ಫೋರ್ಡ್ ಇಕೊಸ್ಪೋರ್ಟ್: SUV ಮಾರುಕಟ್ಟೆಯಲ್ಲಿ ಬಿರುಗಾಳಿ

ಫೋರ್ಡ್ ಕಂಪನಿಯು ಇತ್ತೀಚೆಗೆ ದೆಹಲಿ ವಾಹನ ಜಾತ್ರೆಯಲ್ಲಿ ಇಕೊಸ್ಪೋರ್ಟ್ ಎಂಬ ಸಣ್ಣ ಸ್ಪೋರ್ಟ್ ಯುಟಿಲಿಟಿ ವೆಹಿಕಲ್ ಅನಾವರಣ ಮಾಡಿತ್ತು. ಇದು ಜಾಗತಿಕ ಕಾರು ಪ್ಲಾಟ್ ಫಾರ್ಮ್ ನಲ್ಲಿ ಬಂದಿರುವ ಕಂಪನಿಯ ಎರಡನೇ ಕಾರು. ಈ ಕಾರನ್ನು ಭಾರತ ಮತ್ತು ಬ್ರೆಝಿಲ್ ಮುಂತಾದ ಅಭಿವೃದ್ಧಿ ಹೊಂದುತ್ತಿರುವ ರಾಷ್ಟ್ರಗಳಿಗಾಗಿ ಕಂಪನಿ ವಿಶೇಷವಾಗಿ ವಿನ್ಯಾಸ ಮಾಡಿದೆ. ಇದು ಲೈಫ್ ಸ್ಟೈಲ್ ಸ್ಪೋರ್ಟ್ ಯುಟಿಲಿಟಿ ವೆಹಿಕಲ್.

ಫಿಯೆಸ್ಟಾ ಸೆಡಾನ್ ಕಾರು ಪ್ಲಾಟ್ ಫಾರ್ಮ್ ನಲ್ಲಿಯೇ ನೂತನ ಕಾರನ್ನು ಅಭಿವೃದ್ಧಿಪಡಿಸಲಾಗಿದೆ. ಆದರೆ ವಿನ್ಯಾಸ, ಕಾರ್ಯಕ್ಷಮತೆ ಮತ್ತು ಪರ್ಸನಾಲಿಟಿ ವಿಷ್ಯದಲ್ಲಿ ಇವೆರಡು ಕಾರುಗಳ ನಡುವೆ ಸಾಕಷ್ಟು ಭಿನ್ನತೆ ಇದೆ. ಇಕೊಸ್ಪೋರ್ಟ್ ಕಾರನ್ನು ಕೇವಲ ಡೀಸೆಲ್ ಎಂಜಿನ್ ಆಯ್ಕೆಯಲ್ಲಿ, ಅಡ್ವಾನ್ಸ್ ಟೆಕ್ನಾಲಜಿಯಲ್ಲಿ ಹೊರತರಲಾಗಿದೆ.

ನೂತನ ಇಕೊಸ್ಪೋರ್ಟ್ ಕಾರು ಟರ್ಬೊಚಾರ್ಜ್ ಮತ್ತು ಡೈರೆಕ್ಟ್ ಇಂಜೆಕ್ಷನ್ ಟೆಕ್ನಾಲಜಿಸ್ ಮೂಲಕ ಬಂದಿದೆ. ಇದು ಶೇಕಡ 20ರಷ್ಟು ಕಡಿಮೆ ಇಂಧನ ಬಳಕೆ ಮಾಡುತ್ತದೆ. ಹಳೆಯ 1.6 ಲೀಟರಿನ ಪೆಟ್ರೋಲ್ ಎಂಜಿನಿನಷ್ಟೇ ಪವರ್ ನೀಡುವ ಡೀಸೆಲ್ ಎಂಜಿನ್ ಇದಾಗಿದೆ ಎಂದು ಕಂಪನಿ ಹೇಳಿದೆ.

ನೂತನ ಇಕೊಸ್ಪೋರ್ಟ್ ದರ ಫಿಯೆಸ್ಟ್ ದರದ ಆಸುಪಾಸಿನಲ್ಲಿರಲಿದೆ. ಇಕೊಸ್ಪೋರ್ಟ್ ಕಾರಿನ ದರ ಸುಮಾರು 10 ಲಕ್ಷ ರು. ಆಸುಪಾಸಿನಲ್ಲಿರುವ ನಿರೀಕ್ಷೆಯನ್ನು ಮೂಲಗಳು ವ್ಯಕ್ತಪಡಿಸಿವೆ. ಹೊಸ ಇಕೊಸ್ಪೋರ್ಟ್ ಕಾರು ನಾಲ್ಕುಮೀಟರಿಗಿಂತ ಕಡಿಮೆ ಉದ್ದದ ಕೆಟಗರಿಯಲ್ಲಿ ಬಂದಿದೆ. ನಾಲ್ಕು ಮೀಟರಿಗಿಂತ ಕಡಿಮೆ ಉದ್ದದ ಕಾರುಗಳಿಗೆ ಕಡಿಮೆ ಸುಂಕವಿರುವುದರಿಂದ ದರ ಕಡಿಮೆ ಇರುವ ನಿರೀಕ್ಷೆಯಿದೆ.