ಹೊಸ ಕಾರುಗಳ ಖರೀದಿ ಕಾಯುವಿಕೆ ಅವಧಿಯನ್ನು ತಗ್ಗಿಸಲಿದೆ ಮಾರುತಿ ಸುಜುಕಿ..!!

ಪ್ರಸ್ತುತ ದಿನಗಳಲ್ಲಿ ಹೊಸ ಕಾರು ಖರೀದಿಗೂ ಮುನ್ನ ಬುಕ್ಕಿಂಗ್ ನಂತರ ತಿಂಗಳುಗಟ್ಟಲೇ ಕಾಯಬೇಕಾದ ಪರಿಸ್ಥಿತಿ ಇದೆ. ಇದರಿಂದ ಗ್ರಾಹಕರು ತಮ್ಮ ಆಯ್ಕೆಯಲ್ಲಿ ಬದಲಾವಣೆ ಮಾಡಿ ಮಗದೊಂದು ಕಾರು ಆಯ್ಕೆ ಎದುರು ನೋಡುವ ಅನಿವಾರ್ಯತೆಯಿದ್ದು, ಇದನ್ನು ತಡೆಯಲು ಮಾರುತಿ ಸುಜುಕಿ ಹೊಸ ಯೋಜನೆಯೊಂದನ್ನು ರೂಪಿಸಿದೆ.

ಸದ್ಯ ಮಾರುತಿ ಸುಜುಕಿ ನಿರ್ಮಾಣದ ಬಲೆನೊ ಮತ್ತು ವಿಟಾರಾ ಬ್ರಿಝಾ ಖರೀದಿ ಮಾಡಬೇಕಾದ್ರೆ 20 ವಾರ ಕಾಲ ಕಾಯಬೇಕಾದ ಪರಿಸ್ಥಿತಿಯಿದ್ದು, ಇನ್ಮುಂದೆ ಇದು 6 ರಿಂದ 10 ವಾರಗಳಿಗೆ ಇಳಿಕೆಯಾಗುವ ಸಾಧ್ಯತೆಗಳಿವೆ.

ಇದಕ್ಕೆ ಕಾರಣ ಮಾರುತಿ ಸುಜುಕಿ ಸಂಸ್ಥೆಯು ಗುಜರಾತಿನಲ್ಲಿ ಮತ್ತೊಂದು ಹೊಸ ಕಾರು ಉತ್ಪಾದನಾ ಘಟಕವನ್ನು ತೆರೆದಿದ್ದು, ಮುಂದಿನ ತಿಂಗಳಿನಿಂದ ಕಾರು ಉತ್ಪಾದನಾ ಪ್ರಕ್ರಿಯೆಗೆ ಅಧಿಕೃತವಾಗಿ ಚಾಲನೆ ದೊರೆಯಲಿದೆ.

ಒಂದು ವೇಳೆ ಹೊಸ ಉತ್ಪಾದನಾ ಘಟಕದಲ್ಲಿ ಕಾರು ಉತ್ಪಾದನೆಗೆ ಸದ್ಯದಲ್ಲೇ ಚಾಲನೆ ಸಿಕ್ಕಿದಲ್ಲಿ ಕಾರು ಉತ್ಪಾದನಾ ಪ್ರಕ್ರಿಯೆ ದ್ವಿಗುಣಗೊಳ್ಳಲಿದ್ದು, ಗ್ರಾಹಕರ ಆಯ್ಕೆಗೆ ಸುಲಭವಾಗುವ ಮೂಲಕ ಮಾರಾಟ ಪ್ರಕ್ರಿಯೆಯೂ ಹೆಚ್ಚಳವಾಗುವ ನೀರಿಕ್ಷೆಯಿದೆ.

ಇದರಲ್ಲದೇ ಕಳೆದ ಏಪ್ರಿಲ್- ಆಗಸ್ಟ್ ವೇಳೆ ಒಟ್ಟು 91 ಸಾವಿರ ಹ್ಯಾಚ್‌ಬ್ಯಾಕ್ ಮಾದರಿಗಳನ್ನು ಉತ್ಪಾದನೆ ಮಾಡಿರುವ ಮಾರುತಿ ಸುಜುಕಿ, ಈ ವರ್ಷದ ಹಣಕಾಸಿನ ಅವಧಿಗೆ ಒಟ್ಟು 1.50 ಲಕ್ಷ ಕಾರುಗಳನ್ನು ಉತ್ಪಾದನೆ ಮಾಡುವ ಗುರಿಹೊಂದಿದೆ.

ಇದೇ ಉದ್ದೇಶದಿಂದಲೇ ಸದ್ಯಕ್ಕೆ ಲಭ್ಯವಿರುವ ಕಾರು ಉತ್ಪಾದನಾ ಘಟಕಗಳ ಉತ್ಪಾದನಾ ಸಾಮರ್ಥ್ಯ ಹೆಚ್ಚಳ ಜೊತೆ ಜೊತೆಗೆ ಹೊಸದೊಂದು ಉತ್ಪಾದನಾ ಘಟಕಕ್ಕೆ ಚಾಲನೆ ನೀಡಲಾಗುತ್ತಿದ್ದು, ಬಲೆನೊ ಮತ್ತು ವಿಟಾರಾ ಬ್ರಿಝಾ ನಿಗದಿತ ಅವಧಿಯಲ್ಲಿ ಗ್ರಾಹಕರ ಬೇಡಿಕೆಗೆ ಅನುಗುಣವಾಗಿ ಕಾರು ಪೂರೈಕೆ ಮಾಡುವಲ್ಲಿ ಸಾಧ್ಯವಾಗಲಿದೆ.

ಡ್ರೈವ್ ಸ್ಪಾರ್ಕ್ ಅಭಿಪ್ರಾಯ

ಉತ್ತಮ ಕಾರ್ಯಕ್ಷಮತೆ ಹೊಂದಿರುವ ಮಾರುತಿ ಸುಜುಕಿ ಉತ್ಪನ್ನಗಳ ಖರೀದಿಗೆ ಗ್ರಾಹಕರು ಮುಂದಾಗುವುದು ಕಾಮನ್. ಆದ್ರೆ ಒಂದು ಕಾರು ಖರೀದಿ ಮಾಡಬೇಕಾದ್ರೆ ಸದ್ಯದ ಪರಿಸ್ಥಿತಿಯಲ್ಲಿ 20 ವಾರಗಳ ಕಾಲ ಕಾಯಬೇಕಿದ್ದು, ಹೊಸ ಕಾರು ಉತ್ಪಾದನಾ ಘಟಕವು ಈ ಸಮಸ್ಯೆಯನ್ನು ತಡೆಯುವಲ್ಲಿ ಸಹಕಾರಿಯಾಗಲಿದೆ.