ವಾಹನ ಮಾರಾಟ ಹೆಚ್ಚಳಕ್ಕೆ ರಸ್ತೆ ತೆರಿಗೆ ಕಡಿಮೆಗೊಳಿಸಲಿದೆ ಈ ರಾಜ್ಯ

ಆಟೋಮೊಬೈಲ್ ಉದ್ಯಮದಲ್ಲಿನ ಕುಸಿತಕ್ಕೆ ಹಲವಾರು ಕಾರಣಗಳಿವೆ. ಅವುಗಳಲ್ಲಿ ಪ್ರಮುಖವಾದುವೆಂದರೆ ಆರ್ಥಿಕ ಹಿಂಜರಿತ, ಹೆಚ್ಚಿನ ಪ್ರಮಾಣದ ಜಿ‍ಎಸ್‍‍ಟಿ ತೆರಿಗೆ, ಒಲಾ ಹಾಗೂ ಉಬರ್ ಕಂಪನಿಗಳ ಪೈಪೋಟಿ, ಟ್ರಾಫಿಕ್ ಸಮಸ್ಯೆ ಹಾಗೂ 2020ರ ಏಪ್ರಿಲ್ 1ರಿಂದ ಜಾರಿಗೆ ಬರಲಿರುವ ಬಿ‍ಎಸ್ 6 ಮಾಲಿನ್ಯ ನಿಯಮಗಳು.

ಕುಸಿದಿರುವ ವಾಹನಗಳ ಮಾರಾಟಕ್ಕೆ ಉತ್ತೇಜನ ನೀಡುವ ಸಲುವಾಗಿ ಹಲವಾರು ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ. ಕೇಂದ್ರ ಸರ್ಕಾರವು ಮಾತ್ರವಲ್ಲದೇ ಹಲವಾರು ರಾಜ್ಯ ಸರ್ಕಾರಗಳೂ ಸಹ ಹಲವು ಕ್ರಮಗಳನ್ನು ಕೈಗೊಳ್ಳುತ್ತಿವೆ.

ಗೋವಾ ರಾಜ್ಯ ಸರ್ಕಾರವು ಈ ನಿಟ್ಟಿನಲ್ಲಿ ಮಹತ್ವದ ಹೆಜ್ಜೆಯನ್ನಿಟ್ಟಿದೆ. ವಾಹನಗಳ ಮಾರಾಟವನ್ನು ಉತ್ತೇಜಿಸುವ ಸಲುವಾಗಿ ಗೋವಾ ಸರ್ಕಾರವು ರಸ್ತೆ ತೆರಿಗೆಯನ್ನು 50%ನಷ್ಟು ಕಡಿತಗೊಳಿಸಲಿದೆ. ನಿನ್ನೆ ಗೋವಾ ಸರ್ಕಾರವು ಈ ಸಂಬಂಧ ನಿರ್ಣಯವನ್ನು ಕೈಗೊಂಡಿದೆ.

ಗೋವಾ ಸರ್ಕಾರವು ಅಕ್ಟೋಬರ್‍‍ನಿಂದ ಮುಂದಿನ ಮೂರು ತಿಂಗಳವರೆಗೆ ರಸ್ತೆ ತೆರಿಗೆಯನ್ನು 50%ನಷ್ಟು ಕಡಿತಗೊಳಿಸಲಿದೆ. ಇದರಿಂದ ವಾಹನಗಳ ಮಾರಾಟವು ಏರಿಕೆಯಾಗಬಹುದೆಂದು ನಿರೀಕ್ಷಿಸುತ್ತಿದೆ. ಈ ಬಗ್ಗೆ ಗೋವಾದ ಸಾರಿಗೆ ಸಚಿವ ಮೌವಿನ್ ಕುಟಿನೊರವರು ಮಾತನಾಡಿದ್ದಾರೆ.

ಪ್ರತಿದಿನ ವಾಹನಗಳ ಮಾರಾಟವನ್ನು ಹೆಚ್ಚಿಸುವ ಸಲುವಾಗಿ ಜಾಹೀರಾತುಗಳನ್ನು ನೀಡಲಾಗುತ್ತಿದೆ. ಅದರಂತೆ ವಾಹನಗಳ ಮಾರಾಟವನ್ನು ಹೆಚ್ಚಿಸುವ ಸಲುವಾಗಿ ಗೋವಾದಲ್ಲಿ ರಸ್ತೆ ತೆರಿಗೆಯನ್ನು ಕಡಿತಗೊಳಿಸಲಾಗುವುದು ಎಂದು ಮೌವಿನ್ ಕುಟಿನೊರವರು ಹೇಳಿದರು.

