ಹೀರೋ ಮೊಟೊಕಾರ್ಪ್ ಮಾರಾಟದಲ್ಲೂ ಹೀರೋ

ಕಂಪನಿಯು ಕಳೆದ ತಿಂಗಳು ಸುಮಾರು 5,49,625 ದ್ವಿಚಕ್ರ ವಾಹನ ಮಾರಾಟ ಮಾಡಿದ್ದು, ಕಳೆದ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಶೇಕಡ 26.75ರಷ್ಟು ಏರಿಕೆ ದಾಖಲಿಸಿದೆ. ಕಂಪನಿಯು ಕಳೆದ ವರ್ಷದ ಸೆಪ್ಟೆಂಬರ್ ಅವಧಿಯಲ್ಲಿ 4,33,641 ಯುನಿಟ್ ಮಾರಾಟ ಮಾಡಿತ್ತು.

"ನಾವು ಮೊದಲ ಬಾರಿಗೆ ಅತ್ಯಧಿಕ ತಿಂಗಳ ಮಾರಾಟಕ್ಕೆ ಸಾಕ್ಷಿಯಾಗಿದ್ದೇವೆ" ಎಂದು ಕಂಪನಿ ಪ್ರಕಟಣೆಯಲ್ಲಿ ತಿಳಿಸಿದೆ. ಜುಲೈನಿಂದ ಸೆಪ್ಟೆಂಬರ್ ವರೆಗೆ ಒಟ್ಟಾರೆ 15,44,315 ದ್ವಿಚಕ್ರ ವಾಹನ ಮಾರಾಟ ಮಾಡಿದೆ. ಕಳೆದ ವರ್ಷದ ಇದೇ ಅವಧಿಯ 12,85,944 ಯುನಿಟ್ ಮಾರಾಟಕ್ಕೆ ಹೋಲಿಸಿದರೆ ಇದು ಶೇಕಡ 20.09ರಷ್ಟು ಏರಿಕೆ ಕಂಡಿದೆ.

ಸದ್ಯ ಹಬ್ಬದ ಸೀಸನ್ ಹತ್ತಿರವಿರುವುದರಿಂದ ಮುಂಬರುವ ತಿಂಗಳುಗಳಲ್ಲಿಯೂ ಅತ್ಯಧಿಕ ಮಾರಾಟ ಮಾಡುವ ನಿರೀಕ್ಷೆಯನ್ನು ಕಂಪನಿ ವ್ಯಕ್ತಪಡಿಸಿದೆ. ಕಂಪನಿ ಕೆಲವು ತಿಂಗಳ ಹಿಂದೆ ಹೊಸ ಬ್ರಾಂಡ್ ಹೆಸರು, ಐಡೆಂಟೆಟಿ ಪ್ರಕಟಿಸಿತ್ತು. ಹೊಸ ಹೆಸರು ಕಂಪನಿಗೆ ಶುಭ ತಂದಿದೆ ಎಂದುಕೊಳ್ಳಬಹುದು.