ಚೀನಾ ನೆರವಿನೊಂದಿಗೆ ಪಾಕ್ ಮಾಸ್ಟರ್ ಪ್ಲಾನ್‌ಗೆ ಭಾರತದ 'ತೇಜಸ್' ಖಡಕ್ ಜವಾಬ್

By Nagaraja

Published: Thursday, October 13, 2016, 11:21 [IST]

ಸರ್ಜಿಕಲ್ ದಾಳಿ ಬಳಿಕ ಭಾರತ ಮತ್ತು ಪಾಕಿಸ್ತಾನ ನಡುವಣ ಮಿಲಿಟರಿ ಬಲಾಬಲದ ಹೋಲಿಕೆ ದಿನಂದಿನೇ ಹೆಚ್ಚಾಗುತ್ತಿದೆ. 'ಇಬ್ಬರ ಜಗಳ ಮೂರನೇಯವನಿಗೆ ಲಾಭ' ಎನ್ನುವ ಮಾತಿನ ಹಾಗೆ ಭಾರತ ಮತ್ತು ಪಾಕಿಸ್ತಾನ ನಡುವ ಉದ್ವಿಗ್ನ ಪರಿಸ್ಥಿತಿಯ ಸಂಪೂರ್ಣ ಲಾಭ ಪಡೆಯಲು ಚೀನಾ ಪಣತೊಟ್ಟಿದೆ. ಜಾಗತಿಕ ಮಟ್ಟದಲ್ಲಿ ಅಶ್ವಶಕ್ತಿಯಾಗಿರುವ ಚೀನಾ ಮಿಲಿಟರಿ ಬೆಳವಣಿಗೆಯನ್ನು ಭಾರತ ಬಹಳ ಸೂಕ್ಷ್ಮವಾಗಿ ವೀಕ್ಷಿಸಬೇಕಿದೆ. ಭಾರತ ಏನೇ ಅತ್ಯಾಧುನಿಕ ಯುದ್ಧ ವಿಮಾನ ಅಭಿವೃದ್ಧಿಪಡಿಸಿದರೂ ಪಾಕಿಸ್ತಾನ ಅದಕ್ಕೆ ಪ್ರತಿಯಾಗಿ ಚೀನಾ ನೆರವಿನೊಂದಿಗೆ ಮಿಲಿಟರಿ ಬಲ ವೃದ್ಧಿಸಿಕೊಳ್ಳುತ್ತಿದೆ. ಉನ್ನಲು ಆಹಾರವಿಲ್ಲದಿದ್ದರೂ, ಉಡಲು ಬಟ್ಟೆಯಿಲ್ಲದಿದ್ದರೂ ಶಸ್ತ್ರಾಸ್ತ್ರ ಅಭಿವೃದ್ಧಿಗೆ ಮಾತ್ರ ಪಾಕಿಸ್ತಾನ ಕೋಟಿಗಟ್ಟಲೆ ರುಪಾಯಿಗಳನ್ನು ಸುರಿಯುತ್ತಿದೆ. ಚೀನಾ ಸಹಾಯದೊಂದಿಗೆ ಪಾಕಿಸ್ತಾನ ಅತ್ಯಾಧುನಿಕ ಜೆಎಫ್-17 ಥಂಡರ್ ಫೈಟರ್ ಜೆಟನ್ನು ಅಭಿವೃದ್ಧಿಗೊಳಿಸಿತ್ತು. ಇದಕ್ಕೆ ಪ್ರತಿಯಾಗಿ ಭಾರತ 'ತೇಜಸ್' ಅಭಿವೃದ್ಧಿಗೊಳಿಸುವ ಮೂಲಕ ತಕ್ಕ ಉತ್ತರವನ್ನೇ ನೀಡಿದೆ.

