ಬೊಲೆರೊ ಹಿಂದಿಕ್ಕಿದ ಕೆಯುವಿ100; ಆಕರ್ಷಣೆ ಕಳೆದುಕೊಂಡ ಐಕಾನಿಕ್ ಎಸ್‌ಯುವಿ?

By Nagaraja

Published: Tuesday, June 14, 2016, 17:25 [IST]

ದೇಶದ ಕ್ರೀಡಾ ಬಳಕೆಯ ವಾಹನಗಳ ದೈತ್ಯ ನಿರ್ಮಾಣ ಸಂಸ್ಥೆ ಮಹೀಂದ್ರ ಆಂಡ್ ಮಹೀಂದ್ರ ಇತ್ತೀಚೆಗಷ್ಟೇ ಅತಿ ನೂತನ ಕೆಯುವಿ100 ಕಾರನ್ನು ಬಿಡುಗಡೆಗೊಳಿಸಿತ್ತು. ಪ್ರಸ್ತುತ ಪರಿಣಾಮಕಾರಿ ಮಾರಾಟ ದಾಖಲಿಸಿಕೊಂಡಿರುವ ಕೆಯುವಿ100, ತನ್ನ ಹಿರಿಯ ಸೋದರ ಬೊಲೆರೊವನ್ನು ಹಿಂದಿಕ್ಕಿದೆ.

ಪುಟ್ಟ ಕಾರು ಕೆಯುವಿ100 ಪ್ರವೇಶದೊಂದಿಗೆ ಐಕಾನಿಕ್ ಎಸ್ ಯುವಿ ಬೊಲೆರೊ ತನ್ನ ಆಕರ್ಷಣೆಯನ್ನು ಕಳೆದುಕೊಂಡಿತೇ ಎಂಬ ಬಗ್ಗೆ ಪ್ರಶ್ನೆಗಳು ಬಲವಾಗಿ ಮೂಡಿ ಬರುತ್ತಿವೆ. ಯಾಕೆಂದರೆ ದಶಕದಿಂದಲೂ ಮಹೀಂದ್ರ ದೇಶದ ಶ್ರೇಷ್ಠ ಎಸ್‌ಯುವಿ ಎಂಬ ಪಟ್ಟ ಆಲಂಕರಿಸಿತ್ತು.

ಬೊಲೆರೊ ಹಿಂದಿಕ್ಕಿದ ಕೆಯುವಿ100; ಆಕರ್ಷಣೆ ಕಳೆದುಕೊಂಡ ಐಕಾನಿಕ್ ಎಸ್‌ಯುವಿ?

2016 ಮೇ ತಿಂಗಳ ಮಾರಾಟದಲ್ಲಿ ಮಹೀಂದ್ರ ಕೆಯುವಿ100, 4,446 ಯುನಿಟ್ ಗಳ ಮಾರಾಟವನ್ನು ದಾಖಲಿಸಿಕೊಂಡಿದೆ. ಇದು ಬೊಲೆರೊಗಿಂತಲೂ 27 ಯುನಿಟ್ ಗಳಷ್ಟು ಜಾಸ್ತಿಯಾಗಿದೆ.

ಆಧುನಿಕ ನೋಟ, ನಗರ ಪ್ರದೇಶಕ್ಕೆ ಸೂಕ್ತವಾದ ವಾಹನ, ಕೈಗೆಟುಕುವ ಬೆಲೆ ಹೀಗೆ ಹಲವಾರು ಅಂಶಗಳು ಮಹೀಂದ್ರ ಕೆಯುವಿ100 ಕಾರಿಗೆ ವರದಾನವಾಗಿ ಪರಿಣಮಿಸಿದೆ.

ಇನ್ನೊಂದೆಡೆ ಕಳೆಗುಂದಿರುವ ವಿನ್ಯಾಸ, ನಗರ ಪ್ರದೇಶಕ್ಕೆ ಹೊಂದಿಕೆಯಾಗದ ನೋಟ ಮತ್ತು ಬೇಸಿಕ್ ವೆರಿಯಂಟ್ ನಲ್ಲೂ ಎಸಿ ಸೌಲಭ್ಯ ಕೂಡಾ ಇಲ್ಲದಿರುವುದು ಮಹೀಂದ್ರ ಬೊಲೆರೊಗೆ ಹಿನ್ನಡೆಯಾಗಿ ಪರಿಣಮಿಸಿದೆ.

ಮಹೀಂದ್ರ ಬೊಲೆರೊ ಕಾರಿನ ದೊಡ್ಡದಾದ ಗಾತ್ರ ಸಹ ಇಲ್ಲಿ ಸಮಸ್ಯೆಯಾಗಿ ಪರಿಣಮಿಸಿರಬಹುದು. ನಗರ ಪ್ರದೇಶಗಳಲ್ಲಿ ದೈನಂದಿನ ಬಳಕೆ ಮಾಡಲು ಇದು ಯೋಗ್ಯವಲ್ಲ ಎಂಬ ಭಾವನೆಯು ಗ್ರಾಹಕರನ್ನು ಕಾಡುತ್ತಿರಬಹುದು.