ಹಾರ್ಲೆ ಡೇವಿಡ್ಸನ್ ಫ್ಯಾಟ್ ಬಾಯ್ ಬೈಕಿನಂತೆ ಮಾಡಿಫೈಗೊಂಡ ಬುಲೆಟ್

ಇದರಿಂದ ಹಲವಾರು ಜನರು ಸೂಪರ್‍‍ಬೈಕಿನ ಮಾದರಿಯಲ್ಲಿ ತಮ್ಮ ಸಾಮಾನ್ಯ ಬೈಕ್ ಅನ್ನು ಮಾಡಿಫೈ ಮಾಡಲು ಬಯಸುತ್ತಾರೆ. ಇದೇ ರೀತಿಯಲ್ಲಿ ದೆಹಲಿ ಬಿಟ್ಟೂ ಬೈಕ್ ಕಸ್ಟಮ್ಸ್ , ಸಾಮಾನ್ಯ ಬೈಕನ್ನು ದುಬಾರಿ ಬೈಕಿನ ಮಾದರಿಯಲ್ಲಿ ಮಾಡಿಫೈ ಮಾಡುತ್ತದೆ. ಇದೀಗ ದೆಹಲಿಯ ಬಿಟ್ಟೂ ಬೈಕ್ ಅವರು ರಾಯಲ್ ಎನ್‍‍ಫೀಲ್ಡ್ ಬುಲೆಟ್ ಅನ್ನು ಹಾರ್ಲೆ ಡೇವಿಡ್ಸನ್ ಫ್ಯಾಟ್ ಬಾಯ್ ಬೈಕ್ ಮಾದರಿಯಲ್ಲಿ ಮಾಡಿಫೈಗೊಳಿಸಿದ್ದಾರೆ.

ಇವರು ಈ ಹಿಂದೆ ಬಜಾಜ್ ಡೋಮಿನಾರ್ 400 ಬೈಕನ್ನು ಸುಜುಕಿ ಹಯಬುಸಾ ಬೈಕಾಗಿ ಮಾಡಿಫೈಗೊಳಿಸಿದ್ದರು. ಹಲವಾರು ವಾಹನ ಪ್ರಿಯರು ದುಬಾರಿ ವಾಹನಗಳ ಮಾದರಿಯಲ್ಲಿ ತಮ್ಮ ವಾಹನಗಳನ್ನು ಮಾಡಿಫೈಗೊಳಿಸಲು ಬಯಸುತ್ತಾರೆ.

ಇನ್ನು ಹಲವು ಯುವಕರಿಗೆ ಹಾರ್ಲೆ ಡೇವಿಡ್ಸನ್ ಫ್ಯಾಟ್ ಬಾಯ್ ಬೈಕನ್ನು ಹೊಂದುವ ಕನಸಿದೆ. ಆದರೆ ಈ ಹಾರ್ಲೆ ಡೇವಿಡ್ಸನ್ ಫ್ಯಾಟ್ ಬಾಯ್ ಬೈಕಿನ ಬೆಲೆಯು ಬರೊಬ್ಬರಿ ರೂ.20 ಲಕ್ಷಗಳಾಗಿದೆ.

ಇದರಿಂದಾಗಿ ದೆಹಲಿಯ ಈ ಕಸ್ಟಮ್ಸ್ ಅವರು ದುಬಾರಿ ಬೈಕ್‍‍ಗಳಂತೆ ಮಾಡಿಫೈ ಮಾಡುತ್ತಾರೆ. ಇದರಿಂದಾಗಿ ದುಬಾರಿ ಬೈಕ್ ಕ್ರೇಜ್ ಇರುವವರಿಗೆ ಇದು ಒಂದು ಉತ್ತಮ ಆಯ್ಕೆಯಾಗಿದೆ.ಮಾಡಿಫೈ ಮಾಡಲಾದ ಈ ಬೈಕಿನಲ್ಲಿ ಫ್ಯಾಟ್ ಬಾಯ್ ಬೈಕಿನ ಬಾಡಿಯನ್ನು ಅಳವಡಿಸಲಾಗಿದೆ.

ಈ ಬೈಕ್ ನೋಡಿದರೆ ಇದು ರಾಯಲ್ ಎನ್‍‍ಫೀಲ್ಡ್ ಬುಲೆಟ್ ಬೈಕ್ ಎಂದು ಯಾರಿಗೂ ಗುರುತಿಸಲು ಸಾಧ್ಯವಾಗದ ಮಟ್ಟಿಗೆ ಈ ಬೈಕನ್ನು ಮಾಡಿಫೈ ಮಾಡಲಾಗಿದೆ. ಈ ಬೈಕಿನ ಎಂಜಿನ್‍ನಲ್ಲಿ ಯಾವುದೇ ಬದಲಾವಣೆಗಳನ್ನು ಮಾಡಲಾಗಿಲ್ಲ.