ಚೀನಾ ನೆರವಿನೊಂದಿಗೆ ಪಾಕ್ ಮಾಸ್ಟರ್ ಪ್ಲಾನ್‌ಗೆ ಭಾರತದ 'ತೇಜಸ್' ಖಡಕ್ ಜವಾಬ್

ಚೀನಾದ ಚೆಂಗ್ಡು ವೈಮಾನಿಕ ಉದ್ಯಮ ಕಾರ್ಪೊರೇಷನ್ (AVIC) ಜೊತೆಗಾರಿಕೆಯಲ್ಲಿ ಪಾಕಿಸ್ತಾನ ಏರೋನಾಟಿಕಲ್ಸ್ ಕಾಂಪ್ಲೆಕ್ಸ್ (ಪಿಎಸಿ), ಅತ್ಯಂತ ಶಕ್ತಿಶಾಲಿ ಜೆಎಫ್-17 ಥಂಡರ್ ಫೈಟರ್ ಜೆಟನ್ನು ನಿರ್ಮಿಸಿತ್ತು.

ಹಗುರ ಭಾರದ ಸಿಂಗಲ್ ಎಂಜಿನ್ ನಿಯಂತ್ರಿತ ಬಹು ಕ್ರಿಯಾತ್ಮಕ ಯುದ್ಧ ವಿಮಾನವಾಗಿರುವ ಪಿಎಸಿ ಜೆಎಫ್-17 ಥಂಡರ್, ವೈಮಾನಿಕ ದಾಳಿ ಜೊತೆಗೆ ಬೇಹುಗಾರಿಕೆಗೆ, ನೆಲ ದಾಳಿ ಮತ್ತು ವಿಮಾನ ಪ್ರತಿಬಂಧಕಗಳಿಗೆ ಬಳಕೆ ಮಾಡಲಾಗುತ್ತದೆ.

ಗಾಳಿಯಿಂದ ಗಾಳಿಗೆ ಹಾಗೂ ಆಕಾಶದಿಂದ ನೆಲಕ್ಕೆ ದಾಳಿಯಿಡುವ ಸಾಮರ್ಥ್ಯದ ಜೆಎಫ್-17 ಥಂಡರ್ ಫೈಟರ್ ಜೆಟ್ ಗಂಟೆಗೆ 2205 ಕೀ.ಮೀ. ವೇಗದಲ್ಲಿ 3,000 ಕೀ.ಮೀ. ವ್ಯಾಪ್ತಿಯಲ್ಲಿ ಕಾರ್ಯಾಚರಣೆ ನಡೆಸುವಷ್ಟು ಸಮರ್ಥವಾಗಿದೆ.

ಪಾಕಿಸ್ತಾನ ವಾಯುಸೇನೆಯ ಬೆನ್ನೆಲುಬು ಆಗಿ ಇದನ್ನು ಪರಿಗಣಿಸಲಾಗುತ್ತದೆ. ಇದನ್ನು ತಲಾ ಶೇಕಡಾ 50ರಷ್ಟು ಪಾಲುದಾರಿಕೆಯನ್ನು ಅಭಿವೃದ್ಧಿಪಡಿಸಲಾಗಿದೆ.

ಆದರೆ ಇದ್ಯಾವುದಕ್ಕೂ ಭಾರತವೀಗ ಹೆದರುವ ಅಗತ್ಯವಿಲ್ಲ. ಆಗಲೇ ಪಾಕಿಸ್ತಾನದ ಜೆಎಫ್-17 ಥಂಡರ್ ಫೈಟರ್ ಜೆಟ್ ಗಿಂತಲೂ ಹೆಚ್ಚು ಬಲಶಾಲಿಯಾಗಿರುವ ತೇಜಸ್ ಹಗುರ ಯುದ್ಧ ವಿಮಾನವನ್ನು ಭಾರತ ಅಭಿವೃದ್ಧಿಪಡಿಸಿದೆ.

33 ವರ್ಷಗಳಿಂದ ನಿರ್ಮಾಣ ಹಂತದಲ್ಲಿದ್ದ ತೇಜಸ್ ಯುದ್ಧ ವಿಮಾನವನ್ನು ಕಳೆದ ಮೇ ತಿಂಗಳಲ್ಲಿ ವಾಯುಪಡೆ ಮುಖ್ಯಸ್ಥ ಏರ್ ಚೀಫ್ ಮಾರ್ಷಲ್ ಅರೂಪ್ ರಾಹಾ, ಪ್ರಾಯೋಗಿಕ ಪರೀಕ್ಷೆ ನಡೆಸುವ ಮೂಲಕ ಜೂನಲ್ಲಿ ಮೊದಲ ಹಾರಾಟಕ್ಕೆ ಗ್ರೀನ್ ಸಿಗ್ನಲ್ ನೀಡಿದ್ದರು.

