ಎಚ್ಚರ! ಹೊಸ ಬೈಕ್ ಕೊಳ್ಳುವಾಗ 2 ಹೆಲ್ಮೆಟ್ ಕಡ್ಡಾಯ

ದಾವಣಗೆರೆ ಪ್ರಾದೇಶಿಕ ಸಾರಿಗೆ ಕಚೇರಿ ವ್ಯಾಪ್ತಿಯಲ್ಲಿ ಇಂತಹದೊಂದು ನಿಮಯವನ್ನು ಈಗಾಗಲೇ ಜಾರಿಗೆ ತರಲಾಗಿದ್ದು, ಈಗ ಬೆಂಗಳೂರು ಮತ್ತಿತ್ತರ ನಗರಗಳಿಗೂ ವ್ಯಾಪಿಸಲಾಗುತ್ತಿದೆ.

ಐಎಸ್‌ಐ ಸರ್ಟಿಫಿಕೇಟ್

ಐಎಸ್‌ಐ ಮಾನ್ಯತಾ ಪಡೆದ ಹೆಲ್ಮೆಟ್ ಗಳನ್ನೇ ನೀವು ಖರೀದಿಸಬೇಕಾಗುತ್ತದೆ. ಇಲ್ಲವಾದ್ದಲ್ಲಿ ಬೈಕ್ ರಿಜಿಸ್ಟ್ರೇಷನ್ ಮಾಡಲು ನಿಮಗೆ ತೊಂದರೆ ಎದುರಾಗಲಿದೆ.

ರಸೀದಿ ಹಾಜರುಪಡಿಸಿ

ಅಂಗಡಿಗಳಿಂದ ಎರಡು ಹೆಲ್ಮೆಟ್ ಗಳನ್ನು ಪಡೆದ ರಸೀದಿಯನ್ನು (ಬಿಲ್) ಹಾಜರುಪಡಿಸಬೇಕಾಗುತ್ತದೆ. ಅಂದರೆ ರಸ್ತೆ ಬದಿಗಳಿಂದ ದೊರಕುವ ಕಡಿಮೆ ಬೆಲೆಯ ಹೆಲ್ಮೆಟ್ ಗಳಿಗೆ ಇಲ್ಲಿ ಬ್ರೇಕ್ ಬೀಳಲಿದೆ.

ಸುಪ್ರೀಂ ಕೋರ್ಟ್ ನಿರ್ದೇಶನದಂತೆ ಬಹಳ ಸಮಯಗಳಿಂದ ಮೀನಾಮೇಷ ಎದುರಿಸುತ್ತಿದ್ದ ದ್ವಿಚಕ್ರ ವಾಹನ ಹಿಂಬದಿ ಸವಾರರಿಗೂ ಹೆಲ್ಮೆಟ್ ಕಡ್ಡಾಯ ನಿಯಮವನ್ನು ಕೊನೆಗೂ 2016 ವರ್ಷಾರಂಭದಲ್ಲಿ ಜಾರಿಗೆ ತರಲಾಗಿತ್ತು.

ಮೋಟಾರು ವಾಹನ ಕಾಯ್ದೆ ಪ್ರಕಾರ ಬೈಕ್ ಗಳನ್ನು ಮಾರಾಟ ಮಾಡುವ ಡೀಲರ್ ಗಳೇ ಹೆಲ್ಮೆಟ್ ಗಳನ್ನು ಒದಗಿಸಬೇಕಾಗುತ್ತದೆ. ಪ್ರಸ್ತುತ ದ್ವಿಚಕ್ರ ಹಿಂಬದಿ ಸವಾರರಿಗೂ ಹೆಲ್ಮೆಟ್ ಕಡ್ಡಾಯ ನಿಯಮ ರಾಜ್ಯದೆಲ್ಲೆಡೆ ಕಟ್ಟುನಿಟ್ಟಿನಲ್ಲಿ ಜಾರಿಗೆ ಬರಲಿದೆ.

ಈ ಎಲ್ಲದರ ನಡುವೆ ಗ್ರಾಹಕರಿಗೆ ಸಮಸ್ಯೆ ಇಮ್ಮಡಿಯಾಗಲಿರುವುದಂತೂ ನಿಜ. ಆಗಲೇ ಹೆಲ್ಮೆಟ್ ಇರುವವರು ಹೊಸ ಬೈಕ್ ಖರೀದಿಸಬೇಕೆಂದರೆ ಏನು ಮಾಡಬೇಕು? ಎಂದು ಸವಾರರೊಬ್ಬರು ಪ್ರಶ್ನಿಸುತ್ತಾರೆ.

ನಗರದೆಲ್ಲೆಡೆ ಹೆಲ್ಮೆಟ್ ನಿಯಮವನ್ನು ಕಡ್ಡಾಯಗೊಳಿಸಿರುವ ಬೆಂಗಳೂರು ಟ್ರಾಫಿಕ್ ಪೊಲೀಸ್, ಜನವರಿ ಬಳಿಕ ಚಾಲಕರ ಮತ್ತು ಹಿಂಬದಿ ಸವಾರರ ವಿರುದ್ಧ ಅನುಕ್ರಮವಾಗಿ 2.25 ಲಕ್ಷ ಮತ್ತು 2.50 ಲಕ್ಷದಷ್ಟು ದೂರುಗಳನ್ನು ದಾಖಲಿಸಿದ್ದಾರೆ.