ಸಾಮಾನ್ಯರು ವಿಮಾನದಲ್ಲಿ ಏಕಾಂಗಿಯಾಗಿ ಪ್ರಯಾಣಿಸಲು ಈ ಕಾರಣಗಳಿಂದ ಮಾತ್ರ ಸಾಧ್ಯ!

ಇದರಿಂದ ವಿಮಾನಯಾನ ಸಂಸ್ಥೆಗಳಿಗೆ ನಷ್ಟ ಉಂಟಾಗುವುದಿಲ್ಲವೇ? ಎಂಬುದು ಹಲವರ ಪ್ರಶ್ನೆ. ಸಾಮಾನ್ಯವಾಗಿ ವಿಮಾನದಲ್ಲಿ ಏಕಾಂಗಿಯಾಗಿ ಪ್ರಯಾಣಿಸುವ ಅದೃಷ್ಟ ಕೆಲವೇ ಜನರಿಗೆ ಮಾತ್ರ ಸಿಗುತ್ತಿರುತ್ತದೆ. ಅದರಲ್ಲೂ ದುಡ್ಡಿದ್ದವರು ಮಾತ್ರ ಪ್ಯಾಸೆಂಜರ್ ವಿಮಾನದಲ್ಲಿ ಏಕಾಂಗಿಯಾಗಿ ಪ್ರಯಾಣಿಸುತ್ತಾರೆ ಎಂಬುವುದು ತಪ್ಪು ಕಲ್ಪನೆ.

ಟಿಕೆಟ್ ಬುಕ್ ಮಾಡಿದ ಮೇಲೆ ಸಾಮಾನ್ಯರು ಕೂಡಾ ಏಕಾಂಗಿಯಾಗಿ ಪ್ರಯಾಣಿಸಬಹುದು. ಅದು ಹೇಗೆ ಎಂದರೆ, ನೀವು ಬುಕ್ ಮಾಡಿದ ವಿಮಾನಕ್ಕೆ ಅದೇ ಸಮಯಕ್ಕೆ ಬೇರೆಯವರು ಬುಕ್‌ ಮಾಡದಿದ್ದಾಗ ಇಂತಹ ಅದೃಷ್ಟ ಸಿಗಬಹುದು. ಆದರೆ ಇಂತಹ ಸಂದರ್ಭಗಳಲ್ಲಿ ಮಧ್ಯಮ ವರ್ಗದ ಜನರು ಅನುಭವವಿಲ್ಲದೆ ಪ್ರಯಾಣಿಸುವಾಗ ಗಾಬರಿಯಾಗುತ್ತಾರೆ.

ಇದೇ ಕಾರಣಕ್ಕೆ ಹಲವರು ಪ್ರಯಾಣಿಸದೇ ಟಿಕೆಟ್ ರದ್ದು ಮಾಡುತ್ತಾರೆ. ಆದರೆ ಅನುಭವವಿದ್ದವರು ಏಕಾಂಗಿಯಾಗಿ ಪ್ರಯಾಣಿಸುತ್ತಾರೆ. ಇದರರ್ಥ ಮಧ್ಯಮ ವರ್ಗದ ಜನರು ಏಕಾಂಗಿಯಾಗಿ ಪ್ರಯಾಣಿಸಲು ಸಾಧ್ಯವಿಲ್ಲ ಎಂದಲ್ಲ. ಅದೃಷ್ಟ, ಅನುಭವ ಇದ್ದರೆ ಏಕಾಂಗಿಯಾಗಿ ಪ್ರಯಾಣಿಸಬಹುದು.

ಒಬ್ಬರ ಪ್ರಯಾಣದಿಂದ ಸಂಸ್ಥೆಗೆ ನಷ್ಟವಾಗುವುದಿಲ್ಲವೆ?ಈ ಹಿಂದೆಯೂ ಹಲವಾರು ಬಾರಿ ಇಂತಹ ಘಟನೆಗಳು ನಡೆದಿವೆ. ವಿಮಾನವನ್ನು ಒಬ್ಬರಿಗಾಗಿ ನಿರ್ವಹಿಸುವ ಬದಲು ಏಕೆ ರದ್ದುಗೊಳಿಸಬಾರದು? ಒಬ್ಬನೇ ಪ್ರಯಾಣಿಕರಿದ್ದರೂ ರದ್ದುಗೊಳಿಸದಿರಲು ಹಲವು ಕಾರಣಗಳಿವೆ.

