ದೇಶದಲ್ಲಿ ರಸ್ತೆಯಲ್ಲಿ ಓಡಾಡಲಿರುವ ಇನ್ನಷ್ಟು ಐಷಾರಾಮಿ ಬಸ್ಸುಗಳು

1.2 ಬಿಲಿಯನ್ ಅಮೆರಿಕನ್ ಡಾಲರ್‌ನ ಜೆಬಿಎಂ ಸಂಸ್ಥೆಯ ಭಾಗವಾಗಿರುವ ಜೆಬಿಎಂ ಆಟೋ, ಜಾಗತಿಕವಾಗಿ 18 ಪ್ರದೇಶಗಳಲ್ಲಾಗಿ 35 ತಯಾರಕ ಘಟಕ, ನಾಲ್ಕು ಎಂಜಿನಿಯರಿಂಗ್ ಮತ್ತು ವಿನ್ಯಾಸ ಘಟಕಗಳನ್ನು ಹೊಂದಿದೆ. ಇನ್ನೊಂದೆಡೆ ಅತಿ ಪುರಾತನ ಸಂಸ್ಥೆಗಳಲ್ಲಿ ಒಂದಾಗಿರುವ ಬ್ರೆಡಾಮೆನರಿನಿಬಸ್ ಕಳೆದ 90 ವರ್ಷಗಳಿಂದ ಬಸ್ಸು ಉತ್ಪಾದಿಸುತ್ತಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಜೆಬಿಎಂ ಗ್ರೂಪ್ ಕಾರ್ಯನಿರ್ವಾಹಕ ನಿರ್ದೇಶಕ ನಿಶಾಂತ್ ಆರ್ಯ, ಮಾತುಕತೆ ಅಂತಿಮ ಹಂತದಲ್ಲಿದ್ದು, ದೇಶದ ವಾಣಿಜ್ಯ ವಾಹನ ಮಾರುಕಟ್ಟೆಯ ಅಗತ್ಯಗಳಿಗನ್ನಾಸಾರವಾಗಿ ಬಸ್ಸುಗಳನ್ನು ಬಿಡುಗಡೆ ಮಾಡಲಾಗುವುದು ಎಂದಿದ್ದಾರೆ.

ಫೋರ್ಡ್, ಹೋಂಡಾ ಮತ್ತು ಫಿಯೆಟ್‌ಗಳ ಆಟೋ ಕಂಪನಿಗಳಿಗೆ ಬಿಡಿಭಾಗಗಳನ್ನು ವಿತರಣೆ ಮಾಡುತ್ತಿರುವ ಜೆಬಿಎಂ ಆಟೋ, ಪ್ರಸ್ತುತ ದೇಶದ ಬಸ್ ಮಾರುಕಟ್ಟೆಯನ್ನು ತೆಕ್ಕೆಗೆ ಹಾಕಿಕೊಳ್ಳುವ ಪ್ರಯತ್ನದಲ್ಲಿದೆ. ಇದು ವೋಲ್ವೋ, ಮರ್ಸಿಡಿಸ್ ಬೆಂಝ್, ಇಸುಝು ಮತ್ತು ಸ್ಕಾನಿಯಾಗಳಂತಹ ಬಸ್ಸುಗಳಿಗೆ ಕಠಿಣ ಸ್ಪರ್ಧೆ ಒಡ್ಡಲಿದೆ.

ಒಂದು ವೇಳೆ ಒಪ್ಪಂದ ಅನುಷ್ಠಾನಗೊಂಡಲ್ಲಿ, ಜಾಗತಿಕವಾಗಿ ಪೂರ್ಣ ಪ್ರಮಾಣದ ವಾಹನ ತಯಾರಕ ವ್ಯವಸ್ಥೆ ಹೊಂದಿರುವ ದೇಶದ ಮೊದಲ ಆಟೋ ಕಂಪನಿಯೆಂಬ ಖ್ಯಾತಿಗೆ ಜೆಬಿಎಂ ಪಾತ್ರವಾಗಲಿದೆ. ಬಲ್ಲ ಮೂಲಗಳ ಪ್ರಕಾರ 2014 ಫೆಬ್ರವರಿಯಲ್ಲಿ ನಡೆಯಲಿರುವ ದೆಹಲಿ ಆಟೋ ಎಕ್ಸ್ ಪೋದಲ್ಲಿ ಜೆಬಿಎಂ ಬಸ್ಸು ಅನಾವರಣಗೊಳ್ಳುವ ಸಾಧ್ಯತೆಯಿದೆ.

ನಗರ ಹಾಗೂ ಗ್ರಾಮೀಣ ಪ್ರದೇಶ ಸೇರಿದಂತೆ ದೇಶದಲ್ಲಿ ವರ್ಷಂಪ್ರತಿ 50,000ದಷ್ಟು ಬಸ್ಸುಗಳು ಮಾರಾಟವಾಗುತ್ತಿದೆ. ಪ್ರಸಕ್ತ ಬಂದಿರುವ ಮಾಹಿತಿ ಪ್ರಕಾರ ಸಿಎನ್‌ಜಿ ಮತ್ತು ಡೀಸೆಲ್ ನಿಯಂತ್ರಿತ 60 ಸೀಟುಗಳ ಬಸ್ಸು ಉತ್ಪಾದನೆಯಾಗಲಿದೆ.