ಕಾರನ್ನೇ ಜಾಸ್ತಿ ಆಶ್ರಯಿಸಿಕೊಂಡಿರುವ ದೆಹಲಿ ನೌಕರರು!

2011 ಜನಗಣತಿ ವರದಿ ಪ್ರಕಾರ ದೆಹಲಿಯಲ್ಲಿ ಅತ್ಯಧಿಕ ಅಂದರೆ ಶೇಕಡಾ 10.79ರಷ್ಟು ಮಂದಿ ಕೆಲಸಗಾರರು ಪ್ರಯಾಣಕ್ಕಾಗಿ ಕಾರು ಅಥವಾ ಜೀಪ್ ಅಥವಾ ವ್ಯಾನ್ ಬಳಕೆ ಮಾಡುತ್ತಿದ್ದಾರೆ.

ಈ ಪಟ್ಟಿಯಲ್ಲಿ ಎರಡು ಹಾಗೂ ಮೂರನೇ ಸ್ಥಾನಗಳನ್ನು ಹಂಚಿಕೊಂಡಿರುವ ಚೆನ್ನೈ ಹಾಗೂ ಮುಂಬೈ ನಗರಗಳಲ್ಲಿ ಈ ಪ್ರಮಾಣವು ಅನುಕ್ರಮವಾಗಿ ಶೇಕಡಾ 6.14 ಹಾಗೂ 4.78ರಷ್ಟಾಗಿದೆ.

ನಾಲ್ಕು ಹಾಗೂ ಐದನೇ ಸ್ಥಾನಗಳಲ್ಲಿ ಕೋಲ್ಕತ್ತಾ ಹಾಗೂ ಬೆಂಗಳೂರು ನಗರಗಳಿದ್ದು, ಅನುಕ್ರಮವಾಗಿ ಶೇಕಡಾ 2.93 ಹಾಗೂ 2.72ರಷ್ಟು ಮಂದಿ ಕೆಲಸಗಾರರು ಕಾರು, ಜೀಪ್ ಅಥವಾ ವ್ಯಾನ್ ಗಳಲ್ಲಿ ಸಂಚರಿಸುತ್ತಾರೆ.

ಕೇಂದ್ರ ಸಾರಿಗೆ ಸಚಿವಾಲಯ ಬಿಡುಗಡೆ ಮಾಡಿರುವ ವರದಿಯ ಪ್ರಕಾರ ದೆಹಲಿಯಲ್ಲಿ ಗರಿಷ್ಠ ಸಂಖ್ಯೆಯ ಕಾರುಗಳಿವೆ. ಅದೇ ವೇಳೆ ಮೆಟ್ರೋ ಸೇವೆಯು ನಗರದಲ್ಲಿನ ವಾಹನ ದಟ್ಟಣೆಯನ್ನು ಗಣನೀಯವಾಗಿ ಇಳಿಕೆ ಮಾಡಲು ಸಹಕಾರಿಯಾಗಿದೆ. ವಾರದ ದಿನಗಳಲ್ಲಿ ಬೆಳಗ್ಗೆ 8ರಿಂದ 11 ಗಂಟೆಯ ವರೆಗೆ ಅತಿ ಹೆಚ್ಚು ಸರಿ ಸುಮಾರು ಒಂದು ಲಕ್ಷ ಪ್ರಯಾಣಿಕರು ಮೆಟ್ರೋ ರೈಲು ಸೇವೆಯನ್ನು ಬಳಕೆ ಮಾಡುತ್ತಿದ್ದಾರೆ.

ದೆಹಲಿ ಮೆಟ್ರೋದಲ್ಲಿ ಬೆಳಗ್ಗೆ ಹಾಗೂ ಸಾಯಂಕಾಲ ಅತಿ ಹೆಚ್ಚು ಮಂದಿ ಪ್ರಯಾಣಿಸುತ್ತಿದ್ದು, ರೈಲು ಕಿಕ್ಕಿರಿದು ತುಂಬುವಂತಾಗಿದೆ. ಇದರಿಂದಾಗಿ ಪ್ರಯಾಣಿಕರಿಗೆ ಮತ್ತೆ ಕಾರನ್ನು ಆಯ್ಕೆ ಮಾಡುವಂತೆ ಪ್ರೇರೇಪಿಸುತ್ತದೆ. ಅಲ್ಲದೆ ಕಾರುಗಳು ಪ್ರತಿಷ್ಠೆಯ ಸಂಕೇತವೂ ಹೌದು ಎಂಬುದನ್ನು ಪ್ರಯಾಣಿಕರೊಬ್ಬರು ಅಭಿಪ್ರಾಯಪಡುತ್ತಾರೆ.

