ದೆಹಲಿಯಲ್ಲಿ ಮೊಳಗಿದ ಹ್ಯುಂಡೈ ಎಕ್ಸ್‌ಸೆಂಟ್ ಕರೆ ಗಂಟೆ

By Nagaraja

Published: Tuesday, February 4, 2014, 15:59 [IST]

ಕಾಂಪಾಕ್ಟ್ ಸೆಡಾನ್ ವಿಭಾಗದಲ್ಲಿ ಪೈಪೋಟಿ ಕಾವೇರುತ್ತಿದೆ. ಒಂದರ ಬಳಿಕ ಒಂದರಂತೆ ದೇಶದ ಪ್ರಮುಖ ವಾಹನ ತಯಾರಕ ಸಂಸ್ಥೆಗಳು ತನ್ನ ನೂತನ ಅವತರಣಿಕೆಯೊಂದಿಗೆ ಮುಂದೆ ಬರುತ್ತಿದೆ.

ಕಳೆದ ದಿನವಷ್ಟೇ ಟಾಟಾ ಜೆಸ್ಟ್ ಬಗ್ಗೆ ಮಾಹಿತಿ ಕೊಟ್ಟಿದ್ದೆವು. ಇದರ ಬೆನ್ನಲ್ಲೇ ಬಹುನಿರೀಕ್ಷಿತ ಆಟೋ ಎಕ್ಸ್ ಪೋ ಆರಂಭಕ್ಕೆ ಒಂದು ದಿನ ಮಾತ್ರ ಬಾಕಿ ಉಳಿದಿರುವಂತೆಯೇ ದೇಶದ ನಂ.1 ಪ್ರಯಾಣಿಕ ಕಾರು ತಯಾರಿಕ ಸಂಸ್ಥೆಯಾಗಿರುವ ಹ್ಯುಂಡೈ, ತನ್ನ ನೂತನ ಎಕ್ಸ್‌ಸೆಂಟ್ (Xcent) ಕಾಂಪಾಕ್ಟ್ ಸೆಡಾನ್ ಕಾರನ್ನು ಭರ್ಜರಿಯಾಗಿ ಅನಾವರಣಗೊಳಿಸಿದೆ.

ದೆಹಲಿಯಲ್ಲಿ ಮೊಳಗಿದ ಹ್ಯುಂಡೈ ಎಕ್ಸ್‌ಸೆಂಟ್ ಕರೆ ಗಂಟೆ

ಗ್ರಾಂಡ್ ಐ10 ತಲಹದಿಯಲ್ಲಿ ನೂತನ ಎಕ್ಸ್‌ಸೆಂಟ್ ಕಾಂಪಾಕ್ಟ್ ಸೆಡಾನ್ ಕಾರು ನಿರ್ಮಾಣಗೊಂಡಿದೆ.

ಇದು ನಾಲ್ಕು ಮೀಟರ್ ಉದ್ದ ಪರಿಮಿತಿಯೊಳಗೆ ನಿರ್ಮಾಣವಾಗಲಿರುವುದರಿಂದ ಸರಕಾರದಿಂದ ತೆರಿಗೆ ವಿನಾಯಿತಿ ಪಡೆದುಕೊಳ್ಳಲು ನೆರವಾಗವಾಗುವುದಲ್ಲದೆ ಸ್ಮರ್ಧಾತ್ಮಕ ದರಗಳಲ್ಲಿ ಮಾರುಕಟ್ಟೆ ಪ್ರವೇಶಿಸಲು ಸಹಕಾರಿಯಾಗಲಿದೆ.

ನೂತನ ಹ್ಯುಂಡೈ ಎಕ್ಸ್‌ಸೆಂಟ್ ಕಾರು, ಈಗಾಗಲೇ ಮಾರುಕಟ್ಟೆಯಲ್ಲಿ ಮಾರುತಿ ಡಿಜೈರ್, ಹೋಂಡಾ ಅಮೇಜ್ ಹಾಗೂ ಇನ್ನಷ್ಟೇ ಆಗಮನವಾಗಲಿರುವ ಟಾಟಾ ಜೆಸ್ಟ್ ಕಾರಿಗೆ ಪೈಪೋಟಿ ಒಡ್ಡಲಿದೆ.

ಗ್ರಾಂಡ್ ಐ10 ಸೆಡಾನ್ ಎಂದೇ ಬಿಂಬಿತವಾಗಿರುವ ಎಕ್ಸ್‌ಸೆಂಟ್ ಸಬ್ ಫೋರ್ ಮೀಟರ್ ವಿಭಾಗದಲ್ಲಿ ಹ್ಯುಂಡೈನ ಮೊದಲ ಮಾದರಿಯೆನಿಸಲಿದೆ.

ಇದು ಗ್ರಾಂಡ್ ಐ10ನಲ್ಲಿರುವುದಕ್ಕೆ ಸಮಾನವಾದ 1.2 ಲೀಟರ್ ಕಪ್ಪ 2 ಪೆಟ್ರೋಲ್ ಹಾಗೂ 1.1 ಲೀಟರ್ ಡೀಸೆಲ್ ಎಂಜಿನ್ ಪಡೆದುಕೊಳ್ಳಲಿದೆ.

