ರೆನೆಗೇಡ್ ಕಮ್ಯಾಂಡೊ ಮೊಜಾವೆ ಮತ್ತು ರೆನೆಗೇಡ್ ಕಮ್ಯಾಂಡೊ ಕ್ಲಾಸಿಕ್ ಬೈಕುಗಳು ಬೆಂಗಳೂರಿನಲ್ಲಿ ಬಿಡುಗಡೆ

ಯುಎಸ್ ಮೂಲದ ಯುಎಂ ಇಂಟರ್‌ನ್ಯಾಷನಲ್ ಎಲ್‍ಎಲ್‍ಸಿಯ ಕಂಪನಿಯ ಅಂಗ ಸಂಸ್ಥೆಯಾದ ಯುಎಂ ಲೋಹಿಯಾ ದ್ವಿಚಕ್ರ ವಾಹನ ತಯಾರಕ ಸಂಸ್ಥೆಯು ತನ್ನ ರೆನೆಗೇಡ್ ಕಮ್ಯಾಂಡೊ ಮೊಜಾವೆ ಮತ್ತು ರೆನೆಗೇಡ್ ಕಮ್ಯಾಂಡೊ ಕ್ಲಾಸಿಕ್ ಬೈಕುಗಳನ್ನು ಭಾರತದಲ್ಲಿ ಬಿಡುಗಡೆಗೊಳಿಸಿದೆ.

ರೆನೆಗೇಡ್ ಕ್ಲಾಸಿಕ್ ಮೋಟರ್ ಸೈಕಲ್ ಬೆಂಗಳೂರಿನಲ್ಲಿ ರೂ.1.93 ಲಕ್ಷ (ಎಕ್ಸ್-ಶೋರೂಂ) ಬೆಲೆ ಮತ್ತು ರೆನೆಗೇಡ್ ಕಮ್ಯಾಂಡೊ ಮೊಜಾವೆ ಬೈಕ್ ರೂ. 1.85 ಲಕ್ಷ (ಎಕ್ಸ್-ಶೋರೂಂ, ಬೆಂಗಳೂರು) ಬೆಲೆಯಲ್ಲಿ ಲಭ್ಯವಿದೆ.

ವೈವಿಧ್ಯತೆಯನ್ನು ಪಡೆದುಕೊಂಡು ಪರಿಪೂರ್ಣವಾಗಿ ಬಿಡುಗಡೆಯಾಗಿರುವ ಹೊಸ ಕ್ರಾಂತಿಕಾರಿ ರೆನೆಗೇಡ್ ಕಮ್ಯಾಂಡೊ ಮೊಜಾವೆ ಮತ್ತು ರೆನೆಗೇಡ್ ಕಮ್ಯಾಂಡೊ ಕ್ಲಾಸಿಕ್‍ಗಳು ಸಿಂಗಲ್ ಸಿಲಿಂಡರ್ ಲಿಕ್ವಿಡ್ ಕೂಲ್ಡ್ ಎಂಜಿನ್ ಪಡೆದುಕೊಂಡಿವೆ.

ಈ ಎರಡೂ ಬೈಕುಗಳು ಎಲೆಕ್ಟ್ರಿಕ್ ಸ್ಟಾರ್ಟ್ ಸೌಲಭ್ಯವನ್ನು ಪಡೆದುಕೊಂಡಿದ್ದು, ಪೇಪರ್ ಎಲಿಮೆಂಟ್ ಇನೊವೇಷನ್‍ನೊಂದಿಗೆ ಏರ್ ಫಿಲ್ಟರ್ ತಂತ್ರಜ್ಞಾನ ನಾವು ನೋಡಬಹುದಾಗಿದೆ ಹಾಗು ಸುಲಭ ಚಾಲನೆಗೆ ಸಿಕ್ಸ್-ಸ್ಪೀಡ್ ಸಿಂಕ್ರನೈಸ್ಡ್ ಮೆಷ್ ಓವರೈಡ್‌ ಸೇರ್ಪಡೆ ಮಾಡಲಾಗಿದೆ ಎಂದು ಕಂಪನಿ ತಿಳಿಸಿದೆ.

ಬೈಕುಗಳನ್ನು ಬಿಡುಗಡೆಗೊಳಿಸಿ ಮಾತನಾಡಿದ ಯುಎಂ ಇಂಡಿಯಾದ ನಿರ್ದೇಶಕ ಜೋಸ್ ವಿಲೆಗಸ್ "ಯುವ ಜನತೆಯನ್ನು ಉದ್ದೇಶದಲ್ಲಿಟ್ಟುಕೊಂಡು ಈ ವಾಹನಗಳ ಬಿಡುಗಡೆ ಮಾಡಲಾಗಿದ್ದು, ನಮ್ಮ ಉತ್ಪನ್ನಗಳಲ್ಲಿ ಮಾತ್ರವಲ್ಲ, ಸೇವಾ ಅನುಭವದಲ್ಲೂ ಶ್ರೇಷ್ಠತೆಯ ನೀಡುವ ಮೂಲಕ ಹೊಸ ಮೈಲಿಗಲ್ಲು ಸೃಷ್ಟಿಸಲು ಬದ್ಧರಾಗಿದ್ದೇವೆ" ಎಂದು ತಿಳಿಸಿದರು.

ರೆನೆಗೇಡ್ ಕಮ್ಯಾಂಡೊ ಮೊಜಾವೆ ಮತ್ತು ರೆನೆಗೇಡ್ ಕಮ್ಯಾಂಡೊ ಕ್ಲಾಸಿಕ್ ಬೈಕುಗಳು 279.5 ಸಿಸಿ ಸಿಂಗಲ್ ಸಿಲಿಂಡರ್ ಲಿಕ್ವಿಡ್-ಕೂಲ್ಡ್ ಇಎಫ್‍ಎಐ ಎಂಜಿನ್ ಹೊಂದಿದ್ದು, 23 ಎನ್‍ಎಂ ತಿರುಗುಬಲದಲ್ಲಿ 25ರಷ್ಟು ಅಶ್ವಶಕ್ತಿ ಉತ್ಪಾದನೆ ಮಾಡಲಿದೆ. 6-ಸ್ಪೀಡ್ ಟ್ರಾನ್ಸ್‌ಮಿಷನ್ ಗೇರ್‌ಬಾಕ್ಸ್ ಆಯ್ಕೆ ನೋಡಬಹುದಾಗಿದೆ.