ಮರದಿಂದ ನಿರ್ಮಿತ ವೆಸ್ಪಾ ಐಕಾನಿಕ್ ಸ್ಕೂಟರ್

By Nagaraja

Published: Friday, September 27, 2013, 15:05 [IST]

ಜಗತ್ತಿನ ಅತಿ ಜನಪ್ರಿಯ ಸ್ಕೂಟರ್ ಬ್ರಾಂಡ್ ವೆಸ್ಪಾ, ಸದಾ ನೂತನ ತಂತ್ರಜ್ಞಾನ ಆವಿಷ್ಕಾರ ಮಾಡುವುದರಲ್ಲಿ ಹೆಸರುವಾಸಿಯಾಗಿದೆ. ಆದರೆ ಈ ಬಾರಿ ಸ್ವಲ್ಪ ವಿಭಿನ್ನವಾಗಿ ಯೋಚಿಸಿರುವ ಇಟಲಿ ಮೂಲದ ಈ ದೈತ್ಯ ಕಂಪನಿಯು, ವೆಸ್ಪಾಗೆ ಸಾಂಪ್ರದಾಯಿಕ ವಿನ್ಯಾಸ ಕಲ್ಪಿಸಿಕೊಡುವ ಪ್ರಯತ್ನ ಮಾಡಿದೆ.

ಇದರ ಫಲಿತಾಂಶವೆಂಬಂತೆ ಮರದಿಂದ ನಿರ್ಮಿತವಾಗಿರುವ ಆಕರ್ಷಕ ವೆಸ್ಪಾ ಸ್ಕೂಟರ್ ತಯಾರುಗೊಂಡಿದೆ. ಪೋರ್ಚುಗೀಸ್ ನಿವಾಸಿ ಕಾರ್ಲೊಸ್ ಅಲ್ಬೆರ್ಟೊ (Carlos Alberto) ಎಂಬ 43ರ ಹರೆಯದ ಕಲಾವಿದ ಈ ಅದ್ಭುತ ಕಲಾಸೃಷ್ಟಿಗೆ ಚುಕ್ಕಾಣಿ ಹಿಡಿದಿದ್ದಾರೆ.

ಆಧುನಿಕ ಯುಗದಲ್ಲಿ ಸ್ಕೂಟರ್‌ಗಳು ಕೇವಲ ಸಂಚಾರಕ್ಕೆ ಮಾತ್ರ ಸೀಮಿತಗೊಂಡಿಲ್ಲ ಎಂಬುದು ಮರದ ಕೆತ್ತನೆಯಿಂದ ತಯಾರಿಸಲ್ಪಟ್ಟಿರುವ ವೆಸ್ಪಾ ಸ್ಕೂಟರ್‌ನಿಂದ ಸಾಬೀತಾಗಿದೆ. ಇಲ್ಲಿ ಕಲೆಗೂ ಕಲಾಗಾರನಿಗೂ ಹೆಚ್ಚು ಪ್ರಾಧಾನ್ಯತೆ ಕೊಡಲಾಗುತ್ತಿದೆ ಎಂಬುದನ್ನು ನಿರೂಪಿಸಲಾಗಿದೆ.

ಅಂದ ಹಾಗೆ 2001ನೇ ಇಸವಿಯಲ್ಲಿ ಅಲ್ಪರ್ಟೊ ಮನದಲ್ಲಿ ವೆಸ್ಪಾ ಸುಂದರಿಗೆ ವಿನೂತನ ವಿನ್ಯಾಸ ಕಲ್ಪಿಸುವ ಕೊಡುವ ಯೋಚನೆ ಹೊಳೆದಿತ್ತು. ತಮ್ಮ ಯೋಜನೆಗೆ ಆರಂಭದಲ್ಲಿ ಸಂಕಷ್ಟಗಳು ಎದುರಾಗಿದ್ದರೂ ಅಂತಿಮದಲ್ಲಿ ಸ್ಟೈಲಿಷ್ ವುಡನ್ ವೆಸ್ಪಾ ನಿರ್ಮಿಸುವಲ್ಲಿ ವಿನ್ಯಾಸಗಾರ ಯಶಸ್ವಿಯಾಗಿದ್ದಾರೆ.

