ಕಾರಿನ ಮೈಲೇಜ್ ಹೆಚ್ಚಿಸಲು ಹದಿನೇಳು ಸಲಹೆ

Updated: Tuesday, August 28, 2012, 14:10 [IST]

ಪೆಟ್ರೋಲ್ ದರವಂತೂ ಕಡಿಮೆಯಾಗುವ ಮಾತೇ ಇಲ್ಲ. ಡೀಸೆಲ್ ಕೂಡ ಹೆಚ್ಚು ದಿನ ಅಗ್ಗವಾಗಿ ಉಳಿಯುವ ನಿರೀಕ್ಷೆಯಿಲ್ಲ. ಇಂತಹ ಸಮಯದಲ್ಲಿ ಕಿಸೆಯಲ್ಲಿ ದುಡ್ಡು ಉಳಿಯಬೇಕಾದರೆ ನಮ್ಮ ನಮ್ಮ ಕಾರುಗಳ ಮೈಲೇಜ್ ಹೆಚ್ಚಿಸಲೇಬೇಕು.

ಕಾರುಗಳ ಮೈಲೇಜ್ ಹೆಚ್ಚಿಸೋದು ಹೇಗೆ? ಅದಕ್ಕೂ ಕನ್ನಡ ಡ್ರೈವ್ ಸ್ಪಾರ್ಕ್ ಬಳಿ ಸಾಕಷ್ಟು ಬಿಟ್ಟಿ ಸಲಹೆಗಳಿವೆ. ಇದನ್ನು ಪಾಲಿಸಿದರೆ ಖಂಡಿತಾ ನೀವು ದುಡ್ಡು ಉಳಿಸಬಹುದು. ಈ ಕೆಳಗೆ ಸೂಚಿಸಿರುವ ಸಲಹೆಗಳನ್ನು ಪಾಲಿಸಿದರೆ ಖಂಡಿತಾ ನಿಮ್ಮ ಕಾರು ಮೈಲೇಜ್ ಹೆಚ್ಚಾಗುವುದರಲ್ಲಿ ಸಂಶಯವೇ ಇಲ್ಲ.

* ಸ್ಮೂತಾಗಿ ಡ್ರೈವ್ ಮಾಡಿ: ಅಗ್ರೆಸಿವ್ ಆಗಿ ಆಕ್ಸಿಲರೇಷನ್ ಮತ್ತು ಬ್ರೇಕ್ ಹಾಕುವುದು ಇಂಧನ ಅನುಭೋಗ ಹೆಚ್ಚಿಸುತ್ತದೆ. ಆದಾಷ್ಟು ಸ್ಮೂತಾಗಿ ವಾಹನ ಚಾಲನೆ ಮಾಡಿಕೊಳ್ಳುವುದನ್ನು ರೂಢಿಸಿಕೊಳ್ಳಿರಿ.

* ಕ್ಲಚ್ ರೈಡ್ ಅವಾಯ್ಡ್ ಮಾಡಿ: ಕ್ಲಚ್ ಮೇಲೆ ಸಂಪೂರ್ಣವಾಗಿ ಅವಲಂಬಿಸಿಕೊಂಡು ಡ್ರೈವ್ ಮಾಡುವ ಕ್ರಮ ಬಿಟ್ಟು ಬಿಡಿ. ಅನಗತ್ಯವಾಗಿ ಕ್ಲಚ್ ಬಳಸುತ್ತಿದ್ದರೆ ಎಂಜಿನ್ ಪವರ್ ಸುಮ್ಮನೆ ವ್ಯರ್ಥವಾಗುತ್ತದೆ.

* ಸ್ವಲ್ಪ ಹೊತ್ತು ಕಾರು ಬಿಟ್ಟು ಪಕ್ಕದ ಅಂಗಡಿಗೆ ಹೋಗುತ್ತಿರಿ ಅಂದುಕೊಳ್ಳಿ. ಎಂಜಿನ್ ಆಫ್ ಮಾಡಿಯೇ ಕಾರು ಇಳಿಯಿರಿ.

* ಸರಿಯಾಗಿ ಗೇರ್ ಹಾಕಿ, ಸಮರ್ಪಕ ಗೇರ್ ಬಳಸಿ: ಕಡಿಮೆ ವೇಗಕ್ಕೆ ಹೈಯರ್ ಗೇರ್ ಬಳಸುವುದು ಅಥವಾ ಅತ್ಯಧಿಕ ವೇಗಕ್ಕೆ ಲೋ ಗೇರ್ ಬಳಸುವುದರಿಂದ ಇಂಧನ ಅನುಭೋಗ ಹೆಚ್ಚಾಗುತ್ತದೆ. ಎಂಜಿನಿಗೆ ಹೆಚ್ಚು ಆಯಾಸವಾಗದಂತೆ ಆದಷ್ಟು ಬೇಗ ಗೇರ್ ಶಿಫ್ಟ್ ಮಾಡಿ.

* ನಿಗದಿತ ವೇಗದಲ್ಲಿ ಪ್ರಯಾಣ ಮಾಡಿ.

