ದುಬೈ ಪೊಲೀಸ್ ಶಕ್ತಿ ಪ್ರದರ್ಶನ

By Nagaraja

Published: Wednesday, November 6, 2013, 17:05 [IST]

ಬಿಎಂಡಬ್ಲ್ಯು, ಮರ್ಸಿಡಿಸ್ ಬೆಂಝ್, ಷೆವರ್ಲೆ, ಟೊಯೊಟಾ, ಹಮ್ಮರ್, ಲಂಬೊರ್ಗಿನಿ ಹಾಗೂ ಫೆರಾರಿಗಳಂತಹ ದುಬಾರಿ ವಾಹನಗಳನ್ನು ತಮ್ಮ ತೆಕ್ಕೆಗೆ ಹಾಕಿಕೊಂಡಿರುವ ದುಬೈ ಪೊಲೀಸ್ ಇದೀಗ ಇನ್ನಷ್ಟು ಐಷಾರಾಮಿ ಕಾರುಗಳನ್ನು ಈ ಪಟ್ಟಿಗೆ ಸೇರಿಸಿಕೊಂಡಿದೆ.

ಪ್ರಸ್ತುತ ದುಬೈನಲ್ಲಿ ಸಾಗುತ್ತಿರುವ ಆಟೋ ಶೋದಲ್ಲಿ ದುಬೈ ಪೊಲೀಸ್ ಕಾರು ಕ್ರೇಜ್ ಮುಂದುವರಿದಿದೆ. ಜಗತ್ತಿನ ಅತಿ ಶ್ರೀಮಂತ ರಕ್ಷಣಾ ವ್ಯವಸ್ಥೆಯನ್ನು ಹೊಂದಿರುವ ದುಬೈ ಪೊಲೀಸ್, ಈ ಎಲ್ಲ ವಾಹನಗಳನ್ನು ಗಸ್ತು ಗಾಡಿಗಳಾಗಿ (patrolling) ಬಳಕೆ ಮಾಡಲಿದೆ. ಹಾಗಿದ್ದರೆ ಬನ್ನಿ ಹೊಸದಾಗಿ ದುಬೈ ಪೊಲೀಸ್ ಪಡೆಗೆ ಸೇರ್ಪಡೆಯಾಗಿರುವ ಕಾರುಗಳ ಬಗ್ಗೆ ಮಾಹಿತಿ ಪಡೆಯೋಣವೇ...

ಜರ್ಮನಿಯ ಐಷಾರಾಮಿ ಕಂಪನಿಯಾದ ಆಡಿ ಆರ್8 ಸೂಪರ್ ಕಾರು ಹಾಗೂ ಮರ್ಸಿಡಿಸ್ ಬೆಂಝ್‌ ಜಿ ಕ್ಲಾಸ್ ಬ್ರಾಬಸ್ ಮತ್ತು ನಿಸ್ಸಾನ್ ಜಿಟಿಆರ್ ಕಾರುಗಳನ್ನು ದುಬೈ ಪೊಲೀಸ್ ವಶಪಡಿಸಿಕೊಂಡಿದೆ.

ಈ ಎಲ್ಲ ಕಾರುಗಳನ್ನು ದುಬೈ ಪೊಲೀಸ್ ವಿಶಿಷ್ಟ ಶೈಲಿಯಲ್ಲಿ ವಿನ್ಯಾಸಗೊಳಿಸಿದೆ. ಇದು ಕಾರಿನ ಅಂದತೆಯನ್ನು ಇನ್ನಷ್ಟು ಹೆಚ್ಚಿಸಿದೆ.

ಇದರೊಂದಿಗೆ ದುಬೈ ಪೊಲೀಸ್ ಬಳಿಯಿರುವ ದುಬಾರಿ ಸ್ಪೋರ್ಟ್ಸ್ ಕಾರುಗಳ ಸಂಖ್ಯೆ 12ಕ್ಕೆ ಏರಿಕೆಯಾಗಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ದುಬೈ ಪೊಲೀಸ್, ಮೊದಲ ಬಾರಿಗೆ ವರ್ಷಾರಂಭದಲ್ಲಿ ಲಂಬೋರ್ಗಿನಿ ಪರಿಚಯಿಸಿದಾಗ ಉತ್ತಮ ಪ್ರತಿಕ್ರಿಯೆ ದೊರಕಿತ್ತು. ಈ ಮೂಲಕ ದುಬೈ ಚಿತ್ರಣವನ್ನು ವಿಶ್ವಕ್ಕೆ ಪಸರಿಸಲು ಸಾಧ್ಯವಾಗಿದೆ ಎಂದಿದೆ.

ಈ ಎಲ್ಲ ವಾಹನಗಳು ಸೂಪರ್ ಕಾರುಗಳೇ ಆಗಿದ್ದರೂ ನಮ್ಮ ಪೊಲೀಸರು ವೇಗ ಮಿತಿಯನ್ನು ಎಂದೂ ಉಲ್ಲಂಘಿಸಿಲ್ಲ ಎಂದು ದುಬೈ ಪೊಲೀಸ್ ಸ್ಪಷ್ಟಪಡಿಸಿದೆ.

ದುಬೈ ಪೊಲೀಸ್ ಬಳಿಯಲ್ಲಿರುವ ಇತರ ಕಾರುಗಳೆಂದರೆ ಬುಕಾಟಿ ವೆರೋನ್, ಆಸ್ಟನ್ ಮಾರ್ಟಿನ್ ಒನ್ 77, ಬಿಎಂಡಬ್ಲ್ಯು 5 ಸಿರೀಸ್, ಮರ್ಸಿಡಿಸ್ ಇ ಕ್ಲಾಸ್, ಷೆವರ್ಲೆ ಕ್ಯಾಮರೊ, ಟೊಯೊಟೊ ಪ್ರಾಡೊ, ಟೊಯೊಟಾ ಫಾರ್ಚುನರ್, ಹಮ್ಮರ್ ಎಚ್1, ಲಂಬೊರ್ಗಿನಿ ಅವೆಂಟಡೊರ್ ಮತ್ತು ಫೆರಾರಿ ಎಫ್‌ಎಫ್ ಕಾರುಗಳಿವೆ.

ದುಬೈ ಪೊಲೀಸ್‌ಗೆ ಸೇರ್ಪಡೆಯಾಗಿರುವ ಬ್ರಾಬಸ್ ಜಿ63 ಎಎಂಜಿ ಕಾರು ಕೇವಲ 4.9 ಸೆಕೆಂಡುಗಳಲ್ಲಿ 100 ಕೀ.ಮೀ. ವೇಗದಲ್ಲಿ ಸಂಚರಿಸುವ ಸಾಮರ್ಥ್ಯ ಹೊಂದಿದೆ. ಹಾಗೆಯೇ ಗಂಟೆಗೆ ಗರಿಷ್ಠ 146 ಮೈಲ್ ವೇಗದಲ್ಲಿ ಸಂಚರಿಸಲಿದೆ.