ಹೈಬ್ರಿಡ್ ಬದಲು ಎಲೆಕ್ಟ್ರಿಕ್ ಕಾರುಗಳ ಉತ್ಪಾದನೆಗೆ ರೋಲ್ಸ್ ರಾಯ್ಸ್ ಗ್ರೀನ್ ಸಿಗ್ನಲ್

ಇಷ್ಟು ದಿನಗಳ ಕಾಲ ಕೇವಲ ಡೀಸೆಲ್ ಮತ್ತು ಪೆಟ್ರೋಲ್ ಚಾಲಿತ ಕಾರು ಮಾದರಿಗಳನ್ನು ಮಾತ್ರ ಉತ್ಪಾದನೆ ಮಾಡುತ್ತಿದ್ದ ರೋಲ್ಸ್ ರಾಯ್ಸ್ ಸಂಸ್ಥೆಯು ಇನ್ಮುಂದೆ ಎಲೆಕ್ಟ್ರಿಕ್ ಕಾರುಗಳನ್ನು ಕೂಡಾ ಉತ್ಪಾದನೆ ಮಾಡಲು ಬೃಹತ್ ಯೋಜನೆ ರೂಪಿಸುತ್ತಿದೆ.

ವಿ12 ಎಂಜಿನ್ ಬಳಕೆ ಮಾಡುವ ಮೂಲಕ ಅಲ್ಟ್ರಾ ಲಗ್ಷುರಿ ಕಾರುಗಳನ್ನು ಉತ್ಪಾದನೆ ಮಾಡುವ ರೋಲ್ಸ್ ರಾಯ್ಸ್, ಮುಂಬರುವ ದಿನಗಳಲ್ಲಿ ಎಲೆಕ್ಟ್ರಿಕ್ ಕಾರುಗಳನ್ನು ಕೂಡಾ ಪರಿಚಯಿಸಲಿದೆ.

ಈ ಬಗ್ಗೆ ಸ್ಪಷ್ಟನೆ ನೀಡಿರುವ ರೋಲ್ಸ್ ರಾಯ್ಸ್ ಹಿರಿಯ ಅಧಿಕಾರಿಗಳು, ಯಾವುದೇ ಕಾರಣಕ್ಕೂ ಹೈಬ್ರಿಡ್ ಕಾರು ಉತ್ಪಾದನೆ ಮಾಡುವುದಿಲ್ಲ. ಆದ್ರೆ ಪರಿಸರಕ್ಕೆ ಪೂರಕವಾಗಿರುವ ಎಲೆಕ್ಟ್ರಿಕ್ ಕಾರು ಉತ್ಪಾದನೆಗೆ ನಮ್ಮದು ಸಮ್ಮತಿ ಇದೆ ಎಂದಿದ್ದಾರೆ.

ಇದಲ್ಲದೇ ಅಟೋನೊಮಸ್(ಚಾಲಕ ರಹಿತ) ಕಾರು ಉತ್ಪಾದನೆ ಬಗ್ಗೆಯೂ ಪ್ರಕ್ರಿಯೆ ನೀಡಿರುವ ರೋಲ್ಸ್ ರಾಯ್ಸ್, ಸದ್ಯಕ್ಕೆ ಚಾಲಕ ರಹಿತ ಕಾರು ಉತ್ಪಾದನೆ ಬಗ್ಗೆ ಯಾವುದೇ ಯೋಜನೆ ಕೈಗೊತ್ತಿಕೊಳ್ಳುತ್ತಿಲ್ಲ. ಬದಲಾಗಿ ಎಲೆಕ್ಟ್ರಿಕ್ ಕಾರುಗಳ ಉತ್ಪಾದನೆಗೆ ಹೆಚ್ಚಿನ ಒಲವು ಹೊಂದಲಾಗಲಿದೆ ಎಂದಿದೆ.

ಇನ್ನು ಕೆಲ ದಿನಗಳ ಹಿಂದಷ್ಟೇ ಮತ್ತೊಂದು ಪ್ರಮುಖ ಕಾರು ಉತ್ಪಾದನಾ ಸಂಸ್ಥೆಯಾದ ವೊಲ್ಪೋ ಕೂಡಾ ಡಿಸೇಲ್ ಮತ್ತು ಪೆಟ್ರೋಲ್ ಕಾರುಗಳ ಉತ್ಪಾದನೆ ನಿಲ್ಲಿಸುವ ಬಗ್ಗೆ ಪ್ರಮುಖ ನಿರ್ಧಾರ ಕೈಗೊಂಡಿದ್ದು, 2019ರಿಂದ ಕೇವಲ ಎಲೆಕ್ಟ್ರಿಕ್ ಮತ್ತು ಹೈಬ್ರಿಡ್ ಕಾರು ಉತ್ಪಾದನೆ ಮಾಡಲು ಯೋಜನೆ ರೂಪಿಸಿದೆ.