ಬೆಂಗಳೂರಿನಲ್ಲಿ ಉದ್ಘಾಟನೆಗೊಂಡ ಹಾರ್ಲೆ ಡೇವಿಡ್ಸನ್ ಅತಿದೊಡ್ಡ ಮಾರಾಟ ಮಳಿಗೆ..!!

ರಾಜಧಾನಿ ಬೆಂಗಳೂರಿನಲ್ಲಿ ಈಗಾಗಲೇ 2 ಪ್ರಮುಖ ಮಾರಾಟ ಮಳಿಗೆಗಳನ್ನು ಹೊಂದಿರುವ ಪ್ರತಿಷ್ಠಿತ ಬೈಕ್ ಉತ್ಪಾದನಾ ಸಂಸ್ಥೆ ಹಾರ್ಲೆ ಡೇವಿಡ್ಸನ್, ಗ್ರಾಹಕರ ಬೇಡಿಕೆಗೆ ಅನುಗುಣವಾಗಿ ಮತ್ತೊಂದು ವಿನೂತನ ಮಾರಾಟ ಮಳಿಗೆಯನ್ನು ಉದ್ಘಾಟನೆ ಮಾಡಿರುವುದು ಹಲವು ವಿಶೇಷತೆಗಳಿಗೆ ಕಾರಣವಾಗಿದೆ.

ಬೆಂಗಳೂರಿನ 80 ಫೀಟ್, ಕೋರಮಂಗಲ ರಸ್ತೆಯಲ್ಲಿ ಬಿಸನ್ ಹೆಸರಿನ ಹೊಸ ಹಾರ್ಲೆ ಡೇವಿಡ್ಸನ್ ಮಾರಾಟ ಮಳಿಗೆ ಆರಂಭಗೊಂಡಿದ್ದು, ಬರೋಬ್ಬರಿ 7 ಸಾವಿರ ಚದರ ಅಡಿ ವಿಸ್ತಾರವನ್ನು ಹೊಂದಿದೆ.

ಹೀಗಾಗಿ ಹಾರ್ಲೆ ಡೇವಿಡ್ಸನ್ ಹೊಸ ಮಾರಾಟ ಮಳಿಗೆಯು ಕರ್ನಾಟಕದ ಅತಿದೊಡ್ಡ ಐಷಾರಾಮಿ ಬೈಕ್ ಮಾರಾಟ ಮಳಿಗೆ ಎಂಬ ಹೆಗ್ಗಳಿಕೆ ಪಾತ್ರವಾಗಿದ್ದು, ಒಂದೇ ಬಾರಿಗೆ 14 ವಿವಿಧ ಮಾದರಿಯ ಬೈಕ್‌ಗಳನ್ನು ಪ್ರದರ್ಶನ ಮಾಡಬಹುದಾದ ಸೌಲಭ್ಯವನ್ನು ಹೊಂದಿದೆ.

ಉದ್ಘಾಟನಾ ಕಾರ್ಯಕ್ರಮದಲ್ಲಿ ಮಾತನಾಡಿದ ಹಾರ್ಲೆ ಡೇವಿಡ್ಸನ್ ಎಂಡಿ ಪೀಟರ್ ಮೆಕೆಂಜಿ ಹಾಗೂ ಬಿಸನ್ ಮಾರಾಟ ಮಳಿಗೆ ಎಂಡಿ ವಿಶೇಷ್ ಜಯವಂತ್, "ಐಷಾರಾಮಿ ಬೈಕ್ ಮಾರಾಟಕ್ಕೆ ಬೆಂಗಳೂರು ದೇಶದಲ್ಲೇ ಅತಿದೊಡ್ಡ ಮಾರುಕಟ್ಟೆಯಾಗಿದ್ದು, ಗ್ರಾಹಕರನ್ನು ಸೆಳೆಯುವ ಉದ್ದೇಶದಿಂದಲೇ 3 ನೇ ಮಾರಾಟ ಮಳಿಗೆಯನ್ನು ತೆರೆಯಲಾಗಿದೆ" ಎಂದಿದ್ದಾರೆ.

ಇನ್ನು ಹೊಸ ಮಾರಾಟ ಮಳಿಗೆಯಿಂದಾಗಿ ಹಾರ್ಲೆ ಡೇವಿಡ್ಸನ್ ಬೈಕ್ ಮಾರಾಟಕ್ಕೆ ಮತ್ತಷ್ಟು ಅನುಕೂಲಕರವಾಗಲಿದ್ದು, ಗ್ರಾಹಕರು ಹೊಸ ಬೈಕ್ ಕಾಯುವಿಕೆ ಅವಧಿಯು ತಪ್ಪಲಿದೆ. ಜೊತೆಗೆ ಕಡಿಮೆ ಅವಧಿಯಲ್ಲೇ ಬಿಡಿಭಾಗಗಳ ಸೇವೆಯು ಲಭ್ಯವಾಗಲಿದೆ.

ಡ್ರೈವ್ ಸ್ಪಾರ್ಕ್ ಅಭಿಪ್ರಾಯ

ಈಗಾಗಲೇ ಬೆಂಗಳೂರಿನಲ್ಲಿ ಬಿಸನ್ ಮಾರಾಟ ಮಳಿಗೆಯನ್ನು ಹೊರತು ಪಡಿಸಿ ಎರಡು ಪ್ರಮುಖ ಹಾರ್ಲೆ ಡೇವಿಡ್ಸನ್ ಮಾರಾಟ ಮಳಿಗೆಗಳು ಕೂಡಾ ಕಾರ್ಯನಿರ್ವಹಿಸುತ್ತಿದ್ದು, ಬೈಕ್ ಮಾರಾಟ ಪ್ರಮಾಣ ಹೆಚ್ಚಿಸುವ ನಿಟ್ಟಿನಲ್ಲಿ ಹೊಸ ಮಳಿಗೆಯನ್ನು ಆರಂಭಿಸಲಾಗಿದೆ.