ಪೆಟ್ರೋಲ್ ದರ ಹೆಚ್ಚಳ: ಡೀಸೆಲ್ ಬಳಸುವಿರಾ? ಎಚ್ಚರ!!

"ಸರಕಾರ ಮತ್ತೆ ಪೆಟ್ರೋಲ್ ದರ ಹೆಚ್ಚಿಸಿದೆ. ಸಹಜವಾಗಿಯೇ ಡೀಸೆಲ್ ಬಳಕೆ ಹೆಚ್ಚಳಿದೆ. ಆದರೆ ಇದರಿಂದ ಸಾರ್ವಜನಿಕ ಆರೋಗ್ಯದ ಮೇಲೆ ಉಂಟಾಗುವ ಪರಿಣಾಮವನ್ನು ಸರಕಾರ ಮರೆತಿದೆ. ಇದು ಓಝೋನ್ ಪದರಕ್ಕೂ ಹಾನಿ ಉಂಟು ಮಾಡಲಿದೆ" ಎಂದು ಸಿಎಸ್ಇ ವಾಯುಮಾಲಿನ್ಯ ವಿಭಾಗದ ನಿರ್ದೇಶಕಿ ಅನುಮಿತ ರಾಯ್ ಚೌಧರಿ ಅಭಿಪ್ರಾಯಪಟ್ಟಿದ್ದಾರೆ.

ಮೂರು ತಿಂಗಳ ನಂತರ ಸರಕಾರವು ಪೆಟ್ರೊಲ್ ದರಗಳನ್ನು 3.14 ರುಪಾಯಿಯಷ್ಟು ಹೆಚ್ಚಿಸಿದೆ. ಇದರಿಂದ ಬೆಂಗಳೂರಿನಲ್ಲಿ ಪೆಟ್ರೋಲ್ ದರ 74 ರು. ದಾಟಿದೆ. ಇದೀಗ ದೇಶದ ಒಟ್ಟಾರೆ ಕಾರು ಮಾರುಕಟ್ಟೆಯಲ್ಲಿ ಡೀಸೆಲ್ ಕಾರು ಮಾರಾಟ ಶೇಕಡ 36ರಷ್ಟಿದೆ. ಶೀಘ್ರದಲ್ಲಿ ಇದು ಶೇ. 50ಕ್ಕೆ ತಲುಪುವ ನಿರೀಕ್ಷೆಯಿದೆ.

"ಈಗಾಗಲೇ ಡೀಸೆಲ್ ಕಾರುಗಳ ಪಾಲು ರಸ್ತೆಯಲ್ಲಿ ಹೆಚ್ಚಿದೆ. ಅಗ್ಗದ ಡೀಸೆಲ್ ಕಾರು ಸಾರ್ವಜನಿಕ ಆರೋಗ್ಯ ಮಾತ್ರವಲ್ಲದೇ ಹಲವು ವ್ಯತಿರಿಕ್ತ ಪರಿಣಾಮ ಬೀರಲಿದೆ" ಎಂದು ಅವರು ಹೇಳಿದ್ದಾರೆ.

ದೇಶದ ಒಟ್ಟಾರೆ ಡೀಸೆಲ್ ನಲ್ಲಿ ಶೇಕಡ 15ರಷ್ಟನ್ನು ಕಾರುಗಳು ಬಳಸುತ್ತಿವೆ. ಬಸ್ ಮತ್ತು ಕೃಷಿಗೆ ಬಳಸುವ ಡೀಸೆಲ್ ಪ್ರಮಾಣ ಶೇಕಡ 12ರಷ್ಟು, ಉದ್ಯಮಗಳಿಗೆ ಮತ್ತು ರೈಲ್ವೆಗೆ ತಲಾ ಶೇಕಡ 6ರಷ್ಟು ಡೀಸೆಲ್ ಬಳಸಲಾಗುತ್ತದೆ. ಇಲ್ಲಿ ಕಾರುಗಳು ಹೆಚ್ಚು ಡೀಸೆಲ್ ಬಳಕೆ ಮಾಡುವುದು ಆತಂಕ ತರುವ ವಿಷಯವಾಗಿದೆ" ಎಂದು ಸಿಎಸ್ಇ ಆತಂಕ ವ್ಯಕ್ತಪಡಿಸಿದೆ.