ಇನ್ನೊಂದೆಡೆ ಚೆನ್ನೈನಲ್ಲಿ ಕಳಪೆ ಸಂಪರ್ಕ ಹಾಗೂ ಸಾರಿಗೆ ವ್ಯವಸ್ಥೆಗಳಿಗಳಿಂದಾಗಿ ಅನೇಕ ವೃತ್ತಿಪರರು ಕಾರು ಹಾಗೂ ವ್ಯಾನ್ ಗಳನ್ನು ಆಯ್ಕೆ ಮಾಡುವಂತಾಗಿದೆ. ಇಲ್ಲೂ ಪ್ರಯಾಣಿಕರು ಹೇಳುವಂತೆಯೇ ಕಾರು ಅಥವಾ ಆಟೋ ಇಲ್ಲದೆ ಕಚೇರಿಗೆ ತಲುಪುವುದು ಕಷ್ಟಕರವಾಗಿದೆ ಎಂಬುದು ಉಲ್ಲೇಖಿಸಲಾಗಿದೆ.

ಮಾಹಿತಿ ಮತ್ತು ತಂತ್ರಜ್ಞಾನದಲ್ಲಿ ಕೆಲಸ ಮಾಡುವವರು ಬಸ್ ಹಾಗೂ ರೈಲುಗಳಂತಹ ಸಾರ್ವಜನಿಕ ಸಂಚಾರ ವ್ಯವಸ್ಥೆಗಳನ್ನು ಒಂದು ಪರಿಧಿಯ ವರೆಗೆ ಮಾತ್ರ ಬಳಕೆ ಮಾಡುತ್ತಿದ್ದಾರೆ. ತದಾ ಬಳಿಕ ಆಟೋ, ಕ್ಯಾಬ್ ಅಥವಾ ಕಾರುಗಳನ್ನು ಆಶ್ರಯಿಸಿಕೊಂಡಿದ್ದಾರೆ ಎಂಬುದನ್ನು ತಿಳಿಸಲಾಗಿದೆ.

ಅದೇ ರೀತಿ ಕೋಲ್ಕತ್ತಾ ನಗರದಲ್ಲಿ ಶೇಕಡಾ 3ರಷ್ಟು ಕೆಲಸಗಾರರು ಮಾತ್ರ ಕೆಲಸಕ್ಕೆ ತೆರಳುವಾಗ ಕಾರನ್ನು ಬಳಕೆ ಮಾಡುತ್ತಾರೆ. ಉಳಿದಂತೆ ಬಸ್, ರೈಲು, ಟ್ಸಾಕ್ಸಿ ಹಾಗೂ ಆಟೋಗಳಂತಹ ಸಾರ್ವಜನಿಕ ಸಂಚಾರ ಮಾರ್ಗವನ್ನು ಬಳಕೆ ಮಾಡುತ್ತಾರೆ.

ಅತಿ ಸಮರ್ಥ್ಯ ಲೋಕಲ್ ರೈಲ್ವೇ ಜಾಲವನ್ನು ಹೊಂದಿರುವ ಕೋಲ್ಕತ್ತಾದಲ್ಲಿ ಒಂದು ದಿನದಲ್ಲಿ 35 ಲಕ್ಷ ಮಂದಿ ಸಂಚರಿಸುತ್ತಾರೆ. ಈ ಪೈಕಿ ನಗರದ ಪ್ರಮುಖ ಕಚೇರಿಗಳನ್ನು ತಲುಪುವ ಇಲ್ಲಿನ ಮೆಟ್ರೋ ದೈನಂದಿನ ಐದು ಲಕ್ಷ ಪ್ರಯಾಣಿಕರನ್ನು ಹೊತ್ತೊಯ್ಯುತ್ತಿದೆ. ಅಂತೆಯೇ ಟ್ಸಾಕ್ಸಿಗಳಲ್ಲಿ 16 ಲಕ್ಷ ಮಂದಿ ಹಾಗೂ ಶೇಕಡಾ 6ರಿಂದ 7ರಷ್ಟು ಟ್ರಾಂಗಳಲ್ಲಿ ಸಂಚರಿಸುತ್ತಾರೆ.

ವಿಶ್ವ ಬ್ಯಾಂಕ್ ನಿಂದ ದೇಶದ ಅತ್ಯಂತ ಸಮರ್ಥನೀಯ ಸಾರಿಗೆ ವ್ಯವಸ್ಥೆ ಎಂಬ ಹೆಗ್ಗಳಿಕೆಗೂ ಕೋಲ್ಕತ್ತಾ ನಗರ ಪಾತ್ರವಾಗಿದೆ.

ಜಗತ್ತಿನ 10 ವಾಹನ ನಿಬಿಡ ಜಂಕ್ಷನ್