ಅತಿ ಶೀಘ್ರದಲ್ಲೇ ಶಕ್ತಿಶಾಲಿ ಬಿಎಂಡಬ್ಲ್ಯು ಎಂ4 ಬಿಡುಗಡೆ

Four Wheelers

oi-Nagaraja

By Nagaraja

Published: Tuesday, July 15, 2014, 12:31 [IST]

ಭಾರತೀಯ ಮಾರುಕಟ್ಟೆಗೆ ಹಲವು ಹೊಸ ಮಾದರಿಗಳನ್ನು ಪರಿಚಯಿಸುವ ಯೋಜನೆಯನ್ನು ಬಿಎಂಡಬ್ಲ್ಯು ಹೊಂದಿದೆ. ಇದರಂತೆ ಜರ್ಮನಿಯ ಈ ಐಷಾರಾಮಿ ವಾಹನ ತಯಾರಕ ಸಂಸ್ಥೆಯು ಅತಿ ಶೀಘ್ರದಲ್ಲೇ ಎಂ4 ಮಾದರಿಯನ್ನು ಬಿಡುಗಡೆಗೊಳಿಸಲಿದೆ.

ಈಗಾಗಲೇ 7 ಸಿರೀಸ್ ಆಕ್ಟಿವ್ ಹೈಬ್ರಿಡ್ ಬಿಡುಗಡೆಗೆ ಸಮಯ ನಿಗದಿಯಾಗಿದ್ದು, 2014 ಜುಲೈ 23ರಂದು ಬಿಡುಗಡೆಯಾಗಲಿದೆ. ಈ ನಡುವೆ ಅತ್ಯಂತ ಶಕ್ತಿಶಾಲಿ ಎಂ4 ಬಿಡುಗಡೆಯ ಬಗ್ಗೆ ಫೇಸ್‌ಬುಕ್ ಅಧಿಕೃತ ಪೇಜ್‌ನಲ್ಲಿ ಸುಳಿವು ನೀಡಲಾಗಿದೆ.

ಅಂದರೆ ಪ್ರಸಕ್ತ ಸಾಲಿನಲ್ಲೇ ಹೊಸ ಬಿಎಂಡಬ್ಲ್ಯು ಎಂ4 ಆಗಮನವಾಗುವ ಸಾಧ್ಯತೆಯಿದೆ. ಇದು ಎಂ3 ಮಾದರಿಗೆ ಸಮಾನವಾದ ಎಂಜಿನ್ ಮಾನದಂಡಗಳನ್ನು ಪಡೆಯಲಿದೆ. ಅಂದರೆ ಇದೇ ಮೊದಲ ಬಾರಿಗೆ ಎಂ4 ಸ್ಪೋರ್ಟ್ಸ್ ಕಾರು 3.0 ಲೀಟರ್ ಎಂಜಿನ್ ಪಡೆಯಲಿದೆ. ಇದರ 6 ಸಿಲಿಂಡರ್ ಎಂಜಿನ್ ಬಿಎಂಡಬ್ಲ್ಯು ಎಂ ಟ್ವಿನ್ ಪವರ್ ಟರ್ಬೊ ತಂತ್ರಜ್ಞಾನವನ್ನು ಹೊಂದಿರಲಿದೆ. ಇದು ಗರಿಷ್ಠ 431 ಅಶ್ವಶಕ್ತಿ (550 ಎನ್‌ಎಂ ಟಾರ್ಕ್) ಉತ್ಪಾದಿಸಲು ನೆರವಾಗಲಿದೆ.

ಅದೇ ರೀತಿ ಹೆಚ್ಚಿನ ಕ್ರೀಡಾತ್ಮಕ ವೈಶಿಷ್ಟ್ಯಗಳಿಗೆ ಆದ್ಯತೆ ಕೊಡಲಾಗಿದೆ. ಅಂತೆಯೇ ಕಾರ್ಬನ್ ಫೈಬರ್ ಬಳಕೆಯಿಂದಾಗಿ ಕಾರಿನ ತೂಕವನ್ನು ಕಡಿಮೆ ಮಾಡಲು ನೆರವಾಗಿದೆ. ಬಿಎಂಡಬ್ಲ್ಯು ಎಂ4 ಟ್ವಿನ್ ಗೇರ್ ಬಾಕ್ಸ್ ಮತ್ತು 7 ಸ್ಪೀಡ್ ಎಂ ಡಬಲ್ ಕ್ಲಚ್ ಟ್ರಾನ್ಸ್‌ಮಿಷನ್‌ಗಳಲ್ಲಿ ಲಭ್ಯವಿರಲಿದೆ.