ಭಾರತೀಯ ವಾಯುಸೇನೆ ಯುದ್ಧ ವಿಮಾನ ಹಾಗೂ ಬಿಡಿಭಾಗಗಳನ್ನು ಪೂರೈಕೆ ಮಾಡುತ್ತಿರುವ ಬೆಂಗಳೂರು ತಳಹದಿಯ ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್ (ಎಚ್ ಎಎಲ್) ಸಂಪೂರ್ಣವಾಗಿಯೂ ಸ್ವದೇಶಿ ತಂತ್ರಜ್ಞಾನದ ತೇಜಸ್ ಯುದ್ಧ ವಿಮಾನವನ್ನು ಅಭಿವೃದ್ಧಿಪಡಿಸಿದೆ.

ಈ ಮೊದಲು ತಾಂತ್ರಿಕ ವೈಫ್ಯಲ್ಯ ಹಾಗೂ ಅನೇಕ ಕಾರಣಾಂತರಗಳಿಂದಾಗಿ ಯೋಜನೆ ವಿಳಂಬಗೊಂಡಿತ್ತು. ಸಿಂಗಲ್ ಎಂಜಿನ್ ನಿಯಂತ್ರಿತ ಬಹು ಪಾತ್ರಧಾರಿ ವಿಶ್ವದ ಅತಿ ಕಿರಿಯ ಮತ್ತು ಲಘು ಗಾತ್ರದ ಸೂಪರ್ ಸೋನಿಕ್ ಫೈಟರ್ ಜೆಟ್ ಗಳಲ್ಲಿ ಒಂದಾಗಿದೆ.

ಸ್ವದೇಶಿ ನಿರ್ಮಿತವಾದರೂ ಈಗಲೂ ಅನೇಕ ಉಪಕರಣಗಳನ್ನು ವಿದೇಶದಿಂದ ಆಮದು ಮಾಡಲಾಗಿದೆ. ಉದಾಹರಣೆಗೆ ತೇಜಸ್ ಹೃದಯವೇ ಆಗಿರುವ ಜಿಇ ಎಂಜಿನನ್ನು ಆಮದು ಮಾಡಲಾಗಿದೆ.

ಇಸ್ರೇಲ್ ನಿರ್ಮಿತ ಅತ್ಯಾಧುನಿಕ ರಾಡಾರ್ ವ್ಯವಸ್ಥೆ ಮತ್ತು ಹೆಲ್ಮೆಟ್ ಮೌಂಟೆಡ್ ಡಿಸ್‌ಪ್ಲೇ ಸೈಟ್ (ಎಚ್ಎಂಡಿ) ತೇಜಸ್ ಹಗುರ ಯುದ್ಧ ವಿಮಾನದ ಪ್ರಮುಖ ವೈಶಿಷ್ಟ್ಯವಾಗಿದೆ.

ಏರೋನಾಟಿಕಲ್ಸ್ ಅಭಿವೃದ್ಧಿ ಏಜೆನ್ಸಿ ಸಹ ಜೊತೆಗಾರಿಕೆಯಲ್ಲಿ ತೇಜಸ್ ಯುದ್ಧ ವಿಮಾನಗಳನ್ನು ಅಭಿವೃದ್ಧಿಪಡಿಸಲಾಗಿದ್ದು, ಹಳೆಯದಾದ ಮತ್ತು ಶಕ್ತಿ ಕುಂದಿರುವ ಮಿಗ್-21 ಮತ್ತು ಮಿಗ್-23 ಯುದ್ಧ ವಿಮಾನಗಳ ಸ್ಥಾನವನ್ನು ತುಂಬಲಿದೆ.

ತೇಜಸ್ ಯುದ್ಧ ವಿಮಾನವು ಎಚ್ ಎಫ್-24 ಮಾರುತ್ ಬಳಿಕ ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್ ಅಭಿವೃದ್ಧಿಗೊಳಿಸಿರುವ ಎರಡನೇ ಸೂಪರ್ ಸೋನಿಕ್ ಫೈಟರ್ ವಿಮಾನವಾಗಿದೆ.