* ಕಾರಿನ ವೇಗಕ್ಕೆ ಅಡ್ಡಿ ಉಂಟು ಮಾಡುವ ಅಡೆತಡೆಗಳ ಬಗ್ಗೆ ಗಮನವಿರಲಿ. ವೇಗದಲ್ಲಿ ಪ್ರಯಾಣಿಸುವಾಗ ಕಾರಿನ ಕಿಟಕಿ ತೆರೆದಿದ್ದರೆ ವೇಗ ಕಡಿಮೆಯಾಗುತ್ತದೆ. ಇಂಧನ ಅಪವ್ಯಯವಾಗುತ್ತದೆ.

* ನಿಮ್ಮ ಕಾರಿಗೂ ರಸ್ತೆಯಲ್ಲಿರುವ ಇತರ ವಾಹನದ ನಡುವೆ ಸುರಕ್ಷಿತ ಅಂತರ ಕಾಯ್ದುಕೊಳ್ಳಿ.

* ಹತ್ತಿರದ ಭೇಟಿಗೆ ಕಾರು ಬಳಸದಿರುವುದು ಒಳ್ಳೆಯದು. ಅಂದರೆ ಕಾಲ್ನಡಿಗೆಯಲ್ಲಿ ಹೋಗಬಹುದಾದ ಸ್ಥಳಕ್ಕೆ ಕಾರಲ್ಲಿ ಹೋಗಬೇಡಿ.

ಕಾರು ಮೈಲೇಜ್ ಹೆಚ್ಚಿಸುವ ಇತರ ಅಂಶಗಳು
* ನಂಬಿಕಸ್ಥ ಪೆಟ್ರೋಲ್ ಪಂಪ್ ನಲ್ಲಿ ಇಂಧನ ತುಂಬಿಸಿ. ಅಳತೆಯಲ್ಲಿ ಮೋಸಮಾಡುವರೂ ಇರುತ್ತಾರೆ. ಕಂಪನಿ ಮಾಲಿಕತ್ವದ ಪೆಟ್ರೋಲ್ ಪಂಪ್ ಒಳ್ಳೆಯದು. ಕೆಲವು ಖಾಸಗಿ ಪೆಟ್ರೋಲ್ ಪಂಪ್ ಗಳು ಗ್ರಾಹಕರ ಕಿಸೆಗೆ ಕತ್ತರಿ ಹಾಕಲು ಯತ್ನಿಸುತ್ತವೆ.
* ಟೈರ್ ಪ್ರೆಷರ್ ಸಮರ್ಪಕವಾಗಿರಲಿ.
* ಸಮರ್ಪಕವಾಗಿ ಕಾರಿನ ನಿರ್ವಹಣೆ ಮಾಡಿ. ಟ್ಯೂನ್, ಏರ್ ಫಿಲ್ಟರ್ ಸ್ವಚ್ಛತೆ, ಎಂಜಿನ್ ಆಯಿಲ್ ಬದಲಾಯಿಸುವಿಕೆ ಇತ್ಯಾದಿಗಳ ಮೇಲೆ ಅಸ್ಥೆ ವಹಿಸಿ.
* ಕಾರು ಹಗುರವಾಗಿರಲಿ: ಓವರ್ ಲೋಡ್ ಮಾಡದಿರಿ. ಅನವಶ್ಯಕ ವಸ್ತುಗಳನ್ನು ಕಾರಿನಲ್ಲಿ ಇಡಬೇಡಿ. ಕಾರು ಹಗುರವಾಗಿದ್ದಷ್ಟು ಮೈಲೇಜ್ ಜಾಸ್ಥಿ.

ಇನ್ನಷ್ಟು ಸಲಹೆ: ನೀವು ಮನಸ್ಸು ಮಾಡಬೇಕಷ್ಟೇ!
* ಕಾರ್ ಪೂಲ್: ನಿಮ್ಮ ದೊಡ್ಡಕಾರಲ್ಲಿ ಒಬ್ಬರೇ ಯಾಕೆ ಹೋಗುತ್ತೀರಿ. ನಿಮ್ಮ ಪಕ್ಕದ ಮನೆಯವರನ್ನು, ಸ್ನೇಹಿತರನ್ನು, ಸಹೋದ್ಯೋಗಿಗಳನ್ನು ಕರೆದುಕೊಂಡು ಹೋಗಿ.

* ನಿತ್ಯ ಬಳಕೆಗೆ ಸ್ಪೋರ್ಟ್ಸ್ ಕಾರು ಬಳಕೆ ಕಡಿಮೆ ಮಾಡಿ. ಮಾಮೂಲು ಕಾರು ಬಳಸಿರಿ.

* ಆದಷ್ಟು ಸಂಚಾರ ದಟ್ಟಣೆ ಹೆಚ್ಚಿರುವ ಸಮಯ ಅವಾಯ್ಡ್ ಮಾಡಿ. ಟ್ರಾಫಿಕ್ ನಲ್ಲಿ ಹೆಚ್ಚು ಇಂಧನ ವ್ಯರ್ಥವಾಗುತ್ತದೆ.

* ಹತ್ತಿರದ ಸ್ಥಳಗಳಿಗೆ ವಾಕ್ ಹೋಗಿ. ಆರೋಗ್ಯಕ್ಕೂ ಒಳ್ಳೆಯದು.

ಓದಿ: ಬೈಕ್ ಮೈಲೇಜ್ ಹೆಚ್ಚಿಸುವ ಸುಲಭ ತಂತ್ರಗಳು