ಗಮನಾರ್ಹ ಪ್ರದರ್ಶನ ಮುಂದುವರಿಸಿದ ಸಂತೋಷ್

ದಕ್ಷಿಣ ಅಮೆರಿಕಾದಲ್ಲಿ ನಡೆಯುತ್ತಿರುವ 2015 ಡಕಾರ್ ರಾಲಿಯಲ್ಲಿ ಭಾರತದ ಕೀರ್ತಿ ಪತಾಕೆ ಹಾರಿಸಿರುವ ದೇಶದ ಹೆಮ್ಮೆಯ ಕನ್ನಡಿಗ ಹಾಗೂ ಬೆಂಗಳೂರು ಮೂಲದ ಸಿಎಸ್ ಸಂತೋಷ್, ಐದನೇ ಹಂತದ ರೇಸ್‌ನಲ್ಲೂ ಗಮನಾರ್ಹ ಸಾಧನೆ ಮಾಡುವ ಮೆಚ್ಚುಗೆಗೆ ಪಾತ್ರವಾಗಿದ್ದಾರೆ.

ಡಕಾರ್ ರಾಲಿಯಿಂದ ಬಂದಿರುವ ತಾಜಾ ಮಾಹಿತಿಯ ಪ್ರಕಾರ ಐದನೇ ಹಂತದಲ್ಲೂ 51ನೇ ಸ್ಥಾನವನ್ನು ಕಾಯ್ದುಕೊಂಡಿರುವ ಸಂತೋಷ್ ಸ್ಥಿರತೆಯ ಪ್ರದರ್ಶನವನ್ನು ಕಾಯ್ದುಕೊಂಡಿದ್ದಾರೆ.

ಸಂತೋಷ್ ಬಗ್ಗೆ ನಿಮಗೆ ಹೆಚ್ಚಿನ ಮಾಹಿತಿಯಿಲ್ಲದಿದ್ದರೆ ಇಲ್ಲಿ ನಾವು ಮಗದೊಮ್ಮೆ ಉಲ್ಲೇಖಿಸ ಬಯಸುತ್ತಿದ್ದು, ಪ್ರಖ್ಯಾತ ಹಾಗೂ ಅತ್ಯಂತ ಅಪಾಯಕಾರಿ ಡಕಾರ್ ರಾಲಿಯಲ್ಲಿ ಭಾಗವಹಿಸುತ್ತಿರುವ ಮೊಟ್ಟ ಮೊದಲ ಭಾರತೀಯನೆಂಬ ಗೌರವಕ್ಕೆ ಪಾತ್ರವಾಗಿದ್ದಾರೆ.

ಜನವರಿ 4ರಂದು ಅರ್ಜೆಂಟೀನಾದ ಬ್ಯೂನಸ್ ಐರಿಸ್‌ನಿಂದ ಆರಂಭವಾಗಿರುವ ರೇಸ್ ಚೀಲಿ ಹಾಗೂ ಬೊಲಿವಿಯಾ ಕ್ರಮಿಸಿ ಮತ್ತೆ ಬ್ಯೂನಸ್ ಐರಿಸ್‌ನಲ್ಲಿ ಜನವರಿ 17ರಂದು ಕೊನೆಗೊಳ್ಳಲಿದೆ. ಒಟ್ಟು 13 ಹಂತಗಳಾಗಿ (ಸ್ಟೇಜ್) ಡಕಾರ್ ರಾಲಿ ಆಯೋಜನೆಯಾಗಲಿದೆ. ಇಲ್ಲಿ ಕಾರು ಬೈಕ್ ಸೇರಿದಂತೆ ಟ್ರಕ್ ಹಾಗೂ ಕ್ವಾಡ್ ರೇಸ್ ಸಹ ನಡೆಯುತ್ತಿದೆ.

ಮರಭೂಮಿ, ಪರ್ವತ ಶಿಖರ , ಅಟ್ಲಾಂಟಿಕ್ ಹಾಗೂ ಫೆಸಿಫಿಕ್ ಮಹಾಸಾಗರ ಕಿನಾರೆಯಲ್ಲಿ ಸುತ್ತುವರಿಯಲಿರುವ ಡಕಾರ್ ರಾಲಿಯಲ್ಲಿ ದಿನಕ್ಕೆ 800ರಿಂದ 900 ಕೀ.ಮೀ.ಗಳನ್ನು ಕ್ರಮಿಸಬೇಕಾಗುತ್ತದೆ. ಈ ಮೂಲಕ ಒಟ್ಟು 9000 ಕೀ.ಮೀ. ಉದ್ದಕ್ಕೂ ಸ್ಪರ್ಧೆ ನಡೆಯಲಿದೆ.