ಸೆಲೆರಿಯೊಗೆ ಹೆಚ್ಚಿದ ಬೇಡಿಕೆ; ನಿರ್ಮಾಣ ಸಾಮರ್ಥ್ಯ ದ್ವಿಗುಣ

ದೇಶದ ವಾಹನ ಇತಿಹಾಸದಲ್ಲಿ ಸಾಮಾನ್ಯ ಮ್ಯಾನುವಲ್ ವೆರಿಯಂಟ್‌ಗಿಂತಲೂ ಆಟೋಮ್ಯಾಟಿಕ್ ಆವೃತ್ತಿಗಳಿಗೆ ಅತಿ ಹೆಚ್ಚಿನ ಬೇಡಿಕೆ ದಾಖಲಾಗಿದೆ. ಅಲ್ಲದೆ ಮಾರುತಿ ನಿರೀಕ್ಷೆಗೂ ಮೀರಿ ಜನಪ್ರಿಯತೆ ಗಿಟ್ಟಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದೆ.

ಇದರಂತೆ ಈಗಿರುವ 5,000 ಯುನಿಟ್‌ಗಳಿಗೆ ಬದಲಾಗಿ ಮಾಸಿಕವಾಗಿ 10,000 ಯುನಿಟ್ ಉತ್ಪಾದಿಸಲು ಸಂಸ್ಥೆ ನಿರ್ಧರಿಸಿದೆ.

ಅಷ್ಟಕ್ಕೂ ನಿರ್ಮಾಣ ಸಾಮರ್ಥ್ಯವನ್ನು ದ್ವಿಗುಣಗೊಳಿಸುವುದು ಅಷ್ಟು ಸುಲಭದ ಮಾತಲ್ಲ. ಆದರೆ ದೇಶದ ಅತಿದೊಡ್ಡ ಪ್ರಯಾಣಿಕ ಕಾರು ತಯಾರಕ ಸಂಸ್ಥೆಯಾಗಿರುವ ಮಾರುತಿಗೆ ಅಷ್ಟೊಂದು ತಾಕತ್ತಿದೆ. ಅಲ್ಲದೆ ಎಸ್ಟಾರ್ ಉತ್ಪಾದನೆ ಸ್ಥಗಿತವಾಗಿರುವುದರಿಂದ ಇದರ ಪ್ರಯೋಜನವನ್ನು ಪಡೆಯಲಿದೆ.

ವರದಿಗಳ ಪ್ರಕಾರ ಹೆಚ್ಚುವರಿ ಬಿಡಿಭಾಗಗಳಿಗಾಗಿ ಥರ್ಡ್ ಪಾರ್ಟಿ ವೆಂಡರ್‌ಗಳ ಮೊರೆ ಹೋಗಬೇಕಾಗುತ್ತದೆ. ಈ ಸಂಬಂಧ ವೆಂಡರ್‌ಗಳು ಸಮ್ಮತಿ ಸೂಚಿಸಿರುವ ಬಗ್ಗೆಯೂ ಮಾಹಿತಿ ಲಭಿಸಿದ್ದು, ಇದು ಮಾರುತಿ ನಿರ್ಮಾಣ ಸಾಮರ್ಥ್ಯವನ್ನು ದ್ವಿಗುಣಗೊಳಿಸಲಿದೆ.

ಪ್ರಸ್ತುತ ಕೆಲವು ಶೋ ರೂಂಗಳಲ್ಲಿ ಟಾಪ್ ಎಂಡ್ ಮಾರುತಿ ಸೆಲೆರಿಯೊ ಆಟೋಮ್ಯಾಟಿಕ್ ಕಾರುಗಳ ಕಾಯುವಿಕೆ ಅವಧಿ ಆರು ತಿಂಗಳ ವರೆಗೂ ವಿಸ್ತರಿಸಿದೆ. ಹಾಗಿರುವಾಗ ನಿರ್ಮಾಣ ಸಾಮರ್ಥ್ಯ ದ್ವಿಗುಣಗೊಳಿಸುವುದರಿಂದ ಗ್ರಾಹಕರಿಗೆ ಬಹುಬೇಗನೇ ಕಾರು ವಿತರಿಸಬಹುದಾಗಿದೆ.