ಹ್ಯಾಪಿ ಜರ್ನಿ: ಸವಾರಿಗೆ ಮುನ್ನ ವೈಪರ್ ಕೇರ್ ಮರೆಯದಿರಿ

ನೀವು ಬೆಂಗಳೂರಿನಿಂದ ಆಗುಂಬೆಗೆ ಪ್ರಯಾಣ ಬೆಳೆಸುತ್ತಿರಿ ಅಂದುಕೊಳ್ಳೋಣ. ತುಮಕೂರು ಅಥವಾ ಶಿವಮೊಗ್ಗಕ್ಕೆ ಮುಟ್ಟಿದಾಗ ನಿಮ್ಮ ಕಾರಿನ ವೈಪರ್ ಕೈಕೊಡುತ್ತದೆ. ಆಗುಂಬೆ ಹತ್ತಿರವಾದಗ ಅಲ್ಲಿ 17 ಸೆಂಟಿಮೀಟರ್ ಮಳೆ ಸುರಿಯುತ್ತಿರುತ್ತದೆ. ನಿಮ್ಮ ಪ್ರಯಾಣ ಗೋವಿಂದ. ಅಲ್ಲೇ ನಿಲ್ಲಬೇಕಾಗುತ್ತದೆ. ಅಥವಾ ಅಪಘಾತವಾಗುವ ಸಾಧ್ಯತೆಯೂ ಇದೆ. ಹೀಗಾಗಿ ವೈಪರ್ ಕೇರ್ ಅತ್ಯಂತ ಅಗತ್ಯ.

ಪ್ರತಿದಿನ ಪ್ರಯಾಣಕ್ಕೆ ಮುನ್ನ ಕಾರಿನ ಎಲ್ಲಾ ಭಾಗಗಳ ಕುರಿತು ಕಾಳಜಿ ವಹಿಸುವುದು ಅಗತ್ಯ. ಮಳೆಗಾಲದಲ್ಲಿ ವೈಪರ್ ಸರಿಯಿದೆಯೇ ಎಂದು ನೋಡದೇ ಪ್ರಯಾಣ ಆರಂಭಿಸಬೇಡಿ. ವಾಹನ ಡ್ರೈವಿಂಗ್ ಮಾಡುವಾಗ ಎದುರಿನ ರಸ್ತೆ ಸ್ಪಷ್ಟವಾಗಿ ಕಾಣಬೇಕಾದ್ದು ಅತ್ಯಂತ ಅಗತ್ಯ. ಕೆಟ್ಟಿರುವ ವೈಪರ್ ಅಪಾಯಕಾರಿ.

ವೈಪರ್ ಹಾಳಾಗುವುದು ಹೇಗೆ? ಧೂಳು, ಬಿಸಿಲು, ಎಣ್ಣೆಯಂಶಗಳು ವೈಪರ್ ಹಾಳುಗೆಡುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ. ವಾತಾವರಣ ತಂಪಾಗಿದ್ದರೆ ವೈಪರ್ ಗಟ್ಟಿಯಾಗುತ್ತದೆ. ಬಿಸಿಲಿಗೆ ವೈಪರ್ ರಬ್ಬರ್ ಬೇಗ ಹಾಳಾಗುತ್ತದೆ. ವೈಪರಿನಲ್ಲಿರುವ ರಬ್ಬರ್ ಭಾಗ ಹಾಳಾಗುವುದು, ಕಳಚಿಕೊಳ್ಳುವುದು ಬೇಗ.

ವೈಪರ್ ಕೇರ್ ಹೀಗೆ ಮಾಡಿರಿ
* ಮಳೆಗಾಲದಲ್ಲಿ ವಾಹನದಲ್ಲಿ ಡ್ರೈವಿಂಗ್ ಮಾಡುವ ಮುನ್ನ ವೈಪರ್ ಸಮರ್ಪಕವಾಗಿದೆಯೇ ಪರಿಶೀಲಿಸಿರಿ.
* ವೈಪರ್ ನಲ್ಲಿ ಹಿಡಿದಿರುವ ಧೂಳು, ತೇವವನ್ನು ಸ್ವಚ್ಛ ಮಾಡುತ್ತಿರಿ.
* ಪ್ರತಿ ಎರಡು ವರ್ಷಕ್ಕೊಮ್ಮೆ ಅಥವಾ 6 ಸಾವಿರ ಮೈಲು ಪ್ರಯಾಣಕ್ಕೊಮ್ಮೆ ವೈಪರ್ ಬ್ಲೇಡ್ ಬದಲಾಯಿಸಿರಿ.
* ವೈಪರ್ ಬ್ಲೇಡ್ ಅತ್ಯುತ್ತಮವಾಗಿ ಕಾರ್ಯನಿರ್ವಹಿಸುತ್ತಿದ್ದರೆ, ಕೇವಲ ರಿಫಿಲ್ ಬದಲಾಯಿಸಿದರೆ ಸಾಕು. ಅಂದ್ರೆ ರಬ್ಬರ್ ಭಾಗಗಳನ್ನು ಬದಲಾಯಿಸಿರಿ. ಪೂರ್ತಿ ವೈಪರ್ ಸಮರ್ಪಕವಾಗಿ ಕಾರ್ಯ ನಿರ್ವಹಿಸದೇ ಇದ್ದರೆ ವೈಪರ್ ಬ್ಲೇಡ್ ಕೂಡ ಬದಲಾಯಿಸಿರಿ.