ನ್ಯಾನೊ ಸಿಎನ್ಜಿ: ಪುಟ್ಟ ಕಾರು ಸ್ವಾಗತಕ್ಕೆ ತಳಿರುತೋರಣ

ಟಾಟಾ ಮೋಟರ್ಸ್ ಕಂಪನಿಯು ಈ ವರ್ಷ ನ್ಯಾನೊ ಕಾರಿನ ಸಂಕುಚಿತ ನೈಸರ್ಗಿಕ ಅನಿಲ(ಸಿಎನ್ಜಿ) ಚಾಲಿತ ಆವೃತ್ತಿಯನ್ನು ದೇಶದ ರಸ್ತೆಗೆ ಪರಿಚಯಿಸಲು ನಿರ್ಧರಿಸಿದೆ.

ಮುಂದಿನ ಆರ್ಥಿಕ ವರ್ಷದ ಉತ್ಪನ್ನ ಅಭಿವೃದ್ಧಿ ಮತ್ತು ಉತ್ಪಾದನಾ ಸಾಮರ್ಥ್ಯ ವಿಸ್ತರಣೆ ಯೋಜನೆಗಾಗಿ ಕಂಪನಿಯು ಸುಮಾರು 3 ಸಾವಿರ ಕೋಟಿ ರುಪಾಯಿ ಹೂಡಿಕೆ ಮಾಡಲು ಯೋಜಿಸಿದೆ.

"ನ್ಯಾನೊ ಕಾರಿನ ಸಿಎನ್ಜಿ ಆವೃತ್ತಿಯನ್ನು ಶೀಘ್ರದಲ್ಲಿ ದೇಶದ ಮಾರುಕಟ್ಟೆಗೆ ಬಿಡುಗಡೆ ಮಾಡಲು ಯೋಜಿಸಿದ್ದೇವೆ. ಈ ಪುಟ್ಟ ಅನಿಲ ಚಾಲಿತ ಕಾರು ಈ ವರ್ಷವೇ ರಸ್ತೆಗಿಳಿಯುವ ನಿರೀಕ್ಷೆಯಿದೆ" ಎಂದು ಟಾಟಾ ಮೋಟರ್ಸ್ ವ್ಯವಸ್ಥಾಪಕ ನಿರ್ದೇಶಕ ಪಿಎಂ ತೆಲಾಂಗ್ ಹೇಳಿದ್ದಾರೆ.

ಜಾಗತಿಕ ಮಾರುಕಟ್ಟೆಗೆ ನ್ಯಾನೊ ಕಾರಿನ ವಿವಿಧ ಆವೃತ್ತಿಗಳನ್ನು ಪರಿಚಯಿಸುವ ಕುರಿತು ಕೆಲಸ ಮಾಡುತ್ತಿರುವುದಾಗಿ ಕಂ-ಪನಿ ತಿಳಿಸಿದೆ. ಈಗಾಗಲೇ ಶ್ರೀಲಂಕಾ ಮತ್ತು ನೇಪಾಳ ದೇಶಗಳಿಗೆ ಪುಟ್ಟ ನ್ಯಾನೊ ಪ್ರಯಾಣಿಸಿಯಾಗಿದೆ. ಇನ್ನು ಮುಂದೆ ಥೈಲಾಂಡ್, ಇಂಡೋನೇಷ್ಯಾ ದೇಶಗಳಿಗೆ ನ್ಯಾನೊ ಪರಿಚಯಿಸುವ ಯೋಜನೆಯನ್ನು ಕಂಪನಿ ಹೊಂದಿದೆ