'ಕ್ಯಾಮ್ರಿ ಹೈಬ್ರಿಡ್' ಕಾರಿನ ಮಾರಾಟ ನಿಲ್ಲಿಸಿದ ಟೊಯೊಟಾ !! ಕಾರಣ ತಿಳ್ಕೊಳಿ

ಕಳೆದ ವರ್ಷದ ಇದೇ ಅವಧಿಗೆ ಹೋಲಿಸಿದರೆ, ಕಳೆದ ಮೂರು ತಿಂಗಳುಗಳಲ್ಲಿ ಕ್ಯಾಮ್ರಿ ಹೈಬ್ರಿಡ್ ಸೆಡಾನ್ ಕಾರಿನ ಮಾರಾಟವು ಶೇಕಡಾ 73%ರಷ್ಟು ಇಳಿಕೆ ಕಂಡಿದೆ. ಕ್ಯಾಮ್ರಿ ಹೈಬ್ರಿಡ್ ಮಾರಾಟ ಸ್ಥಗಿತಗೊಳಿಸಿದ ನಂತರ ಉತ್ಪಾದನಾ ಘಟಕವನ್ನು ಕ್ಯಾಮ್ರಿ ಪೆಟ್ರೋಲ್(ಹೈಬ್ರಿಡ್ ಅಲ್ಲದ ಆವೃತ್ತಿ)ಯನ್ನು ನಿರ್ಮಿಸಲು ಉಪಯೋಗಿಸಲಿದೆ.

ಹೈಬ್ರಿಡ್ ಕಾರುಗಳ ಮೇಲೆ ಈ ಹಿಂದಿನ ತೆರಿಗೆ ರಚನೆಯು ಕೇವಲ 30%(12.5% ಅಬಕಾರಿ ಸುಂಕ + 14.5% ವ್ಯಾಟ್ ಮತ್ತು 1% ಎನ್‌ಸಿಸಿಡಿ)ಇತ್ತು. ಈ ತೆರಿಗೆ ನೀತಿಯಿಂದಾಗಿ ಹೈಬ್ರಿಡ್ ಕಾರುಗಳನ್ನು ಮಾರಾಟ ಮಾಡಲು ಕಂಪನಿಗಳಿಗೆ ಹೆಚ್ಚು ಅವಕಾಶವಿತ್ತು ಎನ್ನಬಹುದು.

ಆದರೆ, ಸದ್ಯ ಹೈಬ್ರಿಡ್ ಕಾರುಗಳ ಮೇಲೆ ಸರ್ಕಾರ ಶೇಕಡಾ 48%(28% ಜಿಎಸ್‌ಟಿ + 15% ಸೆಸ್) ಸುಂಕ ಹೇರಿಕೆ ಮಾಡಲು ನಿರ್ಧಾರ ತೆಗೆದುಕೊಂಡಿದ್ದು, ಇದರಿಂದಾಗಿ ಹೈಬ್ರಿಡ್ ಕಾರುಗಳ ಮಾರಾಟದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಿರಿರುವುದಂತೂ ಖಂಡಿತ.

ಈ ಮೊದಲು ಟೊಯೊಟಾ ಸಂಸ್ಥೆಯ ಪೆಟ್ರೋಲ್ ಆವೃತಿಗೆ ಹೋಲಿಕೆ ಮಾಡಿದರೆ ಕ್ಯಾಮ್ರಿ ಹೈಬ್ರಿಡ್ ಕಾರಿನ ಬೆಲೆ ರೂ.1.3 ಲಕ್ಷ ಬೆಲೆ ಹೆಚ್ಚಿಗೆ ಇತ್ತು. ಆದರೆ ಈ ಕಾರುಗಳ ವ್ಯತ್ಯಾಸ ಸದ್ಯ ರೂ.7.5 ಲಕ್ಷವಿದೆ. ಇದರಿಂದಾಗಿ ಹೈಬ್ರಿಡ್ ಕಾರುಗಳ ಬದಲಾಗಿ ಪೆಟ್ರೋಲ್ ಆವೃತ್ತಿಯ ಕಾರುಗಳನ್ನು ಕೊಳ್ಳಲು ಹೆಚ್ಚಿನ ಗ್ರಾಹಕರು ಮುಂದಾಗಿರುವುದು ಈ ಮಾರಾಟ ಇಳಿಕೆಗೆ ಕಾರಣವಾಗಿದೆ.

ಮುಂಬರುವ ದಿನಗಳಲ್ಲಿ ಹೆಚ್ಚಿನ ಹೈಬ್ರಿಡ್ ಕಾರುಗಳನ್ನು ಭಾರತದಲ್ಲಿ ಬಿಡುಗಡೆ ಮಾಡುವುದಿಲ್ಲವೆಂದು ಟೊಯೊಟಾ ಹೇಳಿಕೊಂಡಿದ್ದು, ಇದರಿಂದಾಗಿ ಪೆಟ್ರೋಲ್ ಮತ್ತು ಡೀಸೆಲ್ ಕಾರುಗಳ ಬದಲಾಗಿ ಹೈಬ್ರಿಡ್ ಕಾರುಗಳನ್ನು ಪ್ರೋತ್ಸಾಹಿಸುವ ಕಾರ್ಯಕ್ರಮಕ್ಕೆ ಕೊಂಚ ಮಟ್ಟಿನ ಹಿನ್ನಡೆಯಾಗಿದೆ ಎನ್ನಬಹುದು.