ಕೇವಲ ಒಬ್ಬ ಪ್ರಯಾಣಿಕ ಇದ್ದರೂ ವಿಮಾನಗಳನ್ನು ನಿರ್ವಹಿಸಲು ಮೊದಲ ಮತ್ತು ಮುಖ್ಯ ಕಾರಣವೆಂದರೆ ವೇಳಾಪಟ್ಟಿ. ವಿಮಾನ ಎಲ್ಲಿಗೆ ಹಾರಬೇಕು ಎಂಬುದನ್ನು ಕೆಲವು ತಿಂಗಳ ಮುಂಚಿತವಾಗಿಯೇ ನಿಗದಿ ಮಾಡಿ ವೇಳಾಪಟ್ಟಿಯನ್ನ ಸಿದ್ದಪಡಿಸಿರುತ್ತಾರೆ. ಕೆಲವೊಮ್ಮೆ ಒಂದು ವರ್ಷದ ಮುಂಚಿತವಾಗಿಯೇ ಎಲ್ಲಿಗೆ ಹೋಗಬೇಕು ಎಂಬದನ್ನು ನಿಗದಿಪಡಿಸಿರುತ್ತಾರೆ.

ಈ ವೇಳಾಪಟ್ಟಿಯನ್ನು ಅನುಸರಿಸಲು ವಿಫಲವಾದರೆ ವಿವಿಧ ಗೊಂದಲಗಳಿಗೆ ಕಾರಣವಾಗುವ ಸಾಧ್ಯತೆಯಿದೆ. ಈ ವೇಳಾಪಟ್ಟಿಯ ಪ್ರಕಾರ, ಪ್ರತಿ ವಿಮಾನವು ನಿರ್ದಿಷ್ಟ ಸಮಯದಲ್ಲಿ ನಿರ್ದಿಷ್ಟ ಸ್ಥಳದಲ್ಲಿರಬೇಕು. ಹಾಗಾಗಿ ಒಬ್ಬನೇ ಪ್ರಯಾಣಿಕನಿದ್ದಾನೆ ಎಂಬ ಕಾರಣಕ್ಕೆ ವಿಮಾನವನ್ನು ರದ್ದು ಮಾಡಲು ಸಾಧ್ಯವಿಲ್ಲ.

ಸಾಮಾನ್ಯವಾಗಿ ವಿಮಾನಗಳು ಎರಡು ನಿರ್ದಿಷ್ಟ ವಿಮಾನ ನಿಲ್ದಾಣಗಳ ನಡುವೆ ಪ್ರಯಾಣಿಸುವುದಿಲ್ಲ. ಬದಲಾಗಿ ವಿವಿಧ ಮಾರ್ಗಗಳಲ್ಲಿ, ವಿವಿಧ ವಿಮಾನ ನಿಲ್ದಾಣಗಳಿಗೆ ಬಂದು ಅಲ್ಲಿ ಕಾಯ್ದಿರಿಸಿರುವ ಪ್ರಯಾಣಿಕರನ್ನು ಪಿಕ್ಅಪ್ ಮಾಡಿಕೊಳ್ಳುತ್ತದೆ. ಒಂದು ವಿಮಾನ ನಿಲ್ದಾಣದಲ್ಲಿ ಒಬ್ಬನೇ ಪ್ರಯಾಣಿಕನಿದ್ದರೂ ಮುಂಬರುವ ನಿಲ್ದಾಣದಲ್ಲಿ ಬಹಳಷ್ಟು ಪ್ರಯಾಣಿಕರನ್ನು ಕಾಯ್ದಿರಿಸಿರಬಹುದು.

