ಬೈಕ್ ಪ್ರೇಮಿಗಳಿಗೆ ಬೃಹತ್ ಯೋಜನೆಯೊಂದಿಗೆ ರಾಯಲ್ ಎನ್ ಫೀಲ್ಡ್!

ರಾಯಲ್ ಎನ್ ಫೀಲ್ಡ್ ಚೆನ್ನೈ ಹೊರವಲಯದಲ್ಲಿರುವ ವಲ್ಲಂ ವಡಗಲ್ ಘಟಕಕ್ಕೆ ಹೆಚ್ಚಿನ ಹೂಡಿಕೆಯನ್ನು ಮಾಡಲಿದೆ. ಇದು 2017 ಸೆಪ್ಟೆಂಬರ್ ತಿಂಗಳಲ್ಲಿ ಕಾರ್ಯಾಚರಣೆಯನ್ನು ಪ್ರಾರಂಭಿಸಲಿದೆ.

ಇದರ ಹೊರತಾಗಿ ಬ್ರಿಟನ್ ನಲ್ಲಿರುವ ತಾಂತ್ರಿಕ ಕೇಂದ್ರ ಮತ್ತು ಹೊಸ ಉತ್ಪನ್ನಗಳ ಅಭಿವೃದ್ಧಿಗೂ ರಾಯಲ್ ಎನ್ ಫೀಲ್ಡ್ ಹೂಡಿಕೆಯನ್ನು ಮೀಸಲಿರಿಸಿದೆ.

2019ನೇ ಆರ್ಥಿಕ ಸಾಲು ಆಗಮನದ ವೇಳೆಯಲ್ಲಿ ವಾರ್ಷಿಕವಾಗಿ 9,00,000 ಯುನಿಟ್ ಗಳ ನಿರ್ಮಾಣ ಸಾಮರ್ಥ್ಯ ಹೊಂದುವುದು ಎನ್ ಫೀಲ್ಡ್ ಗುರಿಯಾಗಿದೆ.

ವಾಹನ ಪ್ರೇಮಿಗಳಿಗೆ ಮತ್ತಷ್ಟು ಸಂತಸದ ಸುದ್ದಿ ತಂದಿರುವ ಆರ್ ಇ, ಮುಂದಿನ ಒಂದೆರಡು ವರ್ಷಗಳಲ್ಲಿ ನೂತನ ಮಾಡೆಲ್ ಹಾಗೂ ಪರಿಷ್ಕೃತ ವೆರಿಯಂಟ್ ಗಳನ್ನು ಹೊರತರುವುದಾಗಿ ಘೋಘಿಸಿದೆ.

ಪ್ರಸಕ್ತ ಆರ್ಥಿಕ ಸಾಲಿನ ಎರಡನೇ ತ್ರೈಮಾಸಿಕ ಅವಧಿಯ ಲಾಭಾಂಶದ ಕುರಿತು ಮಾತನಾಡುತ್ತಾ ವಿವರಣೆ ನೀಡಿರುವ ಈಚರ್ ಮೋಟಾರ್ಸ್ ಮಹಾ ನಿರ್ದೇಶಕ ಸಿದ್ದಾರ್ಥ ಪಾಲ್, "ಹೊಸತಾಗಿ ಬಿಡುಗಡೆಗೊಂಡಿರುವ ಹಿಮಾಲಯನ್ ಗೆ ಅತ್ಯುತ್ತಮ ಬೇಡಿಕೆ ವ್ಯಕ್ತವಾಗಿದ್ದು, ಬುಕ್ಕಿಂಗ್ ಪರಿಣಾಮಕಾರಿಯಾಗಿ ಮುಂದುವರಿದಿದೆ" ಎಂದಿದ್ದಾರೆ.

ರಾಯಲ್ ಎನ್ ಫೀಲ್ಡ್ ಕೊನೆಯದಾಗಿ ಬಿಡುಗಡೆ ಮಾಡಿರುವ ಮಹತ್ತರ ಉತ್ಪನ್ನಗಳಲ್ಲಿ ಹಿಮಾಲಯನ್ ಒಂದಾಗಿದೆ. ಆಫ್ ರೋಡ್ ಟೂರಿಂಗ್ ಬೈಕಾಗಿರುವ ಹಿಮಾಲನಯ್ ಗಮನಾರ್ಹ ಸಾಧನೆ ಮಾಡುತ್ತಿದೆ.

