ಇನ್ನೆಂದು ಮಂಗಳೂರು ದುರಂತ ಮರುಕಳಿಸದು; ಬಂದಿದೆ 'ಗಗನ್' ವಿಮಾನ ದಿಕ್ಸೂಚಿ ವ್ಯವಸ್ಥೆ

ಗಗನ್ ದಿಕ್ಸೂಚಿ ವ್ಯವಸ್ಥೆಯು ಭಾರತೀಯ ವಾಯು ವಲಯದಲ್ಲಿ ಆಧುನಿಕ ಸಂವಹನ, ಸಂಚರಣೆ, ಕಣ್ಗಾವಲು ಹಾಗೂ ಏರ್ ಟ್ರಾಫಿಕನ್ನು ಸಮಪರ್ಕವಾಗಿ ನಿರ್ವಹಿಸಲಿದೆ.

ಗಗನ್ ದಿಕ್ಸೂಚಿ ವ್ಯವಸ್ಥೆಯ ಅಭಿವೃದ್ಧಿಗೆ ಸರಿ ಸುಮಾರು 774 ಕೋಟಿ ರುಪಾಯಿಗಳನ್ನು ವ್ಯಯ ಮಾಡಲಾಗಿದೆ. ಪ್ರಮುಖವಾಗಿಯೂ ಏರ್ ಟ್ರಾಫಿಕ್ ನಿಯಂತ್ರಿಸುವುದರಿಂದ ಪ್ರಯಾಣದ ಅವಧಿ ಕಡಿಮೆಯಾಗಲಿದೆ.

ಇದರಿಂದಾಗಿ ಇಂಧನ ಬಳಕೆಯು ಗಣನೀಯವಾಗಿ ಕುಸಿಯಲಿದ್ದು, ವಿಮಾನ ನಿರ್ವಹಣಾ ವೆಚ್ಚದಲ್ಲೂ ಇಳಿಕೆಯುಂಟಾಗಲಿದೆ. ಕ್ರಮೇಣ ಇದು ವಿಮಾನ ಪ್ರಯಾಣ ದರ ಇಳಿಕೆಗೂ ಸಹಕಾರಿಯಾಗಲಿದೆ.

ಮಂಗಳೂರು ಹಾಗೂ ಲೇಹ್ ನಂತಹ ಅತ್ಯಂತ ಕಠಿಣವಾದ ವಿಮಾನ ನಿಲ್ದಾಣಗಳಲ್ಲಿ ಬಹಳ ನಿಖರವಾಗಿ ವಿಮಾನ ಲ್ಯಾಂಡಿಂಗ್ ಮಾಡಲು ನೂತನ ಗಗನ್ ದಿಕ್ಸೂಚಿ ವ್ಯವಸ್ಥೆಯಿಂದ ಸಾಧ್ಯವಾಗಲಿದೆ.

ಗಗನ್ ವಿಮಾನಯಾನ ದಿಕ್ಸೂಚಿ ವ್ಯವಸ್ಥೆಯು ಈಗಿರುವ ಎರಡು ವಿಮಾನಗಳ ಬದಲು 50ರಷ್ಟು ವಿಮಾನಗಳನ್ನು ಏಕಕಾಲದಲ್ಲಿ ಕಾರ್ಯ ನಿರ್ವಹಿಸಲು ನೆರವಾಗಲಿದೆ.

ಈಗಿರುವ ನಿಯಮದ ಪ್ರಕಾರ ಸುರಕ್ಷಿತವಾಗಿ ಲ್ಯಾಂಡಿಂಗ್ ಮಾಡುವಾಗ ಎರಡು ವಿಮಾನಗಳ ನಡುವೆ ಕನಿಷ್ಠ 18 ಕೀ.ಮೀ. ಗಳ ಅಂತರವಿರಬೇಕು. ಪ್ರಸ್ತುತ ಗಗನ್ ವ್ಯವಸ್ಥೆಯೊಂದಿಗೆ ಈ ಅಂತರ ಕೇವಲ 360 ಮೀಟರ್ ಗಳಿಗೆ ಇಳಿಕೆಯಾಗಲಿದೆ.

