ನ್ಯಾನೋ ಕಾರಿನ ಭವಿಷ್ಯದ ಬಗ್ಗೆ ಮಾಹಿತಿ ನೀಡಿದ ಟಾಟಾ

ಭಾರತದಲ್ಲಿನ ಅತ್ಯಂತ ಅಗ್ಗವಾದ ಕಾರು ಎಂಬ ಖ್ಯಾತಿಗೆ ಪಾತ್ರವಾಗಿರುವ ನ್ಯಾನೋ ಕಾರು ಟಾಟಾ ಕಂಪನಿಯ ಮುಖ್ಯಸ್ಥರಾದ ರತನ್ ಟಾಟಾ ಅವರ ಕನಸಿನ ಕೂಸು ಎಂಬುದು ನಮಗೆಲ್ಲರಿಗೂ ತಿಳಿದಿರುವ ವಿಚಾರವೇ ಆಗಿದೆ. ಹೀಗಿರುವಾಗ, ಕಂಪನಿಯು ಈ ಕಾರಿನ ಉತ್ಪಾದನೆಯನ್ನು ಥಟ್ಟನೆ ಕೊನೆಗೊಳಿಸಲು ಬಯಸುವುದಿಲ್ಲ ಎಂದು ಹೇಳಿಕೆ ನೀಡಿದೆ.

ಟಾಟಾ ಮೋಟರ್ಸ್ ನಿಯಮಿತವಾಗಿ ತನ್ನ ಉತ್ಪನ್ನದ ಕೌಶಲ್ಯವನ್ನು ಪರಿಶೀಲಿಸುತ್ತಿದ್ದು, ಮುಂಬರುವ ತಿಂಗಳುಗಳಲ್ಲಿ ನವೀಕರಣದ ಬಗ್ಗೆ ಹೆಚ್ಚಿನ ಮಾಹಿತಿ ನೀಡಲಿದೆ ಎಂದು ಕಂಪನಿಯ ವಕ್ತಾರರು ತಿಳಿಸಿದ್ದಾರೆ.

ಇತ್ತೀಚಿನ ದಿನಗಳಲ್ಲಿ, ಭಾರತದಲ್ಲಿ ನ್ಯಾನೊ ಕಾರಿನ ಭವಿಷ್ಯದ ಬಗ್ಗೆ ಬಹಳಷ್ಟು ಚರ್ಚೆಗಳು ನೆಡೆಯುತ್ತಿದ್ದು, ಪ್ರಯಾಣಿಕರ ವಾಹನದ ತಂತ್ರವನ್ನು ಪರಿಗಣಿಸುವ ಮೂಲಕ ಉತ್ಪನ್ನದ ಬಗ್ಗೆ ನಿರ್ಧಾರ ತೆಗೆದುಕೊಳ್ಳಲಾಗುವುದು ಎಂದು ಅವರು ತಿಳಿಸಿದರು.

ಟಾಟಾ ಮೋಟಾರ್ಸ್ ನ್ಯಾನೋ ಕಾರಿನ ಭವಿಷ್ಯವನ್ನು ರೂಪಾಂತರಿಸಲು ಸಾಕಷ್ಟು ರೀತಿಯಲ್ಲಿ ಶ್ರಮಿಸುತ್ತಿದ್ದು, ಇತ್ತೀಚೆಗೆ ಕೊಯಮತ್ತೂರು ಬಳಿ ನ್ಯಾನೋ ಕಾರಿನ ಎಲೆಕ್ಟ್ರಿಕ್ ಮಾದರಿಯನ್ನು ಪರೀಕ್ಷೆಗೆ ಒಳಪಡಿಸಿದ್ದನ್ನು ಈ ಹಿಂದೆ ನಾವು ವರದಿ ಮಾಡಿದ್ದೆವು.

"ನಮ್ಮ ಪಿವಿ(ಪ್ಯಾಸೆಂಜರ್ ವಾಹನ) ತಂತ್ರಗಾರಿಕೆಯಲ್ಲಿ ನ್ಯಾನೋ ಕಾರು ಪ್ರಮುಖ ಪಾತ್ರ ವಹಿಸುತ್ತದೆ, ಏಕೆಂದರೆ ಇದು ಮಿನಿ ಹ್ಯಾಚ್‌ಬ್ಯಾಕ್ ವಿಭಾಗದಲ್ಲಿ ನಮ್ಮ ಏಕೈಕ ಉತ್ಪನ್ನವಾಗಿದ್ದು, ಖರೀದಿದಾರನ ದೃಷ್ಟಿಕೋನದಿಂದ ಬಹಳ ಮುಖ್ಯವಾದ ವಾಹನವಾಗಿದೆ" ಎಂದು ಟಾಟಾ ಮೋಟಾರ್ಸ್ ವಕ್ತಾರರು ಹೇಳಿದರು.