ರಾಯಲ್ ಎನ್ ಫೀಲ್ಡ್ ಎರಡನೇ ತ್ರೈಮಾಸಿಕ ಅವಧಿಯಲ್ಲಿ ಇದುವರೆಗಿನ ಅತ್ಯುತ್ತಮ ಪ್ರದರ್ಶನ ನೀಡಿದ್ದು, ಬರೋಬ್ಬರಿ 1981 ಕೋಟಿ ರುಪಾಯಿಗಳ ಆದಾಯ ಕಲೆ ಹಾಕಿದೆ. ತನ್ಮೂಲಕ ಶೇಕಡಾ 35ರಷ್ಟು ಏರುಗತಿಯನ್ನು ಸಾಧಿಸಿದೆ.

250 ಮತ್ತು ಅದಕ್ಕಿಂತಲೂ ಮೇಲ್ಪಟ್ಟ ಎಂಜಿನ್ ಸಿಸಿ ವಿಭಾಗದಲ್ಲಿ ಶೇಕಡಾ 95ರಷ್ಟು ಶೇರನ್ನು ಹೊಂದಿರುವ ರಾಯಲ್ ಎನ್ ಫೀಲ್ಡ್ ಗೆ ವಿದೇಶಿ ಬ್ರಾಂಡ್ ಗಳಿಂದ ಅಂಥದ್ದೇನು ಪೈಪೋಟಿ ಎದುರಾಗಿಲ್ಲ. ವಿದೇಶಿ ಬ್ರಾಂಡ್ ಸೀಮಿತ ಸಂಖ್ಯೆಯಲ್ಲಿ ಮಾತ್ರ ಮಾರಾಟಗೈಯುತ್ತಿದೆ. ಇನ್ನೊಂದೆಡೆ ದೇಶೀಯವಾಗಿ ನಿರ್ಮಾಣವಾಗುವ ಎನ್ ಫೀಲ್ಡ್ ಸ್ಪರ್ಧಾತ್ಮಕ ಬೆಲೆಗಳಲ್ಲಿ ಎಂಟ್ರಿ ಕೊಟ್ಟಿರುವುದು ನೆರವಾಗಿದೆ.

ಭಾರತದಲ್ಲಿ ಭದ್ರವಾಗಿ ನೆಲೆಯೂರಿರುವ ರಾಯಲ್ ಎನ್ ಫೀಲ್ಡ್ ಇದುವರೆಗೆ ವಿದೇಶ ಮಾರುಕಟ್ಟೆಗಳನ್ನು ಗುರಿ ಮಾಡಿರಲಿಲ್ಲ. ಆದರೆ ಕಳೆದ ಕೆಲವು ವರ್ಷಗಳಲ್ಲಿ ಪರಿಸ್ಥಿತಿ ಬದಲಾಗಿದ್ದು, ಭಾರತದಂತಹ ಅಭಿವೃದ್ಧಿ ಹೊಂದುತ್ತಿರುವ ಜೊತೆಗೆ ಯುರೋಪ್ ನ ಅಭಿವೃದ್ಧಿ ಹೊಂದಿದ ದೇಶಗಳನ್ನು ಗುರಿ ಮಾಡಲಿದೆ.

ಮುಂದಿನ ವರ್ಷ ಯುರೋಪ್ ನಲ್ಲಿ 15ರಿಂದ 20ರಷ್ಟು ಹೊಸ ಡೀಲರ್ ಶಿಪ್ ತೆರೆದುಕೊಳ್ಳಲಿರುವ ಎನ್ ಫೀಲ್ಡ್, ಕೊಲಂಬಿಯಾ, ಇಂಡೋನೇಷ್ಯಾ ಮತ್ತು ಥಾಯ್ಲೆಂಡ್ ಗೂ ತನ್ನ ಸಾನಿಧ್ಯವನ್ನು ವಿಸ್ತರಿಸಲಿದೆ.