ಜುಲೈನಲ್ಲಿ ಶೇಕಡಾ 10.5% ರಷ್ಟು ಬೆಳವಣಿಗೆ ದಾಖಲಿಸಿದ ಫೋಕ್ಸ್‌ವ್ಯಾಗನ್ ಇಂಡಿಯಾ

ತನ್ನ ಉನ್ನತ ಮಟ್ಟದ ವಾಹನಗಳ ಮಾರಾಟದಿಂದಾಗಿ ಭಾರತದಲ್ಲಿ ತನ್ನದೇ ಆದ ಅಭಿಮಾನಿ ಬಳಗ ಹೊಂದಿರುವ ಫೋಕ್ಸ್‌ವ್ಯಾಗನ್ ಸಂಸ್ಥೆ, ಜುಲೈ ತಿಂಗಳಿನಲ್ಲಿ ಶೇಕಡಾ 10.5% ರಷ್ಟು ಮಾರಾಟ ಸಂಖ್ಯೆ ಏರಿಕೆಯನ್ನು ದಾಖಲಿಸಿದ್ದು, ಮಾಸಿಕ ಅಂಕಿ ಅಂಶ ಪಾಸಿಟಿವ್ ಇರುವಂತೆ ನೋಡಿಕೊಂಡಿದೆ.

ಫೋಕ್ಸ್‌ವ್ಯಾಗನ್ ಸಂಸ್ಥೆ 2016ರ ಜುಲೈ ತಿಂಗಳಿನಲ್ಲಿ 4,301 ವಾಹನಗಳನ್ನು ಮಾರಾಟ ಮಾಡಿತ್ತು, ಅದಕ್ಕೆ ವಿರುದ್ಧವಾಗಿ ಈ ವರ್ಷ ಜುಲೈನಲ್ಲಿ 4,753 ವಾಹನಗಳನ್ನು ಮಾರಾಟ ಮಾಡಿದೆ.

ಕಂಪನಿಯು 2017ರಲ್ಲಿ ವರ್ಷಕ್ಕೆ ಶೇಕಡಾ 13% ರಷ್ಟು ಬೆಳವಣಿ ಕಂಡಿದೆ ಮತ್ತು ಹೊಸ ಜಿಎಸ್‌ಟಿ ತೆರಿಗೆ ಬೆಳವಣಿಗೆಯಲ್ಲಿ ಗಮನಾರ್ಹ ಪಾತ್ರವನ್ನು ನಿರ್ವಹಿಸಿದೆ ಎಂದರೆ ತಪ್ಪಾಗಲಾರದು.

ಟಿಗ್ವಾನ್ ಎಸ್‌ಯುವಿ ಕಾರನ್ನು ಇತ್ತೀಚೆಗೆ ಬಿಡುಗಡೆ ಮಾಡಿದ್ದು ಭಾರತೀಯ ಗ್ರಾಹಕರಿಂದ ಭಾರಿ ಮಟ್ಟದಲ್ಲಿ ಪ್ರತಿಕ್ರಿಯೆಯನ್ನು ಪಡೆಯುತ್ತಿದ್ದು, ಈ ಕಾರು ಸಂಸ್ಥೆಯ ಮಾರಾಟವನ್ನು ಮತ್ತಷ್ಟು ಹೆಚ್ಚಿಸಲಿದೆ ಎನ್ನಬಹುದು. ಟಿಗ್ವಾನ್ ಸುರಕ್ಷತೆ, ಶೈಲಿ ಮತ್ತು ಐಷಾರಾಮಿ ಸಂಯೋಜನೆ ನೀಡುತ್ತದೆ ಮತ್ತು ಪ್ರಸ್ತುತ ಮೂರು ತಿಂಗಳ ಕಾಯುವ ಅವಧಿಯನ್ನು ಹೊಂದಿದೆ.

ಟಿಗ್ವಾನ್ ಕಾರಿನಲ್ಲಿ 7 ಸ್ಪೀಡ್ ಆಟೋಮ್ಯಾಟಿಕ್ ಡಿಎಸ್‌ಜಿ ಗೇರ್‌ಬಾಕ್ಸ್ ಅಳವಡಿಕೆಯಾಗಿದೆ ಮತ್ತು ಈ ಕಾರು 2 ಲೀಟರ್ ಟರ್ಬೊ ಡೀಸೆಲ್ ಎಂಜಿನ್ ಹೊಂದಿದೆ. ಈ ಎಸ್‌ಯುವಿ ಕಾರು MQB ವೇದಿಕೆಯಡಿ ನಿರ್ಮಾಣವಾಗಿದ್ದು, ಇಂಟಲಿಜೆಂಟ್ ಆಲ್-ವೀಲ್-ಡ್ರೈವ್ ತಂತ್ರಜ್ಞಾನ ಪಡೆದುಕೊಂಡಿದೆ.

ಫೋಕ್ಸ್‌ವ್ಯಾಗನ್ ಸಂಸ್ಥೆ ಪ್ರಬಲ ಬೆಳವಣಿಗೆಯನ್ನು ಜುಲೈ ತಿಂಗಳಿನಲ್ಲಿ ದಾಖಲಿಸಿದ್ದು, ಈ ವಿಚಾರದಲ್ಲಿ ಇತ್ತೀಚೆಗೆ ಬಿಡುಗಡೆಯಾದ ಎಸ್‌ಯುವಿ ಕಾರಿನ ಪಾತ್ರ ಅತಿ ದೊಡ್ಡದು ಎನ್ನಬಹುದು. ಹೊಸ ಜಿಎಸ್‌ಟಿ ತೆರಿಗೆ ಸಹ ಬೆಳವಣಿಗೆಯಲ್ಲಿ ಗಮನಾರ್ಹ ಪಾತ್ರವನ್ನು ನಿರ್ವಹಿಸಿದೆ.