ಆಟೋ ಎಕ್ಸ್ ಪೋ 2018: ಮುಂದಿನ ಪೀಳಿಗೆಯ ಅಮೇಜ್ ಪರಿಚಯಿಸಿದ ಹೋಂಡಾ

ಸೆಡಾನ್ ಆವೃತ್ತಿಗಳಲ್ಲಿರುವ ತನ್ನ ಕಾರು ಮಾದರಿಗಳ ಉನ್ನತ್ತೀಕರಣಕ್ಕಾಗಿ ವಿಶೇಷ ಯೋಜನೆ ರೂಪಿಸುತ್ತಿರುವ ಹೋಂಡಾ ಸಂಸ್ಥೆಯು ಅಮೇಜ್ ಸೇರಿದಂತೆ ಎಲ್ಲಾ ಮಾದರಿಗಳಲ್ಲೂ ವಿನೂತನ ತಂತ್ರಜ್ಞಾನ ಪರಿಚಯಿಸುವ ಮೂಲಕ ಸೆಡಾನ್ ಪ್ರಿಯರಿಗೆ ಹೊಸ ಚಾಲನಾ ಅನುಭವ ಒದಗಿಸುತ್ತಿದೆ.

ಹೀಗಾಗಿಯೇ 2018ರ ಅಮೇಜ್ ಸಬ್ ಕಂಪ್ಯಾಕ್ಟ್ ಸೆಡಾನ್ ಕಾರುಗಳಿಗೆ ಹೊಸ ರೂಪ ನೀಡಿರುವ ಹೋಂಡಾ, ಸ್ಪೋಟಿ ಲುಕ್ ಜೊತೆಗೆ ಶಾರ್ಪ್ ಎಡ್ಜ್ ಮೂಲಕ ಗ್ರಾಹಕರ ಆಯ್ಕೆಯನ್ನು ಹೆಚ್ಚಿಸಲು ತವಕವದಲ್ಲಿದೆ.

ಇನ್ನು ಹೊಸ ಅಮೇಜ್‌ಗೆ ರಾಜಸ್ತಾನದ ತಪುಕರಾ ಘಟಕದಿಂದಲೇ ಡೀಸೆಲ್ ಎಂಜಿನ್‌‌ಗಳು ಪೂರೈಕೆಯಾಗಲಿದ್ದು, ಸಬ್‌ ಕಾಂಪ್ಯಾಕ್ಟ್ ಸೆಡಾನ್‌ ಆಗಿರುವ ಹೊಸ ಅಮೇಜ್ 1.5 ಲೀಟರ್‌ ಡೀಸೆಲ್‌ ಎಂಜಿನ್‌ ಹೊಂದಿರಲಿದೆ.

ಹಾಗೆಯೇ ಪೆಟ್ರೋಲ್‌ ಮಾದರಿಯು ಕೂಡಾ 1.2-ಲೀಟರ್‌ ಎಂಜಿನ್‌ ಹೊಂದಿದ್ದು, ಹೊಸದಾಗಿ 7 ಇಂಚಿನ ಡಿಜಿಪ್ಯಾಡ್‌ ಟಚ್‌ಸ್ಕ್ರೀನ್‌ ಮತ್ತು ಇನ್‌ಫೋಟೈನ್‌ಮೆಂಟ್‌ ಸಿಸ್ಟಂ ಇದರಲ್ಲಿರಲಿದೆ.

ಇದು ಸ್ಮಾರ್ಟ್‌ಫೋನ್‌ ಇಂಟಿಗ್ರೇಷನ್‌, ನೇವಿಗೇಶನ್‌ ಸೇರಿದಂತೆ ಹಲವಾರು ಫೀಚರ್‌ಗಳಿಗೆ ಅನುಕೂಲ ಮಾಡಿಕೊಡಲಿದ್ದು, ಹೋಂಡಾ ಸಿಟಿಯ ವಿನ್ಯಾಸವನ್ನು ಸ್ವಲ್ಪ ಮಟ್ಟಿಗೆ ಹೋಲುತ್ತಿದ್ದರೂ, ಇನ್ನಷ್ಟು ಆಕರ್ಷಕವಾಗಿದೆ.

ಬಿಡುಗಡೆ ಯಾವಾಗ?

ಈ ವರ್ಷಾಂತ್ಯಕ್ಕೆ ಮಾರುಕಟ್ಟೆಗೆ ಇದು ಬರುವ ನಿರೀಕ್ಷೆಯಿದ್ದು, ಸದ್ಯ ಕಾರು ಮಾದರಿಗಿಂತ ತುಸು ದುಬಾರಿ ಬೆಲೆ ಹೊಂದಿರಲಿವೆ.

ಒಟ್ಟಿನಲ್ಲಿ ಮಾರುತಿ ಸುಜುಕಿ ಡಿಜೈರ್‌ನ ಯಶಸ್ಸಿನಿಂದ ಪ್ರಭಾವಿತವಾಗಿರುವ ಹೋಂಡಾ ಸಂಸ್ಥೆಯು ಅಮೇಜ್ ಸೆಡಾನ್‌‌ಗೆ ಹೊಸ ರೂಪ ನೀಡಿದ್ದು, ಎಂಜಿನ್‌ ಇನ್ನಷ್ಟು ಇಂಧನ ಕ್ಷಮತೆ ಸಾಧಿಸುವಂತೆ ಮಾಡುವ ನಿಟ್ಟಿನಲ್ಲಿ ಹೊಸ ಪ್ರಯತ್ನಗಳನ್ನು ಮಾಡಲಾಗಿದೆ.