ಹಬ್ಬದ ಹಿನ್ನೆಲೆಯಲ್ಲಿ ಸರ್ಕಾರದ ಈ ನಿರ್ಧಾರದಿಂದಾಗಿ ವಾಹನಗಳ ಮಾರಾಟವು ಹೆಚ್ಚಾಗುವ ಸಾಧ್ಯತೆಗಳಿವೆ ಎಂದ ಸಚಿವರು, ರಸ್ತೆ ತೆರಿಗೆಯನ್ನು ಕಡಿತಗೊಳಿಸುವ ಸಂಬಂಧದ ಕಡತವನ್ನು ಅನುಮೋದನೆಗೆ ಕಳುಹಿಸಲಾಗಿದೆ.

MOST READ: ಸದ್ದಿಲ್ಲದೇ ಕಾರುಗಳನ್ನು ರಿಕಾಲ್ ಮಾಡುತ್ತಿದೆ ಮಾರುತಿ

ಅಕ್ಟೋಬರ್, ನವೆಂಬರ್ ಹಾಗೂ ಡಿಸೆಂಬರ್ ತಿಂಗಳುಗಳಲ್ಲಿ ರಸ್ತೆ ತೆರಿಗೆಯನ್ನು ಕಡಿಮೆ ಮಾಡಲಾಗುವುದು ಎಂದು ಹೇಳಿದರು. ವಾಹನಗಳ ಮಾರಾಟವು ಗೋವಾದಲ್ಲಿಯೂ ಸಹ ಗಣನೀಯವಾಗಿ ಕುಸಿದಿದೆ.

MOST READ: ಹಳೆ ವಾಹನವನ್ನು ಗುಜರಿಗೆ ಹಾಕುವ ಮಾಲೀಕರಿಗೆ ಆಫರ್

ಸಾರಿಗೆ ಇಲಾಖೆಯ ಅಧಿಕಾರಿಯೊಬ್ಬರ ಪ್ರಕಾರ ಜನರ ಖರೀದಿಸುವ ಶಕ್ತಿಯು ಕುಸಿದಿದೆ. ಜಿ‍ಎಸ್‍‍ಟಿ ತೆರಿಗೆ ದರವು ಇದರ ಕಾರಣಗಳಲ್ಲಿ ಒಂದಾಗಿದೆ. ಈ ಹಣಕಾಸು ವರ್ಷದ ಮೊದಲ ನಾಲ್ಕು ತಿಂಗಳಲ್ಲಿ ಗೋವಾದಲ್ಲಿನ ವಾಹನಗಳ ಮಾರಾಟವು 15%ನಷ್ಟು ಕುಸಿದಿದೆ.

MOST READ: ವಾಹನ ಸವಾರರಿಗೆ ಸಿಹಿ ಸುದ್ದಿ ನೀಡಿದ ಸಚಿವ ನಿತಿನ್ ಗಡ್ಕರಿ ..!

2019ರ ಏಪ್ರಿಲ್ - ಜುಲೈ ತಿಂಗಳ ಅವಧಿಯಲ್ಲಿ 19,485 ವಾಹನಗಳ ಮಾರಾಟವಾಗಿದ್ದರೆ, 2018ರ ಏಪ್ರಿಲ್ - ಜುಲೈ ತಿಂಗಳ ಅವಧಿಯಲ್ಲಿ 22,480 ವಾಹನಗಳು ಮಾರಾಟವಾಗಿದ್ದವು. ಗೋವಾ ಸರ್ಕಾರದ ಈ ನಿರ್ಧಾರದಿಂದ ವಾಹನಗಳ ಮಾರಾಟ ಪ್ರಮಾಣವು ಹೆಚ್ಚಾಗಲಿದೆಯೇ ಎಂಬುದನ್ನು ಕಾದು ನೋಡಬೇಕಿದೆ.