ಕ್ವಿಡ್, ರೆಡಿ ಗೊ ಎಫೆಕ್ಟ್? ಮಾರುತಿ ಆಲ್ಟೊಗೆ ಭಾರಿ ಡಿಸ್ಕೌಂಟ್

ಬಲ್ಲ ಮೂಲಗಳ ಪ್ರಕಾರ ರಾಷ್ಟ್ರ ರಾಜಧಾನಿ ನವದೆಹಲಿಯಲ್ಲಿ ಮಾರುತಿ ಡೀಲರುಗಳು ಆಲ್ಟೊ 800 ಖರೀದಿ ವೇಳೆಯಲ್ಲಿ ಗರಿಷ್ಠ 82,000 ರು.ಗಳ ವರೆಗೆ ಡಿಸ್ಕೌಂಟ್ ನೀಡುತ್ತಿದ್ದಾರೆ.

ನ್ನೊಂದೆಡೆ ದಶಕಗಳಿಂದಲೂ ದೇಶದ ಅಗ್ರ ಮಾರಾಟವಾಗುವ ಕಾರೆಂಬ ಪಟ್ಟ ಗಿಟ್ಟಿಸಿಕೊಂಡಿರುವ ಆಲ್ಟೊ 800ಗೆ ಮುಂಬೈನಲ್ಲಿ 55,000 ರು.ಗಳ ರಿಯಾಯಿತಿ ದರ ನೀಡಲಾಗುತ್ತಿದೆ.

ಆಲ್ಟೊ 800 ಎಲ್‌ಎಕ್ಸ್ ಐ ಮಾದರಿಗೆ ಡಿಸ್ಕೌಂಟ್ ನೀಡಲಾಗುತ್ತಿದೆ. ಇದರ ಹೊರತಾಗಿ ಲಾಯಲ್ಟಿ ಬೋನಸ್, ಎಕ್ಸ್ ಚೇಂಜ್ ಬೋನಸ್, ಕಾರ್ಪೋರೇಟ್, ಸರ್ಕಾರಿ ಡಿಸ್ಕೌಂಟ್ ಗಳು ಲಭ್ಯವಾಗಲಿದೆ.

ಮಾರುತಿ ಇತ್ತೀಚೆಗಷ್ಟೇ ಪರಿಷ್ಕೃತ ಮಾರುತಿ 800 ಕಾರನ್ನು ಬಿಡುಗಡೆಗೊಳಿಸಿತ್ತು. ತನ್ಮೂಲಕ ತನ್ನ ಅಗ್ರಸ್ಥಾನವನ್ನು ಭದ್ರವಾಗಿಟ್ಟುಕೊಳ್ಳುವ ಇರಾದೆಯಲ್ಲಿದೆ.

ಇನ್ನೊಂದೆಡೆ ಮಾರುಕಟ್ಟೆಗೆ ಪ್ರವೇಶಿಸಿದ 10 ತಿಂಗಳಲ್ಲೇ 1.25 ಲಕ್ಷ ಯುನಿಟ್ ಗಳ ಬುಕ್ಕಿಂಗ್ಸ್ ಗಿಟ್ಟಿಸಿಕೊಂಡಿರುವ ರೆನೊ ಕ್ವಿಡ್ ದೇಶದ ಜನಪ್ರಿಯ ಮಾದರಿಗೆ ನಿಕಟ ಪೈಪೋಟಿಯನ್ನು ಒಡ್ಡುತ್ತಿದೆ.

ಅತ್ತ ಜೂನ್ 07ರಂದು ಮಾರುಕಟ್ಟೆಗೆ ಪರಿಚಯಿಸಿರುವ ದಟ್ಸನ್ ರೆಡಿ ಗೊ ಸ್ಪರ್ಧಾತ್ಮಕ ಬೆಲೆ ಕಾಪಾಡಿಕೊಂಡಿದ್ದು, ದೆಹಲಿ ಎಕ್ಸ್ ಶೋ ರೂಂ ಬೆಲೆ 2.38 ಲಕ್ಷ ರು.ಗಳಿಗೆ ಬಿಡುಗಡೆಗೊಂಡಿತ್ತು. ಇದರಲ್ಲಿರುವ 799 ಸಿಸಿ ತ್ರಿ ಸಿಲಿಂಡರ್ ಎಂಜಿನ್ 72 ಎನ್ ಎಂ ತಿರುಗುಬಲದಲ್ಲಿ 53 ಅಶ್ವಶಕ್ತಿಯನ್ನು ಉತ್ಪಾದಿಸುತ್ತದೆ. ಅಲ್ಲದೆ ಪ್ರತಿ ಲೀಟರ್ ಗೆ 25.17 ಕೀ.ಮೀ. ಮೈಲೇಜ್ ನೀಡುವ ಸಾಮರ್ಥ್ಯ ಹೊಂದಿರಲಿದೆ.

ಏತನ್ಮಧ್ಯೆ ಮಾರುತಿ ಆಲ್ಟೊ 800 ಪ್ರತಿ ಲೀಟರ್ ಗೆ 22.74 ಕೀ.ಮೀ. ಮೈಲೇಜ್ ನೀಡುವ ಸಾಮರ್ಥ್ಯ ಹೊಂದಿರುತ್ತದೆ. ಇದರಲ್ಲಿರುವ 796 ಸಿಸಿ ಎಂಜಿನ್ 69 ಎನ್ ಎಂ ತಿರುಗುಬಲದಲ್ಲಿ 47 ಅಶ್ವಶಕ್ತಿಯನ್ನು ಉತ್ಪಾದಿಸುತ್ತದೆ. ಹಾಗೆಯೇ ಫೈವ್ ಸ್ಪೀಡ್ ಗೇರ್ ಬಾಕ್ಸ್ ಇದರಲ್ಲಿದೆ.

ರೆನೊ ಕ್ವಿಡ್ ಸಹ ರೆಡಿ ಗೊ ಕಾರಿಗೆ ಸಮಾನವಾದ 799 ಸಿಸಿ ಎಂಜಿನ್ ನಿಂದ ನಿಯಂತ್ರಿಸಲ್ಪಡುತ್ತಿದ್ದು, 72 ಎನ್ ಎಂ ತಿರುಗುಬಲದಲ್ಲಿ 54 ಅಶ್ವಶಕ್ತಿ ಉತ್ಪಾದಿಸಲಿದೆ. ಇದು ಕೂಡಾ ಫೈವ್ ಸ್ಪೀಡ್ ಗೇರ್ ಬಾಕ್ಸ್ ಪಡೆದಿದ್ದು, ಪ್ರತಿ ಲೀಟರ್ ಗೆ 25 ಕೀ.ಮೀ. ಮೈಲೇಜ್ ನೀಡಲಿದೆ.