ಜಪಾನ್‌ನಿಂದ 15 ಯುದ್ಧ ವಿಮಾನ ಖರೀದಿಸಲಿರುವ ಭಾರತ

ಎಲ್ಲವೂ ಅಂದುಕೊಂಡಂತೆ ನಡೆದ್ದಲ್ಲಿ ಎರಡನೇ ಮಹಾಯುದ್ಧದ ಬಳಿಕ ಜಪಾನ್ ರಾಷ್ಟ್ರದಿಂದ ಮಿಲಿಟರಿ ಯುದ್ಧ ವಿಮಾನ ಖರೀದಿಸಲು ಧೈರ್ಯ ತೋರಿರುವ ಮೊದಲ ದೇಶವೆಂಬ ಹೆಗ್ಗಳಿಕೆಗೆ ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಭಾರತ ಸರಕಾರ ಪಾತ್ರವಾಗಲಿದೆ.

ಇತ್ತೀಚೆಗಷ್ಟೇ ಜಪಾನ್ ಭೇಟಿ ಮಾಡಿರುವ ನರೇಂದ್ರ ಮೋದಿ ಈ ಸಂಬಂಧ ಮಾತುಕತೆಗೆ ಚುರುಕು ಮುಟ್ಟಿಸಿದ್ದಾರೆ ಎನ್ನಲಾಗಿದೆ. ಅಂದ ಹಾಗೆ ಭಾರತ 1.65 ಬಿಲಿಯನ್ ಅಮೆರಿಯನ್ ಡಾಲರ್ ವೆಚ್ಚದಲ್ಲಿ ಉಭಯಚರ (ಗಾಳಿ ಹಾಗೂ ನೀರಲ್ಲಿ ತೇಲಾಡುವ) ಯುದ್ಧ ವಿಮಾನ ಶಿನ್‌ಮೆಯ್ವಾ ಯುಎಸ್-2 (Shinmaywa US2 Amphibious Aircraft) ಖರೀದಿಸುವ ಯೋಜನೆ ಹೊಂದಿದೆ.

ಜಪಾನ್ ಸೇನೆಯಿಂದ ಬಳಕೆಯಲ್ಲಿರುವ ಪ್ರಸ್ತುತ ಯುದ್ಧ ವಿಮಾನವನ್ನು ಭಾರತದಲ್ಲೇ ಜೋಡಣೆ ಮಾಡುವ ಯೋಜನೆ ಹೊಂದಲಾಗಿದೆ.

ಪ್ರಮುಖವಾಗಿಯೂ ರಕ್ಷಣಾ ಕಾರ್ಯಾಚರಣೆ ಮತ್ತು ತುರ್ತು ಪರಿಸ್ಥಿತಿಯ ವೇಳೆಯಲ್ಲಿ ಶಿನ್‌ಮಯ್ವಾ ನೆರವಿಗೆ ಬರಲಿದೆ.

ಇನ್ನು ಭಾರತೀಯ ಸೇನೆಯು ಶಿನ್‌ಮಯ್ವಾ ಯುದ್ಧ ವಿಮಾನಗವನ್ನು ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪ ನೆಲೆಯಲ್ಲಿ ಸ್ಥಾಪಿಸುವ ಇರಾದೆ ಹೊಂದಿದೆ.

ಸದ್ಯ ಜಪಾನ್ ಸೇನೆಯಲ್ಲಿ ಮಾತ್ರ ಇರುವ ಶಿನ್‌ಮಯ್ವಾ ಯುಎಸ್ 2 ಏರ್-ಸೀ ಏರ್‌ಕ್ರಾಫ್ಟ್‌, 9.8 ಮೀಟರ್ ಎತ್ತರ, 33.46 ಮೀಟರ್ ಉದ್ದ ಮತ್ತು 43,000 ಕೆ.ಜಿ ತೂಕವನ್ನು ಹೊಂದಿದೆ.

ಇದು ಗಂಟೆಗೆ 560 ಕೀ.ಮೀ. ವೇಗದಲ್ಲಿ ಸಂಚರಿಸಲಿದೆ. ಅಂತೆಯೇ 4,700 ಕೀ.ಮೀ. ವ್ಯಾಪ್ತಿ ವರೆಗೂ ಚಲಿಸುವ ಸಾಮರ್ಥ್ಯ ಹೊಂದಿರಲಿದೆ.

ಜಾಗತಿಕ ಮಟ್ಟದಲ್ಲಿ ಚೀನಾ ಸೂಪರ್ ನ್ಯಾಚುರಲ್ ಶಕ್ತಿಯಾಗಿ ಬೆಳೆದು ಬರುತ್ತಿರುವ ಈ ಸಂದರ್ಭದಲ್ಲಿ ಭಾರತ-ಜಪಾನ್ ಬಾಂಧವ್ಯ ವೃದ್ಧಿಸಿಕೊಳ್ಳುತ್ತಿರುವುದು ಗಮನಾರ್ಹವೆನಿಸಲಿದೆ. ಅಲ್ಲದೆ ಹಿಂದೂ ಮಹಾ ಸಾಗರದಲ್ಲಿ ಭಾರತ ತನ್ನ ಸಾನಿಧ್ಯವನ್ನು ಇನ್ನಷ್ಟು ಗಟ್ಟಿಪಡಿಸಲಿದೆ.

ಜಪಾನ್‌ನಿಂದ ಒಟ್ಟು 15 ಯುದ್ಧ ವಿಮಾನಗಳನ್ನು ಭಾರತ ಖರೀದಿಸುವ ಸಾಧ್ಯತೆಯಿದೆ. ಈ ಮೂಲಕ ಜಪಾನ್‌ನ ಅತಿದೊಡ್ಡ ಏರ್-ಸೀ ಯುದ್ಧ ವಿಮಾನ ಭಾರತ ಪ್ರವೇಶ ಪಡೆಯಲಿದೆ.