ಟೆಸ್ಲಾ ವಿದ್ಯುತ್ ಕಾರು ಘಟಕಕ್ಕೆ ಮೋದಿ ಭೇಟಿ; ಅಜೆಂಡಾ ಏನು?

ಕ್ಯಾಲಿಫೋರ್ನಿಯಾದ ಪಾವೊ ಆಲ್ಟೊದಲ್ಲಿರುವ ಟೆಸ್ಲಾ ಪ್ರಧಾನ ಕಚೇರಿಗೆ ಭೇಟಿ ಕೊಟ್ಟಿರುದ್ದ ನರೇಂದ್ರ ಮೋದಿ, ಭವಿಷ್ಯತ್ತಿನ ವಾಹನ ವಿನ್ಯಾಸ, ತಂತ್ರಗಾರಿಕೆ ಹಾಗೂ ಚೈತನ್ಯ ಬಳಕೆಯ ಬಗ್ಗೆ ಅಲ್ಲಿನ ಸಂಸ್ಥೆಯ ಪ್ರತಿನಿಧಿಗಳಿಂದ ಮಾಹಿತಿ ಗಿಟ್ಟಿಸಿಕೊಂಡರು.

2003ನೇ ಸಾಲಿನಲ್ಲಿ ಅಸ್ತಿತ್ವಕ್ಕೆ ಬಂದಿರುವ ಟೆಸ್ಲಾ ಮೋಟಾರ್ಸ್ ಕಳೆದ ಒಂದು ದಶಕದಲ್ಲೇ ಅತಿ ಹೆಚ್ಚಿನ ಜನಪ್ರಿಯತೆಯನ್ನು ಪಡೆದುಕೊಂಡಿದೆ. ಅಲ್ಲದೆ ವಿದ್ಯುತ್ ಚಾಲಿತ ಕಾರುಗಳ ನಿರ್ಮಾಣದಲ್ಲಿ ಮುಂಚೂಣಿಯಲ್ಲಿ ಗುರುತಿಸಿಕೊಂಡಿದೆ.

ಪಳೆಯುಳಿಕೆ ಇಂಧನ ಚಾಲಿತ ಕಾರುಗಳಿಗಿಂತ ವಿದ್ಯುತ್ ಚಾಲಿತ ಕಾರುಗಳು ಏಕೆ ಅತ್ಯುತ್ತಮವಾಗಿದೆ ಎಂಬುದನ್ನು ಮೋದಿ ಅವರಿಗೆ ವಿವರಿಸುವ ಪ್ರಯತ್ನ ಮಾಡಲಾಗಿತ್ತು.

ಬಳಿಕ ಬ್ಯಾಟರಿ ಚಾಲಿತ ವಾಹನದಲ್ಲಿ ಮೋದಿ ಘಟಕದತ್ತ ಒಂದು ಚಿಕ್ಕ ರೌಂಡಪ್ ಹೊಡೆದು ಬಂದರು. ಅಲ್ಲದೆ ಪ್ರತಿನಿಧಿಗಳೊಂದಿಗೆ ಫೋಟೊಗೆ ಫೋಸ್ ನೀಡಲು ಮರೆಯಲಿಲ್ಲ.

ಟೆಸ್ಲಾ ಮೋಟಾರ್ಸ್ ಸ್ಥಾಪಕ ಹಾಗೂ ಮುಖ್ಯ ಕಾರ್ಯಕಾರಿಣಿ ಎಲಾನ್ ಮಸ್ಕ್ ಜೊತೆಗಿನ ಭೇಟಿಯನ್ನು ಬಳಿಕ ತಮ್ಮ ಫೇಸ್ ಬುಕ್ ನಲ್ಲಿ ಹಂಚಿಕೊಂಡಿರುವ ಮೋದಿ, ರೈತರಿಗೆ ನೆರವಾಗಬಲ್ಲ ಬ್ಯಾಟರಿ ತಂತ್ರಾಂಶದ ಬಗೆಗಿನ ಚರ್ಚೆಯನ್ನು ಆನಂದಿಸಿರುವುದಾಗಿ ತಿಳಿಸಿದರು.

ಭಾರತದಲ್ಲಿ 2020ರ ವೇಳೆಯಾಗುವ ಹೆಚ್ಚಿನ ಸಂಖ್ಯೆಯ ವಿದ್ಯುತ್ ಚಾಲಿತ ಹಾಗೂ ಹೈಬ್ರಿಡ್ ತಳಿಯ ವಾಹನಗಳನ್ನು ರಸ್ತೆಗಿಳಿಸುವ ಯೋಜನೆಯನ್ನು ಕೇಂದ್ರ ಸರಕಾರ ಹೊಂದಿದೆ. ಇದಕ್ಕಾಗಿ ದೊಡ್ಡ ಮೊತ್ತವನ್ನೇ ಬಜೆಟ್‌ನಲ್ಲಿ ಮೀಸಲಿಡಲಾಗಿದೆ.

ದೇಶದಲ್ಲಿ ವಿದ್ಯುತ್ ಚಾಲಿತ ವಾಹನಗಳಿಗೆ ಬೇಕಾಗಿರುವ ಮೂಲ ಸೌಕರ್ಯದ ಕೊರತೆಯೇ ಟೆಸ್ಲಾದಂತಹ ಜಗತ್ತಿನ ಅಗ್ರಗಣ್ಯ ಸಂಸ್ಥೆಗಳು ತನ್ನ ಐಕಾನಿಕ್ ಮಾದರಿಗಳನ್ನು ದೇಶದಲ್ಲಿ ಬಿಡುಗಡೆ ಮಾಡಲು ಮೀನಾಮೀಷ ಎದುರಿಸಲು ಕಾರಣವಾಗಿದೆ.

ಈಗ ಮೋದಿ ಭೇಟಿಯೊಂದಿಗೆ ಮತ್ತಷ್ಟು ನಿರೀಕ್ಷೆಗಳು ಹುಟ್ಟಿಕೊಂಡಿದ್ದು, ಭಾರತ ಕೂಡಾ ಪರಿಸರ ಸ್ನೇಹಿ ವಾಹನಗಳ ಸಾಲಿನಲ್ಲಿ ಅತಿ ಬೇಗನೇ ಸೇರಿಕೊಳ್ಳಲಿ ಎಂಬುದು ಡ್ರೈವ್ ಸ್ಪಾರ್ಕ್ ಆಶಯವಾಗಿದೆ.