ಜಿ.ಎಂ ಸಂಸ್ಥೆಯ ಹಲೊಲ್ ಉತ್ಪಾದನಾ ಘಟಕವನ್ನು ಸ್ವಾಧೀನಪಡಿಸಿಕೊಂಡ ಎಸ್ಎಐಸಿ

ಚೈನಾದ ದೈತ್ಯ ಸಂಸ್ಥೆಯಾದ ಶಾಂಘೈ ಆಟೋಮೋಟಿವ್ ಇಂಡಸ್ಟ್ರೀಸ್ ಕಾರ್ಪೋರೇಷನ್(ಎಸ್ಎಐಸಿ) ಸಂಸ್ಥೆ ತನ್ನ ಉತ್ಪಾದನಾ ಸ್ಥಾವರವನ್ನು ಸ್ಥಾಪಿಸಲು ಗುಜರಾತ್ ರಾಜ್ಯ ಸರ್ಕಾರದೊಂದಿಗೆ ಮೆಮೊರೆಂಡಮ್ ಆಫ್ ಅಂಡರ್‌ಸ್ಟ್ಯಾಂಡಿಂಗ್ ಪತ್ರಕ್ಕೆ ಸಹಿ ಹಾಕಿದೆ.

ಮಾಹಿತಿ ಪ್ರಕಾರ, ಜನರಲ್ ಮೋಟಾರ್ಸ್ ಸಂಸ್ಥೆಯ ಹಲಾಲ್ ಉತ್ಪಾದನಾ ಸೌಲಭ್ಯವನ್ನು ಎಸ್ಎಐಸಿ ಸಂಸ್ಥೆ ಖರೀದಿ ಮಾಡಲು ಮುಂದಾಗಿದೆ ಎನ್ನಲಾಗಿದೆ.

ಇದರ ಸಂಬಂಧ, ನೋಂದಣಿ ಮತ್ತು ಅಗತ್ಯ ಅನುಮೋದನೆಗಳನ್ನು ನೀಡಲು ಮೋಟಾರು ವಾಹನ ತಯಾರಕರಿಗೆ ಗುಜರಾತ್ ಸರ್ಕಾರವು ಭರವಸೆ ನೀಡಿದೆ ಎಂಬ ವಿಚಾರ ಹೊರಬಿದ್ದಿದೆ.

ಭಾರತದಲ್ಲಿ ರೂ. 2,000 ಕೋಟಿ ರೂಪಾಯಿ ಹೂಡಿಕೆ ಮಾಡಲು ವಾಹನ ತಯಾರಕ ಸಂಸ್ಥೆ ಎಸ್ಎಐಸಿ ಮುಂದಾಗಿದ್ದು, ಹೊಸದಾಗಿ ಸಹಿ ಮಾಡಲ್ಪಟ್ಟ MoU ಪ್ರಕಾರ, ಗುಜರಾತ್ ಸ್ಥಾವರದಲ್ಲಿ ಸುಮಾರು 1,000 ಕಾರ್ಮಿಕರಿಗೆ ಉದ್ಯೋಗ ನೀಡಲು ಈ ಸಂಸ್ಥೆ ನೆರವಾಗುತ್ತದೆ ಎಂದು ತಿಳಿದು ಬಂದಿದೆ.

ಇದಲ್ಲದೆ, ಚೀನಾ ಆಟೋಮೋಟಿವ್ ಪೂರೈಕೆದಾರರು ಈ ಘಟಕದಲ್ಲಿ ಯೂನಿಟ್ ಸ್ಥಾಪಿಸಲು 1,000 ಕೋಟಿ ರೂ. ಹೂಡಿಕೆ ಮಾಡಲು ಯೋಜಿಸುತ್ತಿದ್ದಾರೆ ಎಂಬ ಮಾಹಿತಿ ಸಿಕ್ಕಿದೆ.

2019ರ ನಂತರ ಈ ಸ್ಥಾವರವು ಕಾರ್ಯರೂಪಕ್ಕೆ ಬರಲಿದ್ದು, ಎಸ್ಎಐಸಿ ಸಂಸ್ಥೆ ಸುಮಾರು 50,000 ರಿಂದ 70,000 ವಾಹನಗಳನ್ನು ಉತ್ಪಾದಿಸುವ ಗುರಿಯನ್ನು ಹೊಂದಿದೆ.

ವಾಹನ ತಯಾರಕ ಸಂಸ್ಥೆಯಾದ ಎಸ್ಎಐಸಿ ಭಾರತೀಯ ಮಾರುಕಟ್ಟೆಯನ್ನು ಪ್ರವೇಶಿಸಲು ಉತ್ಸುಕವಾಗಿದ್ದು, ಮುಂಬರುವ ದಿನಗಳಲ್ಲಿ ಎಂಜಿ ಬ್ರಾಂಡ್ ಉತ್ಪನ್ನಗಳ ಕುರಿತು ಮಾಹಿತಿಯನ್ನು ಬಹಿರಂಗಪಡಿಸಲಾಗುವುದು ಎಂದು ಕಂಪನಿ ತಿಳಿಸಿದೆ.