2003ರಲ್ಲಿ ಭಾರತದ ಅಂದಿನ ಪ್ರಧಾನ ಮಂತ್ರಿ ಅಟಾಲ್ ಬಿಹಾರಿ ವಾಜಪೇಯಿ ಅವರು ಹಗುರ ವಿಮಾನಕ್ಕೆ 'ತೇಜಸ್' ಎಂಬ ಹೆಸರನ್ನು ಸೂಚಿಸಿದ್ದರು. ಇದರರ್ಥ "ಪ್ರಕಾಶಮಾನವಾದ' ಎಂಬುದಾಗಿದೆ.

ಬೆಂಗಳೂರಿನಲ್ಲಿ ಎಚ್‌ಎಎಲ್ ಕೇಂದ್ರಿಕರಿಸಿ ಕಾರ್ಯಾಚರಣೆ ನಡೆಸಲಿರುವ ತೇಜಸ್ ವಾಯುದಳವು "ಫ್ಲೈಯಿಂಗ್ ಡ್ರಾಗರ್ಸ್" (45 ಸ್ಕ್ವಾರ್ಡನ್) ಎಂದು ಗುರುತಿಸಿಕೊಳ್ಳಲಿದೆ.

ಗ್ರೂಪ್ ಕ್ಯಾಪ್ಟನ್ ಎಂ ರಂಗಚಾರಿ ಎಂಬವರು ಫೈಯಿಂಗ್ ಡ್ರಾಗರ್ಸ್ ವಾಯುತಂಡದ ಮೊದಲ ಕಮಾಡಿಂಗ್ ಆಫೀಸರ್ ಆಗಿದ್ದು, ಅವರಡಿಯಲ್ಲಿ ಏಳು ಅಧಿಕಾರಿಗಳು, 42 ಏರ್ ವ್ಯಾರಿಯರ್ಸ್ ಮತ್ತು 20ರಷ್ಟು ನಾನ್ ಕಮಿಷನ್ಡ್ ಆಫೀಸರ್ ಗಳು ಇರಲಿದ್ದಾರೆ.

ಡಾ. ಕೋಟಾ ಹರಿನಾರಯಣ ಎಂಬವರು ತೇಜಸ್ ಲಘು ಯುದ್ಧ ವಿಮಾನದ ಪಿತಾಮಹ ಎಂದೆನಿಸಿಕೊಂಡಿದ್ದಾರೆ.

ಭಾರತೀಯ ವಾಯುಸೇನೆಯ ಜೊತೆಗೆ ನಾವಿಕ ಪಡೆಯ ಸೇವೆಗೆ ಲಭ್ಯವಾಗಲಿರುವ ತೇಜಸ್ ಯುದ್ಧ ವಿಮಾನಗಳು 2018-20ರ ಅವಧಿಯಲ್ಲಿ ಪೂರ್ಣ ಪ್ರಮಾಣಕ್ಕೆ ತಲುಪಲಿದೆ. ಅಲ್ಲದೆ 120 ಯುದ್ಧ ವಿಮಾನಗಳು ಭಾರತೀಯ ವಾಯುಸೇನೆಯನ್ನು ಸೇರಲಿದೆ.

ತೇಜಸ್ ಯುದ್ಧ ವಿಮಾನವು ಶಬ್ದ ವೇಗ 1.8 ಅಥವಾ ಗಂಟೆಗೆ 2205 ಕೀ.ಮೀ. ವೇಗದಲ್ಲಿ ಸಂಚರಿಸಲಿದ್ದು, ಬರೋಬ್ಬರಿ 3,000 ಕೀ.ಮೀ. ವ್ಯಾಪ್ತಿ ವ್ಯಾಪ್ತಿ ಪ್ರದೇಶದಲ್ಲಿ ಕಾರ್ಯಾಚರಣೆ ನೆಡಸುವಷ್ಟು ಸಮರ್ಥವೆನಿಸಿಕೊಂಡಿದೆ.