ಒಬ್ಬನೇ ಪ್ರಯಾಣಿಕನಿದ್ದರೂ ವಿಮಾನಗಳನ್ನು ನಿರ್ವಹಿಸಲು ಮತ್ತೊಂದು ಕಾರಣವೆಂದರೆ ಸರಕು ಸಾಗಾಟ. ಹೌದು, ವಿಮಾನಗಳು ಪ್ರಯಾಣಿಕರೊಂದಿಗೆ ಸರಕುಗಳನ್ನು ಸಾಗಿಸುತ್ತವೆ. ಆದ್ದರಿಂದ ಒಬ್ಬನೇ ಪ್ರಯಾಣಿಕರಿದ್ದರೂ, ಸರಕು ಸಂಪೂರ್ಣವಾಗಿ ಲೋಡ್ ಆಗಿರುತ್ತದೆ. ಸರಕಗಳಿಂದಲೂ ವಿಮಾನಯಾನ ಸಂಸ್ಥೆಗಳು ಹೆಚ್ಚು ಆದಾಯವನ್ನು ಗಳಿಸುತ್ತವೆ.

ಈ ಸರಕುಗಳನ್ನು ಸಮಯಕ್ಕೆ ಸರಿಯಾಗಿ ಸಾಗಿಸಿ ಸಾಗಿಸಬೇಕಾದ್ದರಿಂದ ಒಬ್ಬರಿದ್ದರೂ ಪ್ರಯಾಣ ನಿಲ್ಲುವುದಿಲ್ಲ. ವಿಮಾನವನ್ನು ನಿರ್ವಹಿಸುವ ವೆಚ್ಚವನ್ನು ಸರಕುಗಳಿಂದ ಬರುವ ಆದಾಯದ ಮೂಲಕ ವಿಮಾನಯಾನ ಸಂಸ್ಥೆಗಳು ಸರಿದೂಗಿಸುತ್ತವೆ.

ಮತ್ತೊಂದು ಪ್ರಮುಖಬ ಕಾರಣವೆಂದರೆ, ಕಾನೂನು. ಈಗಾಗಲೇ ನಿಗದಿಯಾಗಿರುವ ವೇಳಾಪಟ್ಟಿಯ ಪ್ರಕಾರ, ವಿಮಾನಯಾನ ಸಂಸ್ಥೆಗಳು ವಿಮಾನಗಳನ್ನು ನಿರ್ವಹಿಸುವ ಕರ್ತವ್ಯವನ್ನು ಹೊಂದಿರುತ್ತವೆ. ಇಲ್ಲದಿದ್ದಲ್ಲಿ ಸಂಸ್ಥೆಗಳು ಸರ್ಕಾರದ ಕ್ರಮಗಳನ್ನು ಎದುರಿಸಬೇಕಾಗುತ್ತದೆ. ಕೆಲವೊಮ್ಮೆ ಅನಿವಾರ್ಯ ಕಾರಣಗಳಿದ್ದರೆ, ಈ ನಿಯಂತ್ರಣದಲ್ಲಿ ವಿನಾಯಿತಿ ನೀಡಲಾಗುವುದು.

ಅಂದರೆ ಹವಾಮಾನ ವೈಪರಿತ್ಯ ಅಥವಾ ಯಾಂತ್ರಿಕ ವೈಫಲ್ಯಗಳಂತಹ ಅನಿವಾರ್ಯ ಕಾರಣಗಳಿದ್ದರೆ, ವಿಮಾನಯಾನ ಸಂಸ್ಥೆಗಳು ವಿನಾಯಿತಿ ಪಡೆಯುತ್ತವೆ. ವಿಮಾನದಲ್ಲಿ ಏಕಾಂಗಿಯಾಗಿ ಪ್ರಯಾಣಿಸುವ ಪ್ರಯಾಣಿಕರಿಗೆ ಬಹಳ ವಿಶೇಷ ಅನುಭವ ಇರುತ್ತದೆ. ಕಡಿಮೆ ವೆಚ್ಚದಲ್ಲಿ ವಿಮಾನದಲ್ಲಿ ಪ್ರತ್ಯೇಕವಾಗಿ ಪ್ರಯಾಣಿಸುತ್ತಾರೆ. ಆದರೆ ಎಲ್ಲರಿಗೂ ಈ ಅದೃಷ್ಟ ಸಿಗುವುದು ವಿರಳ.