ಕಡಿಮೆ ಮಾರಾಟ ಕಾರಿಗೆ ಬ್ರೇಕ್; ಮಾರುತಿಯಿಂದ 2 ಹೊಸ ಕಾರು

By Nagaraja

Published: Thursday, May 9, 2013, 11:59 [IST]

Maruti To introduce Two New Models Within A Year

ಬೆಳೆದು ಬರುತ್ತಿರುವ ಭಾರತ ಮಾರುಕಟ್ಟೆಯಲ್ಲಿ ಭದ್ರ ನೆಲೆ ಸ್ಥಾಪಿಸಿರುವ ದೇಶದ ನಂ.1 ಕಾರು ತಯಾರಕ ಸಂಸ್ಥೆಯಾದ ಮಾರುತಿ ಸುಜುಕಿ, ಸದ್ಯದಲ್ಲೇ ಕಡಿಮೆ ಮಾರಾಟ ಕಂಡುಕೊಂಡಿರುವ ಕಾರುಗಳ ಬದಲಿಗೆ ಹೊಸ ಆವೃತ್ತಿಗಳನ್ನು ಪರಿಚಯಿಸಲಿದೆ.

ಬಲ್ಲ ಮೂಲಗಳ ಪ್ರಕಾರ ಮಾರ್ಕೆಟ್ ಶೇರು ಉಳಿಸಿಕೊಳ್ಳುವ ನಿಟ್ಟಿನಲ್ಲಿ ಮಾರುತಿಯು ಇಂತಹದೊಂದು ನಡೆಗೆ ಮುಂದಾಗುತ್ತಿದ್ದು, ಮುಂದಿನ ಒಂದು ವರ್ಷದೊಳಗೆ ಎರಡು ನೂತನ ಮಾಡೆಲ್‌ಗಳ ಪರಿಚಯವಾಗಲಿದೆ.

ಈ ಪೈಕಿ ಎಲ್‌ವೈ7 ಎಂಬ ಕೋಡ್ ಪಡೆದಿರುವ ನೂತನ ಮಾಡೆಲ್ 2014 ಆಟೋ ಎಕ್ಸ್‌ಪೋದಲ್ಲಿ ಪ್ರದರ್ಶನ ಕಾಣಲಿದೆ. ಸಣ್ಣ ಕಾರು ಫ್ಲಾಟ್‌ಫಾರ್ಮ್‌ನಲ್ಲಿ ನಿರ್ಮಾಣವಾಗಲಿರುವ ಈ ಮಾಡೆಲ್, ಕಡಿಮೆ ಮಾರಾಟವಾಗುತ್ತಿರುವ ಎ-ಸ್ಟಾರ್ ಹಾಗೂ ಎಸ್ಟಿಲೊ ಆವೃತ್ತಿಗಳಿಗೆ ಬದಲಿ ವ್ಯವಸ್ಥೆಯಾಗಿರಲಿದೆ.

ಹಾಗೆಯೇ ಎಸ್‌ಎಕ್ಸ್4 ಬದಲಿಗೆ ಮಿಡ್ ಸೈಜ್ ಸೆಡಾನ್ ಕಾರೊಂದನ್ನು ನಿಕಟ ಭವಿಷ್ಯದಲ್ಲಿ ಪರಿಚಯಿಸುವ ಯೋಜನೆಯನ್ನು ಮಾರುತಿ ಹೊಂದಿದೆ. ಎಲ್‌ವೈ1 ಕೋಡ್ ಪಡೆದುಕೊಂಡಿರುವ ಈ ಹೊಸ ಮಾಡೆಲ್ ಮಿಡ್ ಸೈಜ್ ಸೆಡಾನ್ ಸೆಗ್ಮೆಂಟ್‌ನಲ್ಲಿ ಹೊಸ ಕ್ರಾಂತಿ ಸೃಷ್ಟಿ ಮಾಡುವ ನಿರೀಕ್ಷೆಯಿದೆ.

2012-13ರ ಆರ್ಥಿಕ ಸಾಲಿನಲ್ಲಿ ಭಾರತೀಯ ಪ್ರಾಯಾಣಿಕ ಮಾರುಕಟ್ಟೆಯಲ್ಲಿ ಮಾರುತಿ ಶೇಕಡಾ 39ರಷ್ಟು ಮಾರ್ಕೆಟ್ ಶೇರುಗಳನ್ನು ವಶಪಡಿಸಿಕೊಂಡಿತ್ತು. ಕಳೆದ ಆರ್ಥಿಕ ಸಾಲಿನಲ್ಲೂ ಇದಕ್ಕೆ ಸಮಾನವಾದ ಅಂಕಿಅಂಶ ಕಾಪಾಡಿಕೊಂಡು ಬಂದಿತ್ತು. ಇನ್ನು 2010-11ರಲ್ಲಿ ಶೇಕಡಾ 45ರಷ್ಟು ಮಾರುಕಟ್ಟೆ ಶೇರು ಹೊಂದಿತ್ತು.