ಮುಂದಿನ ವರ್ಷದ ಅಂತ್ಯದ ವೇಳೆಗೆ ಮಾರುತಿ ಎರ್ಟಿಗಾ ಫೇಸ್‌ಲಿಫ್ಟ್ ಭಾರತದಲ್ಲಿ ಬಿಡುಗಡೆ ?

ಮಾರುತಿ ಸಂಸ್ಥೆಯು ತನ್ನ ಎಂಪಿವಿ ಮಾದರಿಯ ಎರ್ಟಿಗಾ ಕಾರನ್ನು 2012ರಲ್ಲಿ ಭಾರತೀಯ ಮಾರುಕಟ್ಟೆಗೆ ಪರಿಚಯಿಸಿತ್ತು. ಕಳೆದ ಐದು ವರ್ಷಗಳಲ್ಲಿ, ಈ ವಾಹನವು ಭಾರತದಲ್ಲಿ ಕೇವಲ ಒಮ್ಮೆ ಮಾತ್ರ ಸಣ್ಣ ಫೇಸ್‌ಲಿಫ್ಟ್ ಆಯ್ಕೆಯನ್ನು ಪಡೆದುಕೊಂಡಿದೆ, ಆದರೆ ಸದ್ಯ ಬಂದಿರುವ ಮಾಹಿತಿ ಪ್ರಕಾರ ಈ ಕಾರು ನವೀಕರಣಗೊಂಡು ಬಿಡುಗಡೆಯಾಗಲಿದೆ.

ಸುಜುಕಿ ಇಂಡೊಮೊಬಿಲ್ ಕಂಪನಿಯ ಮಾರ್ಕೆಟಿಂಗ್ ಹೆಡ್ ಡೊನ್ನಿ ಅವರು ಈ ಪ್ರಕಟಣೆಗಳನ್ನು ದೃಢಪಡಿಸಿದ್ದು, ಈಗಾಗಲೇ ಈ ಹೊಚ್ಚ ಹೊಸ ಫೇಸ್ ಲಿಫ್ಟ್ ಕಾರಿನ ಅಭಿವೃದ್ಧಿಗೆ ಕೈಹಾಕಲಾಗಿದೆ ಎಂಬ ವಿಚಾರ ತಿಳಿದುಬಂದಿದೆ.

ಸದ್ಯ ಬಿಡುಗಡೆಗೆ ಸಿದ್ಧವಾಗಿರಿರುವ ಸ್ವಿಫ್ಟ್ ಕಾರಿನ ತಂತ್ರಜ್ಞಾನವನ್ನೇ ಈ ಕಾರೂ ಸಹ ಪಡೆದುಕೊಳ್ಳಲಿದ್ದು, ಮುಂದಿನ ಪೀಳಿಗೆಯ HEARTECT ಪ್ಲೇಟ್‌ಫಾರಂ ಆಧಾರವನ್ನು ಈ ಕಾರು ಪಡೆದುಕೊಳ್ಳಲಿದೆ.

ಹೊಸದಾಗಿ ಅಭಿವೃದ್ಧಿಪಡಿಸಲಾಗಿರುವ ಈ HEARTECT ಪ್ಲೇಟ್‌ಫಾರಂನಿಂದಾಗಿ ಕಾರಿನ ತೂಕವನ್ನು ಕಡಿಮೆ ಮಾಡಲು ಸಹಾಯವಾಗಲಿದ್ದು, ತೂಕದ ಉಳಿತಾಯದ ಜೊತೆಗೆ, ಈ ಎಂಪಿವಿ ಮಾದರಿ ಹೆಚ್ಚು ಇಂಧನ ಕ್ಷಮತೆ ಹೊಂದಲಿದೆ.

ಹೊಸ ಸ್ವಿಫ್ಟ್ ಮತ್ತು ಡಿಜೈರ್ ಕಾರಿನಲ್ಲಿ ನೀಡಲಾಗಿರುವ ಹೊಸ ಡ್ಯಾಶ್‌ಬೋರ್ಡ್ ಈ ಕಾರು ಸಹ ಪಡೆಯಬಹುದು ಎಂಬ ಮಾಹಿತಿ ಇದ್ದು, ಈ ಮೂಲಕ ಆಪಲ್ ಕಾರ್‌ಪ್ಲೇ, ಆಂಡ್ರಾಯ್ಡ್ ಆಟೋ ಮತ್ತು ಮಿರರ್ ಲಿಂಕ್‌ನೊಂದಿಗೆ ಹೊಸ ಟಚ್‌ಸ್ಕ್ರೀನ್ ಸಿಸ್ಟಮ್ ತನ್ನದಾಗಿಸಿಕೊಳ್ಳಲಿದೆ ಎನ್ನಬಹುದು.

ಎಂಜಿನ್ ಬಗ್ಗೆ ಹೇಳುವುದಾದರೆ, ಈ ಕಾರು ಡಿಡಿಐಎಸ್ 200 ಮಾದರಿಯಲ್ಲಿ 1.3 ಲೀಟರ್ ಡೀಸೆಲ್ ಎಂಜಿನ್ ಹೊಂದಿರುತ್ತದೆ. ಪೆಟ್ರೋಲ್ ಎಂಜಿನ್‌ಗೆ ಸಂಬಂಧಿಸಿದಂತೆ, ಕಂಪೆನಿಯು ಹೊಸ 1.5 ಲೀಟರ್ ಎಂಜಿನ್ ಮೇಲೆ ಕಾರ್ಯನಿರ್ವಹಿಸುತ್ತಿದ್ದು, ಈ ಬಗ್ಗೆ ಯಾವುದೇ ಸ್ಪಷ್ಟತೆಯನ್ನು ಕಂಪನಿ ನೀಡಿಲ್ಲ.