ಮುಂಬೈ-ಅಹಮಾದಾಬಾದ್ ಬುಲೆಟ್ ರೈಲು ಮುಹೂರ್ತ ಫಿಕ್ಸ್

By Nagaraja

Updated: Thursday, December 10, 2015, 11:05 [IST]

ದೇಶದ ಅತ್ಯಂತ ವೇಗದ ಬುಲೆಟ್ ರೈಲು ಓಡಾಟಕ್ಕೆ ಕಾಲ ಹತ್ತಿರವಾಗಿದೆ. ಮುಂಬೈ-ಅಹಮದಾಬಾದ್ ನಗರಗಳ ನಡುವೆ ಸಂಪರ್ಕ ಕಲ್ಪಿಸುವ ದೇಶದ ಮಹತ್ತರ ಬುಲೆಟ್ ರೈಲು ಯೋಜನೆಗೆ ಸದ್ಯದಲ್ಲೇ ಮುಹೂರ್ತ ಫಿಕ್ಸ್ ಆಗಲಿದೆ.

Also Read: ಜಪಾನ್ ಹೈ ಸ್ಪೀಡ್ ರೈಲು ಭಾರತಕ್ಕೆ ಬರುತ್ತಾ?

ಮುಂದಿನ ವಾರದಲ್ಲಿ ಭಾರತಕ್ಕೆ ಭೇಟಿ ಕೊಡಲಿರುವ ಜಪಾನ್ ಪ್ರಧಾನ ಮಂತ್ರಿ ಶಿನ್ಜೊ ಅಬೆ ಜೊತೆ ಭಾರತ, ಹೈ-ಸ್ಪೀಡ್ ರೈಲು ಯೋಜನೆಗೆ ಸಹಿ ಮಾಡುವ ಎಲ್ಲ ಸಾಧ್ಯತೆಗಳು ನಿಚ್ಚಳವಾಗಿದೆ ಎಂದು ಸರಕಾರ ಮೂಲದ ಹಿರಿಯ ಅಧಿಕಾರಿಗಳು ತಿಳಿಸಿದ್ದಾರೆ.

ಜಪಾನ್‌ನಲ್ಲಿ ಶಿಂಕಾನ್ಸೆನ್ ಎಂದು ಅರಿಯಲ್ಪಡುವ ಬುಲೆಟ್ ಟ್ರೇನ್‌ಗಳು ಭಾರತದ ದೀರ್ಘ ಕಾಲದ ಯೋಜನೆಯಾಗಿದೆ. ಈ ಸಂಬಂಧ ಜಪಾನ್ ಅಧಿಕಾರಿಗಳು ಪ್ರಧಾನ ಮಂತ್ರಿ ಕಾರ್ಯಾಲಯ ಹಾಗೂ ರೈಲ್ವೇ ಸಚಿವಾಲಯದ ಜೊತೆ ನಿರಂತರ ಸಂಪರ್ಕದಲ್ಲಿದೆ.

ಇದರೊಂದಿಗೆ ಮುಂಬೈ-ಅಹಮದಾಬಾದ್ ನಡುವಣ ಪ್ರಯಾಣ ಅವಧಿ ಏಳು ತಾಸಿನಿಂದ ಬರಿ ಎರಡು ಗಂಟೆಗಳಿಗೆ ಇಳಿಕೆಯಾಗಲಿದೆ.

ಭಾರತದ ಈ ಮಹತ್ತರ ಯೋಜನೆಗೆ ಜಪಾನ್ ಆರ್ಥಿಕ ಸಹಾಯಹಸ್ತವನ್ನು ಚಾಚಿದ್ದು, 0.5 ಬಡ್ಡಿದರಗಳಲ್ಲಿ ಬರೋಬ್ಬರಿ 90,000 ಕೋಟಿ ರು.ಗಳ ಹಣಕಾಸು ನೆರವನ್ನು ಮಾಡಲಿದೆ. ಇದನ್ನು 50 ವರ್ಷಗಳ ಕಾಲಾವಧಿಯಲ್ಲಿ ಮರು ಪಾವತಿ ಮಾಡಬೇಕಿದೆ. ಈ ವಿಶೇಷ ಸವಲತ್ತನ್ನು ಭಾರತಕ್ಕೆ ಮಾತ್ರ ನೀಡುತ್ತಿದೆ.

ಜಪಾನ್ ಅಂತರಾಷ್ಟ್ರೀಯ ಸಹಕಾರ ಏಜೆನ್ಸಿಯು (ಜೆಐಸಿಎ) ಈಗಾಗಲೇ 505 ಕೀ.ಮೀ. ಉದ್ದದ ಮುಂಬೈ-ಅಹಮದಾಬಾದ್ ಬುಲೆಟ್ ರೈಲು ಯೋಜನೆಯ ಬಗ್ಗೆ ಅಧ್ಯಯನ ನಡೆಸಿದ್ದು, ತಾಂತ್ರಿಕವಾಗಿಯೂ ಆರ್ಥಿಕವಾಗಿಯೂ ಈ ಯೋಜನೆ ಸಾಧ್ಯ ಎಂದು ಹಸಿರು ಬಾವುಟವನ್ನು ತೋರಿಸಿದೆ.

ಈ ಯೋಜನೆಯಂತೆ ಬುಲೆಟ್ ರೈಲುಗಳು ಗಂಟೆಗೆ 300 ಕೀ.ಮೀ. ವೇಗದಲ್ಲಿ ಸಂಚರಿಸಲಿದೆ. ಪ್ರಾಥಮಿಕ ಅಂಕಿಅಂಶಗಳ ಪ್ರಕಾರ ಇದರ ನಿರ್ಮಾಣಕ್ಕೆ 98,805 ಕೋಟಿ ರು. ಅಂದಾಜಿಸಲಾಗಿದ್ದು, 2024ರಲ್ಲಿ ಯೋಜನೆ ಪೂರ್ಣಗೊಳ್ಳಲಿದೆ.