225 ಬಿ‌ಹೆಚ್‌ಪಿ ಪವರ್ ಉತ್ಪಾದಿಸುತ್ತದೆ ಮಾಡಿಫೈಗೊಂಡ ಈ ಹ್ಯಾರಿಯರ್

2020 ರಲ್ಲಿ ಅಪ್ ಡೇಟ್ ಮಾಡಲಾದ ಹ್ಯಾರಿಯರ್ ಎಸ್‌ಯುವಿಯಲ್ಲಿ 167 ಬಿ‌ಹೆಚ್‌ಪಿ ಪವರ್ ಉತ್ಪಾದಿಸುವ ಡೀಸೆಲ್ ಎಂಜಿನ್ ಅಳವಡಿಸಲಾಗಿದೆ. ಅದಕ್ಕೂ ಮುನ್ನ ಈ ಎಸ್‌ಯುವಿಯಲ್ಲಿದ್ದ ಡೀಸೆಲ್ ಎಂಜಿನ್ 137 ಬಿ‌ಹೆಚ್‌ಪಿ ಪವರ್ ಉತ್ಪಾದಿಸುತ್ತಿತ್ತು.

ಆದರೂ ಕೆಲವು ಗ್ರಾಹಕರು ಈ ಎಸ್‌ಯುವಿಯನ್ನು ಹೆಚ್ಚು ಬಿ‌ಹೆಚ್‌ಪಿ ಪವರ್ ನೀಡುವಂತೆ ಮಾಡಿಫೈಗೊಳಿಸಿದ್ದಾರೆ. ಈಗ ಮಾಡಿಫೈಗೊಂಡಿರುವ ಟಾಟಾ ಹ್ಯಾರಿಯರ್ 225 ಬಿಹೆಚ್‌ಪಿ ಪವರ್ ಉತ್ಪಾದಿಸುತ್ತದೆ.

ಚಿತ್ರಕೃಪೆ: ನಿಕ್ ಝೀಕ್

ಮಾಡಿಫೈಗೊಂಡಿರುವ ಹ್ಯಾರಿಯರ್ ಎಸ್‌ಯುವಿಯ ವೀಡಿಯೊವನ್ನು ನಿಕ್ ಝೀಕ್ ಎಂಬ ಯೂಟ್ಯೂಬ್ ಚಾನೆಲ್'ನಲ್ಲಿ ಅಪ್ ಲೋಡ್ ಮಾಡಲಾಗಿದೆ. ಮಾಡಿಫೈಗೊಂಡಿರುವ ಹ್ಯಾರಿಯರ್ ಡಾರ್ಕ್ ಎಡಿಷನ್ ಆಗಿದೆ.

ಈ ಎಸ್‌ಯುವಿಯು ಇತ್ತೀಚೆಗೆ ಬಿಡುಗಡೆಯಾದ ಹ್ಯಾರಿಯರ್ ಎಕ್ಸ್‌ಟಿ ಪ್ಲಸ್ ಮಾದರಿಯನ್ನು ಆಧರಿಸಿದೆ. ಮಾಡಿಫೈಗೊಂಡ ನಂತರ ಈ ಎಸ್‌ಯುವಿಗೆ ವೇಗದ ಹ್ಯಾರಿಯರ್ ಎಂಬ ಹೆಸರಿಡಲಾಗಿದೆ.

ಮಾಡಿಫೈಗೊಂಡ ಈ ಟಾಟಾ ಹ್ಯಾರಿಯರ್‌ ಎಸ್‌ಯುವಿಯ ಮಾಲೀಕರ ಹೆಸರು ಶುಭಮ್ ಬಾಗುಲ್ ಎಂದು ತಿಳಿದು ಬಂದಿದೆ. ಅವರ ಕೋರಿಕೆಯ ಮೇರೆಗೆ ಕೋಡ್ 6 ಟ್ಯೂನಿಂಗ್‌ ಎಂಬ ಕಸ್ಟಮ್ ಕಂಪನಿಯು ಈ ಟಾಟಾ ಹ್ಯಾರಿಯರ್ ಅನ್ನು ಮಾಡಿಫೈಗೊಳಿಸಿದೆ.

ಮಾಡಿಫೈಗೊಂಡ ನಂತರ ಈ ಹ್ಯಾರಿಯರ್‌ನ ಆರ್‌ಪಿಎಂ 6,000 ಗಳಿಗೆ ಏರಿಕೆಯಾಗಿದೆ. ಮೊದಲು ಗಂಟೆಗೆ 140 - 150 ಕಿ.ಮೀ ವೇಗದಲ್ಲಿ ಸಾಗಲು ಅಸಮರ್ಥವಾಗಿದ್ದ ಈ ಎಸ್‌ಯುವಿಯು ಮಾಡಿಫೈಗೊಂಡ ನಂತರ ಸುಲಭವಾಗಿ ಗಂಟೆಗೆ 215 ಕಿ.ಮೀ ವೇಗದಲ್ಲಿ ಚಲಿಸಬಲ್ಲದು.

ಸಾಮಾನ್ಯ ಟಾಟಾ ಹ್ಯಾರಿಯರ್‌ನಲ್ಲಿ ಅಳವಡಿಸಿರುವ ಡೀಸೆಲ್ ಎಂಜಿನ್ 167 ಬಿ‌ಹೆಚ್‌ಪಿ ಪವರ್ ಹಾಗೂ 350 ಎನ್‌ಎಂ ಟಾರ್ಕ್ ಉತ್ಪಾದಿಸುವ ಸಾಮರ್ಥ್ಯವನ್ನು ಹೊಂದಿದೆ. ಮಾಡಿಫೈ ಮಾಡಲಾದ ಈ ಹ್ಯಾರಿಯರ್ 225 ಬಿ‌ಹೆಚ್‌ಪಿ ಪವರ್ ಹಾಗೂ 470 ಎನ್‌ಎಂ ಟಾರ್ಕ್ ಉತ್ಪಾದಿಸುತ್ತದೆ.

1,800 ಆರ್‌ಪಿಎಂ ನಂತರ ಪವರ್ ಬಿಡುಗಡೆ ಮಾಡುವಂತೆ ಈ ಡೀಸೆಲ್ ಎಂಜಿನ್ ಅನ್ನು ಟ್ಯೂನ್ ಮಾಡಲಾಗಿದೆ. 1800 ಆರ್‌ಪಿಎಂನಲ್ಲಿ ಎಂಜಿನ್‌ನಿಂದ ಉತ್ತಮ ಇಂಧನ ದಕ್ಷತೆಯನ್ನು ಪಡೆಯಬಹುದು.

ಇಸಿಯುವನ್ನು ರಿಮ್ಯಾಪ್ ಮಾಡಿರುವುದರಿಂದ ಈ ಎಸ್‌ಯುವಿ ಪೂರ್ಣ ಸಾಮರ್ಥ್ಯದಲ್ಲಿ ಚಲಿಸುತ್ತದೆ. ಎಂಜಿನ್‌ಗೆ ಗಾಳಿಯನ್ನು ಫಿಲ್ಟರ್ ಮಾಡುವ ಏರ್ ಫಿಲ್ಟರ್ ಅನ್ನು ಹೊಸದಾಗಿ ಅಳವಡಿಸಲಾಗಿದೆ. ಇವುಗಳ ಹೊರತಾಗಿ ಬೇರೆ ಯಾವುದೇ ಮೆಕಾನಿಕಲ್ ಬಿಡಿ ಭಾಗಗಳನ್ನು ಬದಲಿಸಿಲ್ಲ.