ನೂತನ ಮರದ ಸ್ಕೂಟರಿಗೆ ತಮ್ಮ ಮಗಳ ಹೆಸರನ್ನು ಅಲ್ಬೆರ್ಟೊ ನಾಮಕರಣ ಮಾಡಿದ್ದಾರೆ. ಇದು ವಿಶೇಷವಾಗಿಯೂ ವೆಸ್ಪಾದಲ್ಲಿ ಸಂಚರಿಸಲು ಇಷ್ಟಪಡುವ ತಮ್ಮ ಪುತ್ರಿ ಡ್ಯಾನಿಯೆಲಾಗಾಗಿ (Daniela) ತಯಾರಿಸಲಾಗಿದೆ ಎಂದು ಅಲ್ಪರ್ಟೊ ಹೆಮ್ಮೆಯಿಂದ ಹೇಳಿಕೊಳ್ಳುತ್ತಿದ್ದಾರೆ.

ವೆಸ್ಪಾ ಕ್ಲಬ್ ಫ್ರೀಮುಂಡೆಯ ತಮ್ಮ ಸ್ನೇಹಿತ ನೀಡಿರುವ ಯೋಜನೆಯಂತೆ ಅಲ್ಬೆರ್ಟೊ ತಮ್ಮ ವುಡನ್ ವೆಸ್ಬಾ ತಯಾರಿ ಕಾರ್ಯವನ್ನು ಆರಂಭಿಸಿದ್ದರು.

ಅಲ್ಬೆರ್ಟೊ 2004ರಲ್ಲೇ ವೆಸ್ಪಾ ವುಡನ್ ಸ್ಕೂಟರ್ ನಿರ್ಮಾಣ ಕಾರ್ಯ ಆರಂಭಿಸಬೇಕಾಗಿತ್ತು. ಆದರೆ ಅನಿರೀಕ್ಷಿತವಾಗಿ ಅಪಘಾತವೊಂದಕ್ಕೆ ಸಿಲುಕಿದ್ದರಿಂದ ಮೂರು ವರ್ಷಗಳಷ್ಟು ತಡವಾಗಿ ಅಂದರೆ 2007ರಲ್ಲಿ ತಮ್ಮ ಕಾರ್ಯ ಪುನರಾರಂಭಿಸಿದ್ದರು.

ಅಂತೂ ತಮ್ಮ ಛಲ ಬಿಡದ ಕಾರ್ಲೊಸ್ 2012ರ ಜುಲೈ 12ರಂದು ತಮ್ಮ ಕನಸಿನ ಬೈಕಿಗೆ ಪೂರ್ಣ ರೂಪ ಕೊಡುವಲ್ಲಿ ಯಶಸ್ವಿಯಾಗಿದ್ದರು. ಕಾರ್ಲೊಸ್ ಅವರ ಈ ಪರಿಶ್ರಮಕ್ಕೆ ಪತ್ನಿ ಹಾಗೂ ಪುತ್ರಿಯ ಪೂರ್ಣ ಸಹಕಾರ ಲಭ್ಯವಾಗಿತ್ತು.

ಚಿತ್ರದಲ್ಲಿ ನೀವು ನೋಡುತ್ತಿರುವಂತೆಯೇ ಮರದಿಂದ ಕೆತ್ತನೆ ಮಾಡಲಾದ ಈ ಅಂದವಾದ ಸ್ಕೂಟರ್ ತಯಾರಿಗೆ ಹಲವು ವಿಧದ ಮರಗಳನ್ನು ಬಳಸಲಾಗಿದೆ.

ಇದರಲ್ಲಿ Rosewood, ebony, beech, satin-wood, jatoba, tacula, efi zelia, panga, sucupira ಮತ್ತು sycamore ಗಳಂತಹ ವಿಭಿನ್ನ ಮರಗಳನ್ನು ಬಳಸಲಾಗಿದೆ.

ತಮ್ಮ ನೂತನ ಕಲಾಸೃಷ್ಟಿ ಬಗ್ಗೆ ಅನುಭವ ಹಂಚಿಕೊಂಡಿರುವ ಅಲ್ಬೆರ್ಟೊ, ಇದರ ಮಾನೋಕಾಕ್ ಚಾಸೀಸ್ ವಿನ್ಯಾಸ ರೂಪಿಸಲು ತುಂಬಾನೇ ಕಷ್ಟಕರವಾಗಿತ್ತು ಎಂದಿದ್ದಾರೆ. ಹಾಗೆಯೇ ಮರದ ಹ್ಯಾಂಡಲ್ ಬಾರ್, ಆಕ್ಸೆಸರಿ ಹಾಗೂ ರಿಯರ್ ವೀಲ್ ತಯಾರಿಸುವುದು ಸಹ ಕಷ್ಟಕರವಾದ ಕೆಲಸವಾಗಿತ್ತು ಎಂದು ವಿವರಿಸಿದ್ದಾರೆ.