ಅಲ್ಲದೆ ಪೆಟ್ರೋಲ್‌ನಲ್ಲಿ ಮ್ಯಾನುವಲ್ ಹಾಗೂ ಆಟೋಮ್ಯಾಟಿಕ್ ಗೇರ್ ಬಾಕ್ಸ್ ಮತ್ತು ಡೀಸೆಲ್‌ನಲ್ಲಿ ಫೈವ್ ಸ್ಪೇಡ್ ಮ್ಯಾನುವಲ್ ಆಯ್ಕೆಯಿರಲಿದೆ.

ಇನ್ನು ಕಾರಿನೊಳಗೂ ಗ್ರಾಂಡ್ ಐ10ನಲ್ಲಿರುವುದಕ್ಕೆ ಸಮಾನವಾದ ವೈಶಿಷ್ಟ್ಯಗಳನ್ನು ಒಳಗೊಂಡಿರಲಿದೆ. ಇದು ಡಿಜೈರ್ ಮತ್ತು ಅಮೇಜ್ ಸವಾಲನ್ನು ಎದುರಿಸಲು ನೆರವಾಗಲಿದೆ.

ನೂತನ ಕಾರಿನಲ್ಲಿ ಹಿಂದುಗಡೆ ಎಸಿ ವೆಂಟ್ಸ್, ಸ್ಮಾರ್ಟ್ ಕೀ ಫುಶ್ ಬಟನ್ ಎಂಟ್ರಿ ಆಂಡ್ ಸ್ಟಾರ್ಟ್, 15 ಇಂಚು ಅಲಾಯ್ ವೀಲ್, ಆಟೋ ಫೋಲ್ಡಿಂಗ್ ಎಲೆಕ್ಟ್ರಿಕ್ ಔಟ್‌ಸೈಡ್ ರಿಯರ್ ವ್ಯೂ ಮಿರರ್ ಸೌಲಭ್ಯವಿರಲಿದೆ.

ಇನ್ನು ಸುರಕ್ಷತೆಗೂ ಹೆಚ್ಚಿನ ಮಹತ್ವ ಕೊಡಲಾಗಿದ್ದು, ಎಬಿಎಸ್, ಡ್ಯುಯಲ್ ಏರ್ ಬ್ಯಾಗ್ ಮತ್ತು ರಿಯರ್ ಪಾರ್ಕಿಂಗ್ ಅಸಿಸ್ಟ್, ಸೆಂಟ್ರಲ್ ಲಾಕಿಂಗ್, ರಿಯರ್ ಡಿಫಾಗರ್ ಜತೆಗೆ ಇತರ ಅನೇಕ ವೈಶಿಷ್ಟ್ಯಗಳು ಲಭ್ಯವಿರಲಿದೆ.

ಒಟ್ಟಿನಲ್ಲಿ ಹ್ಯುಂಡೈ ಎಕ್ಸ್‌ಸೆಂಟ್, ದೆಹಲಿ ಆಟೋ ಎಕ್ಸ್ ಪೋದಲ್ಲಿ ಲಾಂಚ್ ಆಗಲಿದ್ದು, ತದಾಕ್ಷಣ ಮಾರಾಟ ಪ್ರಕ್ರಿಯೆಯೂ ಆರಂಭವಾಗಲಿದೆ.

ವಿಶ್ವದರ್ಜೆಯ ಎಕ್ಸ್‌ಸೆಂಟ್ ಕಾರನ್ನು ಪ್ರಮುಖವಾಗಿ ಭಾರತ ಮಾರುಕಟ್ಟೆಯನ್ನು ದೃಷ್ಟಿಯಲ್ಲಿಟ್ಟುಕೊಂಡು ತಯಾರಿಸಲಾಗಿದೆ. ಇದು ದೇಶದ ಗ್ರಾಹಕರತ್ತ ಹ್ಯುಂಡೈ ಬದ್ಧತೆಗೆ ಸಾಕ್ಷಿಯಾಗಿದೆ ಎಂದು ಹ್ಯುಂಡೈ ಮೋಟಾರ್ಸ್ ಇಂಡಿಯಾ ಲಿಮಿಟೆಡ್ ವ್ಯವಸ್ಥಾಪಕ ನಿರ್ದೇಶಕ ಹಾಗೂ ಸಿಇಒ ಬಿಎಸ್ ಸಿಯೋ ಹೇಳಿದ್ದಾರೆ.

ಮುಂದಿನ ಎರಡು ವರ್ಷಗಳಲ್ಲಾಗಿ ನಾಲ್ಕು ನೂತನ ಮಾದರಿಗಳನ್ನು ಲಾಂಚ್ ಮಾಡುವ ಹ್ಯುಂಡೈ ಸಂಸ್ಥೆಯ ಯೋಜನೆಯ ಅಂಗವಾಗಿ ಹೊಸ ಮಾದರಿ ಆಗಮನವಾಗಿದೆ. ಇದರಲ್ಲಿ ಕಾಂಪಾಕ್ಟ್ ಎಸ್‌ಯುವಿ ಕೂಡಾ ಸೇರಿರಲಿದೆ.