ಹ್ಯುಂಡೈ 2014 ಎಪ್ರಿಲ್ ತಿಂಗಳ ಮಾರಾಟ ವೃದ್ಧಿ

ದಕ್ಷಿಣ ಕೊರಿಯಾ ಮೂಲದ ವಾಹನ ತಯಾರಿಕ ಸಂಸ್ಥೆಯಾಗಿರುವ ಹ್ಯುಂಡೈ ಮೋಟಾರು ಇಂಡಿಯಾ ಲಿಮಿಟೆಡ್ (ಎಚ್‌ಎಂಐಎಲ್), 2014 ಎಪ್ರಿಲ್ ತಿಂಗಳ ಮಾರಾಟದಲ್ಲಿ ಶೇಕಡಾ 8ರಷ್ಟು ವೃದ್ಧಿ ದಾಖಲಿಸಿದೆ.

ದೇಶದ ಪ್ರಯಾಣಿಕ ಮಾರುಕಟ್ಟೆಯಲ್ಲಿ ನಂ. 2 ಸ್ಥಾನದಲ್ಲಿರುವ ಹ್ಯುಂಡೈ, ಎಪ್ರಿಲ್ ಅವಧಿಯಲ್ಲಿ ದೇಶಿಯವಾಗಿ 35,248 ವಾಹನಗಳನ್ನು ಮಾರಾಟ ಮಾಡಿದ್ದು, 14,974 ಯುನಿಟ್‌ಗಳನ್ನು ರಫ್ತು ಮಾಡಿವೆ.

ಕಳೆದ ವರ್ಷ ಇದೇ ಅವಧಿಯಲ್ಲಿ ಅಂದರೆ ಎಪ್ರಿಲ್ 2013ರಲ್ಲಿ 32,403 ಯುನಿಟ್ ಮಾರಾಟ ಹಾಗೂ 24,550 ಯುನಿಟ್ ರಫ್ತು ಮಾಡಿತ್ತು. ಈ ಮೂಲಕ ಒಟ್ಟು 56,953 ಯುನಿಟ್‌ಗಳ ಮಾರಾಟ ಕಂಡುಕೊಂಡಿತ್ತು.

ಪ್ರಸ್ತುತ ರಫ್ತು ವಹಿವಾಟಿನಲ್ಲಿ ಇಳಿಕೆ ಕಂಡಿದ್ದರೂ ದೇಶಿಯ ಮಾರಾಟದಲ್ಲಿ ಶೇಕಡಾ 8ರಷ್ಟು ಏರಿಕೆ ದಾಖಲಿಸಿಕೊಂಡಿದೆ. ಇತ್ತೀಚೆಗಷ್ಟೇ ಬಿಡುಗಡೆಯಾಗಿದ್ದ ಹ್ಯುಂಡೈ ಎಕ್ಸ್‌ಸೆಂಟ್, ಗ್ರಾಂಡ್ ಐ10 ಮತ್ತು ಸಾಂಟಾಫೆ ಆವೃತ್ತಿಗಳಿಗೆ ಗ್ರಾಹಕರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ.