ಜಲಾವೃತ ಚೆನ್ನೈನಲ್ಲಿ ಓಲಾ ಉಚಿತ ಬೋಟ್ ಸೇವೆ

By Nagaraja

Published: Wednesday, November 18, 2015, 9:31 [IST]

ಟ್ಯಾಕ್ಸಿ ಸೇವೆಯಿಂದಲೇ ಬೆಂಗಳೂರು ಸೇರಿದಂತೆ ದೇಶದ ಪ್ರಮುಖ ನಗರಗಳಲ್ಲಿ ಜನಪ್ರಿಯವೆನಿಸಿರುವ ಓಲಾ ಕ್ಯಾಬ್ಸ್ ಈಗ ಪ್ರವಾಹದಿಂದ ತುಂಬಿ ಹರಿಯುತ್ತಿರುವ ಚೆನ್ನೈನಲ್ಲಿ ಅತಿ ವಿಶಿಷ್ಟ ಬೋಟ್ ಸೇವೆಯನ್ನು ಆರಂಭಿಸುವ ಮೂಲಕ ರಕ್ಷಣಾ ಕಾರ್ಯಾಚರಣೆಗೆ ಚುರುಕು ಮುಟ್ಟಿಸಿದೆ.

ಕಳೆದ ಕೆಲವು ದಿನಗಳಲ್ಲಿ ಚೆನ್ನೈನಲ್ಲಿ ಸುರಿಯುತ್ತಿರುವ ಭಾರಿ ಮಳೆಗೆ ಪ್ರವಾಹದ ಸ್ಥಿತಿಯುಂಟಾಗಿದ್ದು, ಈ ನಿಟ್ಟಿನಲ್ಲಿ ಸಂತ್ರಸ್ತ ಜನರಿಗೆ ಸುರಕ್ಷಿತ ಪ್ರದೇಶಕ್ಕೆ ತಲುಪಲು ಓಲಾ ಉಚಿತ ಬೋಟ್ ಸರ್ವೀಸ್ ನೀಡುತ್ತಿದೆ. ಪ್ರಸ್ತುತ ಓಲಾ ಮಾಡಿರುವ ಪ್ರಯತ್ನವು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಮೆಚ್ಚುಗೆಗೆ ಪಾತ್ರವಾಗಿದೆ.

ಚೆನ್ನೈ ಹಾಗೂ ಸಮೀಪದ ಪ್ರದೇಶಗಳಲ್ಲಿ ಸುರಿಯುತ್ತಿರುವ ಭಾರಿ ಮಳೆಗೆ 70ಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದು, ವಾಹನ ಸಂಚಾರ ಸಂಪೂರ್ಣ ಅಸ್ತವ್ಯಸ್ತಗೊಂಡಿದೆ.

ಪ್ರಸ್ತುತ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿರುವ ಓಲಾ ಕ್ಯಾಬ್ಸ್, ಜಲಾವೃತ ಪ್ರದೇಶಗಳಿಗೆ ಬೋಟ್ ರವಾನಿಸಿದೆ. ಆರಂಭದಲ್ಲಿ ಜನರಲ್ಲಿ ಹಾಸ್ಯ ಮೂಡಿಸಿದರೂ ಬಳಿಕ ಓಲಾ ಮಹತ್ವದ ಬಗ್ಗೆ ಅರಿವಿಗೆ ಬಂದಿದೆ.