ನಿಮ್ಮ ಆಲ್ಟೊ ಈಗ ಹೆಚ್ಚು ಸುರಕ್ಷಿತ

By Nagaraja

Published: Saturday, January 16, 2016, 16:33 [IST]

ದೇಶದ ನೆಚ್ಚಿನ ಕಾರು ಆಲ್ಟೊ ಈಗ ಹೆಚ್ಚು ಸುರಕ್ಷಿತವೆನಿಸಿದೆ. ಹೌದು, ದೇಶದ ಅತಿ ದೊಡ್ಡ ಪ್ರಯಾಣಿಕ ಕಾರು ಸಂಸ್ಥೆಯಾಗಿರುವ ಮಾರುತಿ ಸುಜುಕಿ, ತನ್ನ ಜನಪ್ರಿಯ ಆಲ್ಟೊ ಮಾದರಿಯ ಎಲ್ಲ ವೆರಿಯಂಟ್ ಗಳಿಗೂ ಚಾಲಕ ಬದಿಯ ಏರ್ ಬ್ಯಾಗ್ ನೀಡಲು ನಿರ್ಧರಿಸಿದೆ.

ಮಾರುತಿ ಆಲ್ಟೊ 800 ಹಾಗೂ ಆಲ್ಟೊ ಕೆ10 ವೆರಿಯಂಟ್ ಗಳಲ್ಲೂ ಐಚ್ಚಿಕ ಚಾಲಕ ಬದಿಯ ಏರ್ ಬ್ಯಾಗ್ ಲಭ್ಯವಾಗಲಿದೆ. ಇದರೊಂದಿಗೆ ಮಾರುತಿ ಆಲ್ಟೊ ಹೆಚ್ಚು ಸುರಕ್ಷಿತವೆನಿಸಿಕೊಳ್ಳಲಿದೆ.

ಸತತವಾಗಿ 10ನೇ ವರ್ಷವೂ ದೇಶದ ಅತಿ ಹೆಚ್ಚು ಮಾರಾಟವಾಗುತ್ತಿರುವ ಕಾರೆಂಬ ಗೌರವಕ್ಕೆ ಪಾತ್ರವಾಗಿರುವ ಮಾರುತಿ ಆಲ್ಟೊ ಮುಂದಿನ ದಿನಗಳಲ್ಲೂ ಗರಿಷ್ಠ ಮಾರಾಟವನ್ನು ಗುರಿಯಾಗಿರಿಸಿಕೊಂಡಿದೆ.

ಇತ್ತೀಚೆಗಿನ ಕೆಲವು ತಿಂಗಳುಗಳಿಂದ ಕಾರುಗಳ ಭದ್ರತೆಗೂ ಹೆಚ್ಚಿ ಮಹತ್ವವನ್ನು ಕೊಡುತ್ತಿರುವ ಮಾರುತಿ ತನ್ನ ಎಸ್ ಕ್ರಾಸ್ ಹಾಗೂ ಬಲೆನೊ ಮಾದರಿಗಳಲ್ಲೂ ಏರ್ ಬ್ಯಾಗ್ ಜೊತೆ ಎಬಿಎಸ್ ಮತ್ತು ಇಬಿಡಿ ಸ್ಟ್ಯಾಂಡರ್ಡ್ ಆಗಿ ನೀಡಿದ್ದವು.

ತದಾ ಬಳಿಕ ಸಿಯಾಝ್, ಎರ್ಟಿಗಾ, ಡಿಜೈರ್, ವ್ಯಾಗನಾರ್ ಮತ್ತು ಸೆಲೆರಿಯೊ ಮಾದರಿಗಳಲ್ಲಿ ಐಚ್ಚಿಕ ಡ್ಯುಯಲ್ ಏರ್ ಬ್ಯಾಗ್, ಎಬಿಎಸ್ ಜೊತೆ ಇಬಿಡಿ ಆಯ್ಕೆಯನ್ನು ನೀಡಿತ್ತು.

ಚಾಲಕ ಬದಿಯ ಏರ್ ಬ್ಯಾಗ್ ಜೊತೆಗೆ ಎಡಬದಿಯಲ್ಲಿ ಹೊರಗಡೆ ರಿಯರ್ ವ್ಯೂ ಮಿರರ್ ಸೌಲಭ್ಯವೂ ಲಭ್ಯವಾಗಲಿದೆ ಎಂದು ಸಂಸ್ಥೆ ಸ್ಪಷ್ಟಪಡಿಸಿದೆ.

2014-15 ಆರ್ಥಿಕ ಸಾಲಿನಲ್ಲಿ ಪ್ರತಿ ತಿಂಗಳಲ್ಲಿ ಸರಾಸರಿ 22,000 ಯುನಿಟ್ ಗಳ ಮಾರಾಟವನ್ನು ಕಾಯ್ದುಕೊಂಡಿರುವ ಮಾರುತಿ ಆಲ್ಟೊ ದೇಶದೆಲ್ಲೆಡೆ ಒಟ್ಟಾರೆ 29 ಲಕ್ಷಕ್ಕೂ ಹೆಚ್ಚು ಮಾರಾಟವನ್ನು ಕಂಡಿದೆ.