ಭಾರತದತ್ತ ಮುಖ ಮಾಡಿದ ಮಾರುತಿ ಸ್ವಿಫ್ಟ್ ಸ್ಪೋರ್ಟ್ ಕಾರು

ಕೊನೆಯ ಬಾರಿಗೆ 2014 ಆಟೋ ಎಕ್ಸ್ ಪೋದಲ್ಲಿ ಸ್ವಿಫ್ಟ್ ಸ್ಪೋರ್ಟ್ ಕಾರು ಪ್ರದರ್ಶನಗೊಂಡಿತ್ತು. ಆದರೆ ಇದುವರೆಗೆ ದೇಶದಲ್ಲಿ ಬಿಡುಗಡೆ ಭಾಗ್ಯ ಕಂಡಿರಲಿಲ್ಲ.

2017 ಸುಜುಕಿ ಸ್ವಿಫ್ಟ್ ಸ್ಪೋರ್ಟ್ ಕಾರಿನ ಚಿತ್ರಗಳು ಆಗಲೇ ಅಂತರ್ಜಾಲದಲ್ಲಿ ಜಾಲಾಡುತ್ತಿದೆ. ಆಕ್ರಮಣಕಾರಿ ಏರ್ ಡ್ಯಾಮ್ ಶೈಲಿ, ಟ್ವಿನ್ ಎಕ್ಸಾಸ್ಟ್ ಕೊಳಪೆ, ಆಕರ್ಷಕ ಸ್ಟೀರಿಂಗ್ ವೀಲ್, ಕೆಂಪು ಪಟ್ಟಿಗಳು ಪ್ರಮುಖವಾಗಿ ಎದ್ದು ಕಾಣಿಸುತ್ತದೆ.

ಬಲ್ಲ ಮೂಲಗಳ ಪ್ರಕಾರ ಹೊಸ ಸ್ವಿಫ್ಟ್ ಸ್ಪೋರ್ಟ್ ಕಾರು 1.4 ಲೀಟರ್ ಬೂಸ್ಟರ್ ಜೆಟ್ ಎಂಜಿನ್ ನಿಂದ ನಿಯಂತ್ರಿಸಲ್ಪಡಲಿದ್ದು, 220 ಎನ್ ಎಂ ತಿರುಗುಬಲದಲ್ಲಿ 140 ಅಶ್ವಶಕ್ತಿಯನ್ನು ಉತ್ಪಾದಿಸಲಿದೆ.

ಹೆಸರಲ್ಲೇ ಸೂಚಿಸಿದಂತೆ ನೂತನ ಸ್ವಿಫ್ಟ್ ಸ್ಪೋರ್ಟ್ ಕಾರು ಕೇವಲ ಒಂಬತ್ತು ಸೆಕೆಂಡುಗಳಲ್ಲೇ ಗಂಟೆಗೆ 0-100 ಕೀ.ಮೀ. ವೇಗವರ್ಧಿಸಲು ಸಾಧ್ಯವಾಗಲಿದೆ.

1,000 ಕೆ.ಜಿ ಭಾರದೊಳಗೆ ಗುರುತಿಸಿಕೊಳ್ಳಲಿರುವ ಸ್ವಿಫ್ಟ್ ಸ್ಪೋರ್ಟ್ ಕಾರಿನ ಎಂಜಿನನ್ನು ಮಾರುತಿಯ ಮಾನೇಸರ್ ಘಟಕದಲ್ಲಿ ನಿರ್ಮಿಸಲಾಗುವುದು.

ಇದೇ ಘಟಕದಲ್ಲಿ ಮುಂಬರುವ ಬಲೆನೊ ಆರ್ ಎಸ್ ಆವೃತ್ತಿಗಾಗಿ 1.0 ಲೀಟರ್ ತ್ರಿ ಸಿಲಿಂಡರ್ ಬೂಸ್ಟರ್ ಎಂಜಿನ್ ಸಹ ಅಭಿವೃದ್ಧಿಪಡಿಸಲಾಗುವುದು.

2017 ಮಾರ್ಚ್ ನಲ್ಲಿ ನಡೆಯಲಿರುವ ಜಿನೆವಾ ಮೋಟಾರು ಶೋದಲ್ಲಿ ಹೊಸ ತಲೆಮಾರಿನ ಸ್ವಿಫ್ಟ್ ಜೊತೆಗೆ ನೂತನ ಸ್ವಿಫ್ಟ್ ಸ್ಪೋರ್ಟ್ ಆವೃತ್ತಿಯು ಪಾದಾರ್ಪಣೆಗೈಯಲಿದೆ. ಯುರೋಪ್ ಮಾರುಕಟ್ಟೆಯನ್ನು ಮೊದಲು ಕಾಲಿರಿಸಲಿರುವ ಈ ಕಾರುಗಳು ತದಾ ಬಳಿಕದ ಒಂದು ವರ್ಷದ ಅವಧಿಯೊಳಗೆ ಭಾರತಕ್ಕೆ ಪ್ರವೇಶಿಸಲಿದೆ.

2005ನೇ ಇಸವಿಯಲ್ಲಿ ಮೊದಲ ಬಾರಿಗೆ ಭಾರತಕ್ಕೆ ಪ್ರವೇಶಿಸಿರುವ ಮಾರುತಿ ಸ್ವಿಫ್ಟ್ ಇದುವರೆಗೆ ಸೀಮಿತ ಜೊತೆಗೆ ಫೇಸ್ ಲಿಫ್ಟ್ ಆವೃತ್ತಿಗಳನ್ನು ಪಡೆದುಕೊಂಡಿದೆ. ಈ ಸಾಲಿಗೀಗ ಸ್ವಿಫ್ಟ್ ಸ್ಪೋರ್ಟ್ ಆವೃತ್ತಿಯು ಸೇರ್ಪಡೆಯಾಗಲಿದೆ.

ನೂತನ ಮಾರುತಿ ಸ್ವಿಫ್ಟ್ ಸ್ಪೋರ್ಟ್ ಆವೃತ್ತಿಯು ಫೋಕ್ಸ್ ವ್ಯಾಗನ್ ಪೊಲೊ ಜಿಟಿಐ ಮತ್ತು ಫಿಯೆಟ್ ಅಬಾರ್ತ್ ಪುಂಟೊ ಮಾದರಿಗಳಿಗೆ ಸೆಡ್ಡು ಒಡ್ಡಲಿದೆ.