ತೆರಿಗೆ ಬಿಕ್ಕಟ್ಟು; ಇಂಡಿಯನ್ ಗ್ರ್ಯಾನ್ ಪ್ರಿಗೆ ಬಿತ್ತು ಬ್ರೇಕ್

ದೇಶದ ಫಾರ್ಮುಲಾ ಒನ್ ರೇಸ್ ಉತ್ಸಾಹಿಗಳಿಗೆ ಮಗದೊಂದು ನಿರಾಸೆ ಸುದ್ದಿ ಕಾದಿದೆ. ಸರಕಾರದ ಭಾರಿ ತೆರಿಗೆ ಧೋರಣೆ ಹಿನ್ನಲೆಯಲ್ಲಿ 2016ನೇ ಇಸವಿಯ ವರೆಗೆ ಭಾರತದಲ್ಲಿ ಎಫ್1 ಆಯೋಜನೆಯಾಗುವ ಸಾಧ್ಯತೆಗಳಿಲ್ಲ ಎಂದು ಫಾರ್ಮುಲಾ ಒನ್ ಮ್ಯಾನೇಜ್‌ಮೆಂಟ್ ಅಧ್ಯಕ್ಷ ಹಾಗೂ ಸಿಇಒ ಆಗಿರುವ ಬೆರ್ನಿ ಎಕ್ಲೆಸ್ಟೋನ್ ತಿಳಿಸಿದ್ದಾರೆ.

2016ನೇ ಇಸವಿಯ ವರೆಗೆ ಫಾರ್ಮಲಾ ಒನ್ ಭಾರತಕ್ಕೆ ಆಗಮಿಸಲ್ಲ. ಹಾಗೊಂದು ವೇಳೆ 2016ರಲ್ಲಿ ಪುನರಾಗಮನವಾದರೂ ಸರಕಾರದ ಭಾರಿ ತೆರಿಗೆ ನೀತಿ ಸಮಸ್ಯೆ ಪರಿಹಾರವಾಗುವ ವರೆಗೆ ಆಯೋಜನೆಯಾಗುವುದು ಕಠಿಣ ಸಾಧ್ಯವಾಗಿದೆ ಎಂದಿದ್ದಾರೆ.

ಅಂದ ಹಾಗೆ ಸರಕಾರವು, ಎಫ್1 ರೇಸನ್ನು ಮನರಂಜನಾ ವಿಭಾಗದಲ್ಲಿ ಪರಿಗಣಿಸಿರುವುದು ಭಾರಿ ತೆರಿಗೆ ಹೊರೆಗೆ ಕಾರಣವಾಗಿದೆ. ಇದು ದೇಶಕ್ಕೆ ಮರು ಪ್ರವೇಶಿಸುವ ಎಫ್1 ಆಸೆಗಳಿಗೆ ಕಡಿವಾಣ ಹಾಕಲಿದೆ. ಅಷ್ಟೇ ಅಲ್ಲದೆ ವಿದೇಶದಿಂದ ಇಲ್ಲಿಗೆ ಆಗಮಿಸುವ ಎಫ್1 ರೇಸ್ ಕಾರುಗಳಿಗೆ ಸಾಮಾನ್ಯ ರಸ್ತೆ ಆಮದು ಕಾರುಗಳಿಗೆ ವಿಧಿಸುವಂತಹ ತೆರಿಗೆಗಳನ್ನು ವಿಧಿಸಲಾಗುತ್ತಿದೆ.

ಇವೆಲ್ಲ ತೆರಿಗೆ ಸಮಸ್ಯೆ ಒಂದೆಡೆಯಾದ್ದಲ್ಲಿ ಎಫ್1 ಕ್ಯಾಲೆಂಡರ್ ವೇಳಾಪಟ್ಟಿಯಲ್ಲಿ ಸ್ಥಾನಗಿಟ್ಟಿಸುವುದು ಕೂಡಾ ಇನ್ನೊಂದು ಸಮಸ್ಯೆಯಾಗಿ ಬಿಟ್ಟಿದೆ. ಯಾಕೆಂದರೆ ಅಜೆರ್‌ಬೈಜನ್ ಬಹುತೇಕ ತನ್ನ ಸ್ಥಾನವನ್ನು ಖಚಿತಪಡಿಸಿಕೊಂಡಿದೆ. ಈ ಬಾರಿಯಂತೂ ರಷ್ಯಾದ ಸೋಚಿ ಹೊಸ ಸೇರ್ಪಡೆಯಾಗಿರಲಿದೆ. ಇನ್ನುಳಿದಂತೆ ಒಂದು ದಶಕದ ಬಳಿಕ ಆಸ್ಟ್ರೀಯಾ ರೇಸ್‌ ಆಯೋಜನೆಗೆ ಮರಳಲು ತುದಿಗಾಲಲ್ಲಿ ನಿಂತಿದೆ. ಈ ಎಲ್ಲ ಸನ್ನಿವೇಶಗಳ ಹಿನ್ನಲೆಯಲ್ಲಿ ಭಾರತಕ್ಕೆ ಎಫ್1 ರೇಸ್ ಕೂಟ ಮರಳುವುದು ಭಾರಿ ಕಷ್ಟ ಸಾಧ್ಯವಾಗಿದೆ.