಮಿನಿ ಕಾರುಗಳು ಮತ್ತು 2006ರಲ್ಲಿ 500ರಷ್ಟು ಫಿಯೆಟ್ ಕಾರುಗಳು ಇದೇ ರೀತಿ ಹೆದ್ದಾರಿಯಲ್ಲಿ ಸಾಲು ಗಟ್ಟಿ ನಿಂತು ದಾಖಲೆ ಸ್ಥಾಪಿಸಿದ್ದವು.