ಲಾಜಿಸ್ಟಿಕ್‌ ಕಂಪನಿ ನಂಬಿದ ರಾಯಲ್ ಎನ್‌ಫೀಲ್ಡ್ ಮಾಲೀಕರಿಗೆ ಕಾದಿತ್ತು ಶಾಕ್..!!

ಹೌದು.. ಆ ಯುವಕರು ಮೂಲತಃ ಕೇರಳದ ಕೊಚ್ಚಿಯವರು. ಕಳೆದ ವಾರ ಪ್ರವಾಸಕ್ಕೆಂದು ಮನಾಲಿಗೆ ತೆರಳಿದ್ದರು. ಹೋಗುವಾಗ ಬೈಕ್‌ನಲ್ಲೇ ಪ್ರವಾಸ ಬೆಳೆಸಿದ್ದ ಯುವಕರ ತಂಡ. ಪ್ರವಾಸ ಮುಗಿಸಿ ವಾಪಸ್ ಬರುವಾಗ ತಮ್ಮ ಬೈಕ್‌ಗಳೊಂದಿಗೆ ಪ್ರಯಾಣ ಬೆಳೆಸಲು ಸಾಧ್ಯವಾಗಿಲ್ಲ. ಹೀಗಾಗಿ ತಮ್ಮ ಬೈಕ್‌ಗಳನ್ನು ಕೇರಳಕ್ಕೆ ತಲುಪಿಸಲು ಲಾಜಿಸ್ಟಿಕ್ ಕಂಪನಿಯೊಂದನ್ನು ಸಂಪರ್ಕಿಸಿದ್ದರು.

ಅಂದುಕೊಂಡಂತೆ ನಿಗದಿ ಅವಧಿಯಲ್ಲಿ ತಮ್ಮ ಊರುಗಳಿಗೆ ರಾಯಲ್ ಎನ್‌ಫೀಲ್ಡ್ ಬೈಕ್‌ಗಳು ತಲುಪಿಸಿರುವ ಗಾಟಿ-ಕೆವಿ ಎನ್ನುವ ಲಾಜಿಸ್ಟಿಕ್ ಸಂಸ್ಥೆಯು ಬೈಕ್ ಮಾಲೀಕರಿಗೆ ಶಾಕ್ ನೀಡಿದೆ.

ಯಾಕೇಂದ್ರೆ ಮನಾಲಿಯಿಂದ ಬಂದ ಲಾಜಿಸ್ಟಿಕ್ ವಾಹನದಲ್ಲಿನ ರಾಯಲ್ ಎನ್‌ಫೀಲ್ಡ್ ಬೈಕ್‌ಗಳ ಸ್ಥಿತಿಗತಿಗಳನ್ನು ಕಂಡು ಬೈಕ್ ಮಾಲೀಕರಿಗೆ ನಂಬಲು ಸಾಧ್ಯವಾಗಿಲ್ಲ. ಇದು ನಮ್ಮ ಬೈಕ್ ಹೌದು ಅಲ್ವೋ ಅನ್ನುವಷ್ಟು ಬದಲಾಗಿ ಹೋಗಿದ್ದವು.

ಅದ್ಯಾವೋ ಪರಿ ವೇಗವಾಗಿ ಲಾಜಿಸ್ಟಿಕ್ ವಾಹನ ಚಾಲನೆ ಮಾಡಿದ್ದರೋ ಏನೋ ಗೊತ್ತಿಲ್ಲಾ. ರಾಯಲ್ ಎನ್‌ಫೀಲ್ಡ್ ಬೈಕ್‌ಗಳು ಸಂಪೂರ್ಣವಾಗಿ ಜಖಂಗೊಂಡು ಗುಜುರಿ ಸೇರೋ ಪರಿಸ್ಥಿತಿಯಲ್ಲಿವೆ.

ಬೈಕ್ ಇಂಡಿಕೇಟರ್, ಹೆಡ್ ಲ್ಯಾಂಪ್, ಬಂಪರ್, ಹ್ಯಾಂಡಲ್, ಪೆಡಲ್, ಫ್ಯೂಲ್ ಟ್ಯಾಂಕ್ ಎಲ್ಲವೂ ಜಖಂಗೊಂಡಿದ್ದು, ಲಕ್ಷಾಂತರ ರೂಪಾಯಿ ಕೊಟ್ಟು ಬೈಕ್ ಖರೀದಿಸಿದ ಮಾಲೀಕರು ರೊಚ್ಚಿಗೆ ಏಳುವಂತೆ ಮಾಡಿದೆ.

ಈ ಬಗ್ಗೆ ಸಾಮಾಜಿಕ ಜಾಲತಾಣದಲ್ಲಿ ಆಕ್ರೋಶ ವ್ಯಕ್ತಪಡಿಸಿರುವ ಬೈಕ್ ಮಾಲೀಕರೊಬ್ಬರು, ತಮಗಾದ ಅನ್ಯಾಯಕ್ಕೆ ಸೂಕ್ತ ಪರಿಹಾರ ನೀಡಬೇಕು ಇಲ್ಲವಾದ್ರೆ ಕೇಸ್ ದಾಖಲಿಸುವ ಬಗ್ಗೆ ಎಚ್ಚರಿಕೆ ನೀಡಿದ್ದಾರೆ.

ಇನ್ನು ಈ ಬಗ್ಗೆ ಪ್ರತಿಕ್ರಿಯೆ ನೀಡದ ಗಾಟಿ-ಕೆವಿ ಸಂಸ್ಥೆಯು ನಂಬಿದ ಗ್ರಾಹಕರಿಗೆ ಮೋಸ ಮಾಡಿದ್ದು, ಈ ಬಗ್ಗೆ ಹಲವರು ಆಕ್ರೋಶ ಕೂಡಾ ವ್ಯಕ್ತಪಡಿಸಿದ್ದಾರೆ.