ಮುಂದಿನ ವರ್ಷ ಬಿಡುಗಡೆಗೊಳ್ಳಲಿರುವ ಹೊಸ 'ಆಲ್ಟೊ 800' ಕಾರು: ವಿವರ ಇಲ್ಲಿದೆ

ಸದ್ಯದ ಸ್ಪರ್ಧಾತ್ಮಕ ಜಗತ್ತಿನಲ್ಲಿ ತನ್ನ ಪ್ರತಿಸ್ಪರ್ಧಿಯಾದ ರೆನಾಲ್ಟ್ ಕ್ವಿಡ್ ಕಾರಿನಿಂದ ಅತಿ ಹೆಚ್ಚಿನ ಮಟ್ಟದ ಪೈಪೋಟಿ ಏರ್ಪಡುತ್ತಿರುವುದನ್ನು ಗಮನಿಸಿರುವ ಮಾರುತಿ ಕಂಪನಿ ಅದಕ್ಕೆ ಪರಿಹಾರ ಕಂಡುಕೊಳ್ಳುವ ನಿಟ್ಟಿನಲ್ಲಿ ತನ್ನ ಆಲ್ಟೊ 800 ಕಾರನ್ನು ಮುಂದಿನ ವರ್ಷ ಬಿಡುಗಡೆಗೊಳಿಸಲು ತಯಾರಿ ನೆಡೆಸಿದೆ.

ಮುಂದಿನ ವರ್ಷ ನೆಡೆಯುವ ಆಟೋ ಎಕ್ಸ್-ಪೋದಲ್ಲಿ ಮಾರುತಿ ಸುಜುಕಿ ಕಂಪನಿಯು ತನ್ನ ಆಲ್ಟೊ 800 ಕಾರನ್ನು ಅನಾವರಣಗೊಳಿಸಿ ಅದೇ ವರ್ಷ ಬಿಡುಗಡೆ ಭಾಗ್ಯ ಕಲ್ಪಿಸಲಿದೆ.

ಆಲ್ಟೊ 800 ಕಾರು ನೂತನ ಸಾಧನ ಸಾಮಗ್ರಿಗಳನ್ನು ಪಡೆದುಕೊಳ್ಳಲಿದ್ದು, ತನ್ನ ತತ್ಸಮಾನ ಪ್ರತಿಸ್ಪರ್ದಿಯಾದ ಕ್ವಿಡ್ ಕಾರಿಗೂ ಹೆಚ್ಚಿನ ಮಟ್ಟದ ಸೌಕರ್ಯಗಳನ್ನು ನೀಡಲು ಕಂಪನಿ ತೀರ್ಮಾನಿಸಿದೆ.

ಮಾರುತಿ ಕಂಪನಿಯ ಮುಂದಿನ ತಲೆಮಾರಿನ ತಂತ್ರಜ್ಞಾನವನ್ನು ಅಳವಡಿಸಿಕೊಂಡು ಈ ಕಾರು ನಿಮ್ಮ ಮುಂದೆ ಬರಲಿದೆ ಎಂದು ಹೇಳಲಾಗಿದೆ, ಕಡಿಮೆ ತೂಕದ ಹೆಚ್ಚಿನ ಕ್ಲಿಷ್ಟತೆ ಹೊಂದಿರದ ಕಾರು ಇದಾಗಿರಲಿದೆ.

ಹೊಸ ತಲೆಮಾರಿನ ಕಾರುಗಳಾದ ಬಲೆನೊ ಮತ್ತು ಇಗ್ನಿಸ್ ಕಾರುಗಳು ಈಗಾಗಲೇ ಯಶಸ್ಸಿನ ಅಲೆಯಲ್ಲಿ ತೇಲುತ್ತಿದ್ದು, ಇದೇ ಯಶಸ್ಸು ಈ ಕಾರಿಗೂ ಸಿಗಲಿದೆಯೇ ಎಂಬುದಕ್ಕೆ ಉತ್ತರ ನಿಮಗೆ ಮುಂದಿನ ವರ್ಷ ಖಂಡಿತ ದೊರಕಲಿದೆ.

ಭಾರತ ಸರ್ಕಾರ 2020ರಲ್ಲಿ ಪರಿಚಯ ಮಾಡಲು ಉದ್ದೇಶಿಸಿರುವ ಬಿಎಸ್-VI (ಬಿಎಸ್6) ನಿಯಮಗಳನ್ನು ಈ ಕಾರಿನಲ್ಲಿ ಮುಂದಿನ ವರ್ಷವೇ ಅಳವಡಿಸಿಕೊಳ್ಳಲು ಕಂಪನಿ ಮುಂದಾಗಿದೆ.

ದೇಶದಲ್ಲಿಯೇ ತಯಾರಿಸಲಾದ ಎರಡು ಸಿಲಿಂಡರ್ ಹೊಂದಿರುವ ಡೀಸೆಲ್ ಎಂಜಿನ್ ಈ ಕಾರಿನಲ್ಲಿ ಇರಿಸಲು ಕಂಪನಿ ನಿಶ್ಚಯಿಸಿದೆ ಎನ್ನಲಾಗಿದ್ದು, ಈ ಎಂಜಿನ್ ಈಗಾಗಲೇ ಸೆಲೆರಿಯೊ ಕಾರಿನಲ್ಲಿ ಅಳವಡಿಸಲಾಗಿದೆ.

ಹೊಸ ಕಾರಿನಲ್ಲಿ ನೇವಿಗೇಶನ್, ಎಬಿಎಸ್ ತಂತ್ರಜ್ಞಾನ, ಏರ್ ಬ್ಯಾಗ್ಸ್, ಸ್ಪೀಡ್ ಎಚ್ಚರಿಸುವ ವ್ಯವಸ್ಥೆ ಒಳಗೊಂಡಿರಲಿದೆ ಎನ್ನಲಾಗಿದೆ.