ದೆಹಲಿಯಂತಹ ದೇಶದ ಪ್ರಮುಖ ನಗರಗಳಲ್ಲಿ ವಿಮಾನ ಪ್ರಯಾಣದ ಅವಧಿಯು ಗಣನೀಯವಾಗಿ ಕುಸಿಯಲಿದೆ. ಲ್ಯಾಂಡಿಂಗ್ ನಿಖರವಾಗಿ ಆಗುವುದರಿಂದ ಸಮಯ ಲಾಭ, ಇಂಧನ ಲಾಭ, ನಿರ್ವಹಣಾ ವೆಚ್ಚ ಕಡಿಮೆ ಹಾಗೂ ಹೆಚ್ಚು ಸುರಕ್ಷಿತವೆನಿಸಲಿದೆ.

ಗಗನ್ ಯೋಜನೆಯಾಗಿ ಭಾರತೀಯ ಸರಕಾರವು 378 ಕೋಟಿ ರು., ಎಎಐ 226 ಕೋಟಿ ರು. ಹಾಗೂ ಉಳಿದ 170 ಕೋಟಿ ರುಪಾಯಿಗಳನ್ನು ಇಸ್ರೋ ಹೂಡಿಕೆ ಮಾಡಿದೆ.

ಇಸ್ರೋ ಬಾಹ್ಯಾಕಾಶಕ್ಕೆ ಕಳುಹಿಸಿ ಕೊಟ್ಟಿರುವ ಜಿಸ್ಯಾಟ್ 8 ಮತ್ತು 10 ಗಳೆಂಬ ಎರಡು ಸಂಪರ್ಕ ಉಪಗ್ರಹಗಳ ಸಿಗ್ನಲ್ ನಿಂದ ಗಗನ್ ಕಾರ್ಯ ನಿರ್ವಹಿಸಲಿದೆ. ಇವುಗಳು ದೇಶದಲ್ಲಿ ಸ್ಥಿತಗೊಂಡಿರುವ 15 ರೆಫೆರನ್ಸ್ ತಾಣಗಳಿಂದ ಸಿಗ್ನಲ್ ಕಲೆ ಹಾಕಲಿದೆ. ಇದರ ಹೊರತಾಗಿ ಬೆಂಗಳೂರು ಸೇರಿದಂತೆ ಮೂರು ಅಪ್ ಲಿಂಕ್ ಸ್ಟೇಷನ್ ಗಳಿರಲಿದೆ.

ಗಗನ್ ಸ್ಯಾಟಲೈಟ್ ನಿಂದ ಸಿಗ್ನಲ್ ಗಳನ್ನು ಪಡೆಯಲು ವಿಮಾನಗಳಲ್ಲಿ ಸ್ಪೇಸ್ ಬೇಸ್ಡ್ ಆಗ್ಮೆಂಟೆಡ್ ಸಿಸ್ಟಂ (ಎಸ್ ಬಿಎಎಸ್) ಲಗತ್ತಿಸುವ ಅಗತ್ಯವಿದೆ.

ಎಸ್ ಬಿಎಎಸ್ ವಿಮಾನಗಳಲ್ಲಿ ಜೋಡಣೆ ಮಾಡಲು ಮತ್ತು ಪೈಲಟ್ ಗೆ ತರಬೇತಿ ನೀಡಲು ಎರಡು ಕೋಟಿ ರುಪಾಯಿಗಳಷ್ಟು ವೆಚ್ಚ ತಗುಲಲಿದೆ. ಇದರಿಂದಾಗಿ ವಿಮಾನಯಾನ ಸಂಸ್ಥೆಗಳು ಹಿಂದೇಟು ಹಾಕುತ್ತಿದೆ ಎಂಬ ಬಗ್ಗೆಯೂ ಎಎಐ ಆತಂಕ ವ್ಯಕ್ತಪಡಿಸಿದೆ.