ಬಲಿಷ್ಠ ಚೀನಾದಿಂದ ಜಗತ್ತಿನ ಅತಿ ದೊಡ್ಡ 'ಜಲವಿಮಾನ'; ಉದ್ದೇಶವೇನು?

ಎಜಿ600 ಜಲವಿಮಾನದ ಪ್ರಮುಖ ವೈಶಿಷ್ಟ್ಯವೆಂದರೆ 4506 ಕೀ.ಮೀ. ವ್ಯಾಪ್ತಿಯಲ್ಲಿ ಕಾರ್ಯಾಚರಿಸುವ ಸಾಮರ್ಥ್ಯವನ್ನು ಹೊಂದಿದ್ದು, ಕೇವಲ 20 ಸೆಕೆಂಡುಗಳಲ್ಲೇ 12 ಟನ್ ನೀರನ್ನು ಸಂಗ್ರಹಿಸುವ ಶಕ್ತಿ ಹೊಂದಿದೆ.

ಚೀನಾ ವಿಮಾನಯಾನ ಉದ್ಯಮ ಕಾರ್ಪೋರೇಷನ್ ಎಜಿ600 ವಿಮಾನವನ್ನು ಅನಾವರಣಗೊಳಿಸಿದ್ದು, ಗರಿಷ್ಠ 53.5 ಟನ್ ಭಾರವನ್ನು ಹೊತ್ತೊಯ್ಯುವ ಸಾಮರ್ಥ್ಯವನ್ನು ಹೊಂದಿರುತ್ತದೆ.

ವಿದೇಶಿ ಜಲವಿಮಾನಗಳನ್ನು ಅವಲಂಬಿಸದೇ ತನ್ನದೇ ಆದ ಸ್ವಾವಲಂಬನೆ ಹೊಂದುವುದು ಚೀನಾ ಗುರಿಯಾಗಿತ್ತು. ಪ್ರಸ್ತುತ ವಿಮಾನವೀಗ ಎಚ್-4 ಹರ್ಕ್ಯುಲಸ್ ಜಲವಿಮಾನವನ್ನು ಎರಡನೇ ಸ್ಥಾನಕ್ಕೆ ತಳ್ಳಿದೆ.

1940ರ ದಶಕದಲ್ಲಿ ನಿರ್ಮಾಣವಾಗಿರುವ ಹರ್ಕ್ಯುಲಸ್ ಜಲವಿಮಾನದ ಏಕ ಮಾತ್ರ ಯುನಿಟ್ ನಿರ್ಮಾಣವಾಗಿತ್ತು. ಆದರೂ ಈಗಲೂ ಎಜಿ600 ವಿಮಾನದ ರೆಕ್ಕೆಗಿಂತಲೂ ಹೆಚ್ಚು ಅಗಲವಾದ ರೆಕ್ಕೆಯನ್ನು ಕಾಪಾಡಿಕೊಂಡಿದೆ.

ಪರಿಸರ ಪರಿವೀಕ್ಷಣೆ, ಸಂಪನ್ಮೂಲ ಪತ್ತೆ ಹಚ್ಚುವಿಕೆ, ಸಾಗಣೆ ಹಾಗೂ ರಕ್ಷಣಾ ಕಾರ್ಯಾಚರಣೆಗಳಿಗಾಗಿ ನೂತನ ಜಲವಿಮಾನವನ್ನು ಬಳಕೆ ಮಾಡಲಾಗುವುದು.

ಸಮುಂದ್ರ ನೀರಿನ ಸಂಪನ್ಮೂಲ ಬಳಕೆಗೆ ಸಂಬಂಧಪಟ್ಟಂತೆ ಜಪಾನ್, ವಿಯೆಟ್ನಾಂ, ಪಿಲಿಪೈನ್ಸ್ ಜೊತೆ ಭಿನ್ನಮತವನ್ನು ಹೊಂದಿರುವ ಚೀನಾಗೆ ನೂತನ ಜಲವಿಮಾನ ಆಗಮನವು ಆನೆ ಬಲ ತುಂಬಿದಂತಾಗಿದೆ.

ದಕ್ಷಿಣ ಚೀನಾದ ಸಮುದ್ರ ಪರಿಧಿಯಲ್ಲಿ ಅನೇಕ ರೀತಿಯ ಕಾರ್ಯಾಚರಣೆಗಳಿಗಾಗಿ ಜಲವಿಮಾನದ ನೆರವನ್ನು ಪಡೆಯುವ ಇರಾದೆಯನ್ನು ಚೀನಾ ಹೊಂದಿದೆ.

ಎಜಿ600 ನಾಗರಿಕ ಜೊತೆಗೆ ಮಿಲಿಟರಿ ಬಳಕೆಗೂ ಉಪಯೋಗಿಸಬಹುದು ಎಂಬುದಿಲ್ಲಿ ಗಮನಾರ್ಹವೆನಿಸುತ್ತದೆ. ತನ್ಮೂಲಕ ಏಷ್ಯಾದ ನಂ.1 ಚೀನಾ ಮತ್ತಷ್ಟು ಬಲಿಷ್ಠಗೊಂಡಿದೆ.