ಅದೇ ರಾಯಲ್ ಎನ್‍‍ಫೀಲ್ಡ್ ಬುಲೆಟ್ ಬೈಕಿನ ಎಂಜಿನ್ ಅನ್ನು ಅಳವಡಿಸಲಾಗಿದೆ. ಈ ಬೈಕಿನಲ್ಲಿ ಅಳವಡಿಸಿರುವ ರಾಯಲ್ ಎನ್‍ಫೀಲ್ಡ್ ಬುಲೆಟ್ ಬೈಕಿನ ಎಂಜಿನ್ ಅದೇ ಪವರ್ ಮತ್ತು ಟಾರ್ಕ್ ಅನ್ನು ಉತ್ಪಾದಿಸುತ್ತದೆ.

ಪ್ರಸ್ತುತ ಮಾರುಕಟ್ಟೆಯಲ್ಲಿರುವ ಹಾರ್ಲೆ ಡೇವಿಡ್ಸನ್ ಫ್ಯಾಟ್ ಬಾಯ್ ಬೈಕಿನಲ್ಲಿ 1745 ಸಿಸಿ ಟ್ವಿನ್ ಸಿಲಿಂಡರ್ ಎಂಜಿನ್ ಅನ್ನು ಹೊಂದಿದೆ. ಈ ಎಂಜಿನ್ 65 ಬಿ‍‍ಹೆಚ್‍‍ಪಿ ಪವರ್ ಮತ್ತು 144 ಎನ್‍ಎಂ ಟಾರ್ಕ್ ಅನ್ನು ಉತ್ಪಾದಿಸುತ್ತದೆ. ಎಂಜಿನ್‍‍ನೊಂದಿಗೆ 6 ಸ್ಪೀಡ್ ಗೇರ್‍‍ಬಾಕ್ಸ್ ಅನ್ನು ಸ್ಟ್ಯಾಂಡರ್ಡ್ ಆಗಿ ಅಳವಡಿಸಲಾಗಿದೆ.

ಪ್ರಸ್ತುತ ಮಾರುಕಟ್ಟೆಯಲ್ಲಿರುವ ರಾಯಲ್ ಎನ್‍‍ಫೀಲ್ಡ್ ಬುಲೆಟ್ ಬೈಕ್ 500 ಸಿಸಿ ಮತ್ತು 350 ಸಿಸಿ ಸಿಂಗಲ್ ಸಿಲಿಂಡರ್ ಎಂಜಿನ್ ಆಯ್ಕೆಯನ್ನು ಹೊಂದಿದೆ. ರಾಯಲ್ ಎನ್‍‍ಫೀಲ್ಡ್ ಬುಲೆಟ್ 350 ಬೈಕ್ 346 ಸಿಸಿ ಸಿಂಗಲ್ ಸಿಲಿಂಡರ್ ಏರ್ ಕೂಲ್ಡ್ 4 ಸ್ಟ್ರೋಕ್ ಎಂಜಿನ್ ಅನ್ನು ಹೊಂದಿದೆ. ಈ ಎಂಜಿನ್ 5,250 ಆರ್‍‍ಪಿ‍ಎಂನಲ್ಲಿ 19.8 ಬಿ‍‍ಹೆಚ್‍ಪಿ ಪವರ್ ಮತ್ತು 4,000 ಆರ್‍‍ಪಿ‍ಎಂನಲ್ಲಿ 28 ಎನ್‍ಎಂ ಟಾರ್ಕ್ ಅನ್ನು ಉತ್ಪಾದಿಸುತ್ತದೆ.

ಬುಲೆಟ್ 500 ಬೈಕಿನಲ್ಲಿರುವ 499 ಸಿಸಿ ಎಂಜಿನ್ 5,250 ಆರ್‍‍ಪಿ‍ಎಂನಲ್ಲಿ 27.2 ಬಿ‍‍ಹೆಚ್‍‍ಪಿ ಪವರ್ ಮತ್ತು 4,000 ಆರ್‍‍ಪಿಎಂನಲ್ಲಿ 41.3 ಎನ್‍ಎಂ ಟಾರ್ಕ್ ಅನ್ನು ಉತ್ಪಾದಿಸುತ್ತದೆ. ಆದರೆ ಬಿಎಸ್-6 ಮಾಲಿನ್ಯ ನಿಯಮ ಜಾರಿಯಾಗುತ್ತಿರುವುದರಿಂದ ಒಂದು ದಶಕಗಳ ಕಾಲ ಭಾರತದಲ್ಲಿ ಪಾರುಪತ್ಯ ಮೆರೆದ ರಾಯಲ್ ಎನ್‍‍ಫೀಲ್ಡ್ 500 ಸಿಸಿ ಸೆಗ್‍‍ಮೆಂಟ್‍ನ ಬೈಕ್‍ಗಳು ಇತಿಹಾಸ ಪುಟ ಸೇರಿವೆ.